Alkitab Mobile SABDA
[VER] : [SIMALUNGUN]     [PL]  [PB] 
 <<  Yesaya 42 >> 

Juakjuak ni Jahowa, na Manondangi Dunia on

1Tonggor ma, juakjuak-Ku, na Hutogu in, na Hupilih in, na hinarosuhkon ni Tonduy-Hu. Domma Hupasorap Tonduy-Hu hu Bani, patandahonon-Ni do habonaron hubani sipajuh begu-begu.

2Seng marsurak-surak Ia barang maling sora-Ni ibahen, anjaha seng ipabogeihon sora-Ni i dalan-dalan.

3Arung-arung na dob marosak, seng lanjar ponggolhonon-Ni, anjaha sumbu na mirlop-irlop, seng lanjar intopan-Ni; domu hubani hasintongan do dalankonon-Ni uhum.

4Seng anjai miloh ia anjaha seng anjai marosak ia, paima ipajongjong hasintongan i tanoh on anjaha pulou-pulou masihol bani titahni.

5Sonon do hata ni Naibata Jahowa, Sitompa langit anjaha na paherbangkonsi, na pajonamkon tanoh on ampa sagala na tubuh hunjai, na mambere hosah bani halak na marianan ijai ampa tonduy bani jolma na mardalan ijai,

6“Ahu do Jahowa, na mandilo ho ibagas hapintoron anjaha na manogu tanganmu. Ahu do na parorot ho anjaha Ahu do na pabangkit ho gabe parpadanan bani bangsa in, gabe panondang bani bangsa parbegu,

7laho mambuha mata ni na mapitung, laho padaratkon na tarsangkut ibagas tutupan, humbagas rumah tahanan halak na marianan ibagas na golap.

8Ahu do Jahowa, ai ma goran-Ku, anjaha hasangapon-Ku, seng bereon-Ku bani na legan, sonai hamuliaon-Ku bani gana-gana.

9Na dob hinatahon hinan domma saud, anjaha na baru Hupatugah ma sonari; paima martumbor ai, pabogeihonon-Ku ma ai bannima.”

Doding Puji-pujian bani Jahowa, Sipaluah Bangsa-Ni

10Dodingkon nasiam ma bani Jahowa sada doding na baru, hamuliaon-Ni bani ujung ni tanoh on, nasiam na marlayar i laut ampa ganup na mangingani ai, nasiam pulou-pulou ampa na marianan ijai.

11Sai ipamaling halimisan ma sorani ampa na montas ijai, dusun-dusun, na niiankon ni halak Kedar; sai marolob-olob ma halak na marianan bani dolog batu, marsurak-surak ma sidea hun pakpak ni dolog.

12Ibere sidea ma hasangapon bani Jahowa, anjaha ibaritahon ma hamuliaon-Ni bani pulou-pulou.

13Bingkat do Jahowa songon puanglima, songon halak siparmunsuh gajag ringis-Ni; ipamaling sora-Ni, marsurak porang do Ia, anjaha ipataridahkon hapuanglimaon-Ni bani munsuh-Ni.

14Hupasip do humbani nahinan, sai soh do Ahu, hutahan diri-Ku, tapi sonari mandodoruh do Ahu songon puang-puang na mangarou, hosah-kosah do Ahu mangalop hosah.

15Seda do bahenon-Ku dolog-dolog pakon buntu-buntu, anjaha pameluson-Ku do suan-suananni; salihkonon-Ku do bah mardalan gabe tanoh dorging-dorging anjaha horah bahenon-Ku tao.

16Togu-toguon-Ku do halak na mapitung bani dalan na so ongga tinandani, bobaan-Ku do sidea bani dalan na so ongga binotohni, paubahon-Ku do hagolapan na ilobei ni sidea gabe haliharon, anjaha dalan na marjuntul-juntul gabe tanoh na rata. Ai ma na sihol bahenon-Ku anjaha seng anjai lupahonon-Ku ai.

17Maningon surut do hupudi anjaha tarbador sagala na martenger ni uhur bani gana-gana na niuhir, na mangkatahon bani gana-gana na tinuang, “Nasiam do Naibatanami.”

Jahowa do Sipaluah bani Bangsa-Ni

18Nasiam na nengel, tangar ma, anjaha nasiam na mapitung, mangkawah ma ase marpangidah nasiam!

19Ise do na pitung anggo lang juakjuak-Ku, atap na nengel songon suruhan-Ku na Husuruh in? Ise do na pitung songon na Huhaporsayai in, atap na pitung songon juakjuak ni Jahowa?

20Tongon, buei do na nididahmu, tapi lang iparimbagaskon ho, buha do pinggolmu, tapi seng ibogei ho.

21Iharosuhkon Jahowa do, halani hapintoron-Ni, patimbulhon anjaha pasangapkon titah-Ni.

22Tapi on do sada bangsa na nirampok ampa na nirampas; ganup do sidea targari ibagas liang, anjaha iponopkon ibagas tutupan; gabe sisorohon do sidea seng dong na paluahkon, gabe sirampason, anjaha seng dong na mangkatahon, “Paulak!”

23Ise i tongah-tongahnima na manangihon hata ai, anjaha na marimbagaskon anjaha na mardiateihon ai bani panorang na roh?

24Ise do na mambere Jakob bani siparrampas anjaha Israel bani halak panamun? Ai lang Jahowa do, halani mardousa hita hu Bani? Seng ra sidea mardalan bani dalan-Ni, anjaha seng itangihon sidea titah-Ni.

25Halani ai iuseihon do bani sidea gara ni ringis-Ni, ampa jobu ni hamunsuhon; ai ma na mambahen gara sidea inggot, tapi lalab do seng iarusi; tapi seng iparuhurhon ai.


  Share Facebook  |  Share Twitter

 <<  Yesaya 42 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel