Dual Panel1Ise do porsaya bani na pinabogeihon bennami? Anjaha tangan ni Jahowa bani ise do ai talar?
2Dulas do ia tubuh songon taruhup i lobeini, songon tunas hun tanoh dorging-dorging, seng dong hatunggungon bani atap hamuliaon, ase ikawahkon hanami ia, anjaha seng dong hajengesonni ase iharosuhkon hanami ia.
3Ipahiri anjaha isimbili jolma do ia, dalahi na somal mandagei sitaronon ampa naborit do ia; iponopkon halak do bohini dompaksi, ipahiri do ia anjaha seng masuk hira ia bennami.
4Tongon do naboritta iusung, anjaha hadoyukonta iporsan; tapi nini uhurta, Naibata do na maminsang, mamukul ampa na mangarsik-Si.
5Hape halani panlanggaronta do ia hona pantom, binahen ni hajahatonta do Ia ugahan. Tampei hu Bani do pinsang-pinsang parhiteian ni damei banta, anjaha binahen ni ugah-Ni malum iahap hita.
6Haganup do hita kahou songon biribiri, ganup do hita marsitohu dalanni; tapi hajahaton ni hita haganup do ihonahon Jahowa bani.
7Iarsik do Ia, tapi ipaunduk do diri-Ni seng ibuha pamangan-Ni; songon biribiri na tinogu hu panayatan, songon anak ni biribiri na sip i lobei ni na marrasipsi, sonai do seng ibuha pamanganni.
8Marhitei pangarsikon ampa uhum do Ia iayob, anjaha na masa bani, ise ma na mamingkirhon ai? Tongon, imasabkon do ia hun tanoh ni halak na manggoluh, anjaha halani panlanggaron ni bangsang-Ku do mangonai hu bani pinsang-pinsang.
9Rapkon halak parjahat do ibahen tanoman-Ni, anjaha rapkon halak sihorjahon na masambor do ia sanggah matei, age pe seng dong na jahat ihorjahon, anjaha seng dong tipu ibagas pamangan-Ni.
10Tapi iharosuhkon Jahowa do parropukni ai mandagei na maborit. Dob na binere ni ai hosah-Ni bahen galangan pardearan, idahon-Ni ma ginompar anjaha roh ganjangni ari-arini, anjaha saud sura-sura ni Jahowa marhitei tangan-Ni.
11Dob na maluah tonduy-Ni humbani halojaon, idahon-Ni ma na pasabou uhur-Ni; buei do halak pintoran ni juakjuakku na pintor in marhitei habotohon-Ni; ai dousa ni sidea Ia do na mamorsan.
12Halani ai, buei do halak berehononku gabe rupei-Ni, anjaha marbagi taban-taban Ia rap pakon halak na markuasa, halani na binere-Ni ai hosah-Ni hu hamatean, anjaha tarhira Ia bani halak parjahat, halani na niusung-Ni dousa ni buei halak, anjaha iapiti halak parjahat.