Dual PanelIpabali Halak Pardousa, Ijalo Halak na Tarpilih
1Sirsir do Ahu pindahan ni halak, na so sungkun-sungkun Bangku, sirsir do Ahu jumpahan ni halak na so mangindahi Ahu. Ningku do dompak bangsa na so mandilo goran-Ku, “Ijon do Ahu, ijon do Ahu!”
2Hupaherbang do tangan-Ku ganup ari bani bangsa na manendel, na mardalan bani dalan na so madear, na mangihutkon rosuh ni uhurni sandiri,
3Hubani bangsa na pagara ringis-Ku tongtong, na manggalang ibagas pohon, anjaha na manutung dahupa i atas batu bata,
4na hundul bani tanoman, na marborngin ibagas liang, na mangankon gulei babuy, anjaha kuah ni sipanganon sihagigihononkon do ibagas hudon ni sidea;
5na mangkatahon, “Padaoh dirimu humbangku, ulang dohori ahu, ai ahu do na papansing ho.” Ningon gabe timus do sidea ibagas igung-Ku, gabe apuy na gara tongtong.
6Tonggor ma, tarsurat do i lobeihu, “Seng anjai sip Ahu, tapi sai luluhonon-Ku do, tongon, balaskonon-Ku do bani abingan ni sidea,
7hajahaton ni sidea ai ampa hajahaton ni ompung ni sidea, nini Jahowa; halani manutung dahupa sidea i atas dolog anjaha ipahiri Ahu i atas ni buntu-buntu, halani ai suhatkonon-Ku do bani abingan ni sidea upah domu bani pambahenan ni sidea ai.”
8Sonon do hata ni Jahowa, “Songon parsahap ni halak, anggo adong ope bahni ibagas buah anggur: Ulang ambukkon in, dong ope pasu-pasu ijin, sonai do bahenon-Ku, halani juakjuak-Ku, seng parsedaon-Ku sidea ganup.”
9Parohon-Ku do ginompar humbani Jakob, ampa sada halak sitean dolog-Ku humbani Juda; na pinilih-Ku do manean tanoh in, anjaha juakjuak-Ku marianan ijin.
10Gabe panggagatan ni biribiri do Saron, anjaha habungan Akor gabe panggompangan ni lombu bani bangsang-Ku, na pindah-pindah Bangku.
11Tapi hanima, sitadingkon Jahowa, na lupa bani dolog-Ku na pansing in, na parsirsirhon meja bani sisombahon Gad, anjaha na manggalangkon galangan siinumon bani sisombahon Men,
12ondoskonon-Ku do hanima bani podang, anjaha ganup hanima maningon tunduk i panayatan; halani sanggah dilo-dilo Ahu, seng marbalos hanima, sanggah marsahap Ahu, seng itangihon hanima, tapi ihorjahon hanima do sogam ni uhur-Hu, anjaha ipilih hanima na so Huharosuhkon.
13Halani ai sonon do hata ni Tuhan Jahowa, “Tonggor ma, mangan do juakjuak-Ku, tapi loheian do hanima, tonggor ma, minum do juakjuak-Ku, tapi horahan do hanima; tonggor ma, marmalas ni uhur do juakjuak-Ku, tapi bador do hanima.
14Tonggor ma, marolob-olob do juakjuak-Ku halani malas ni uhurni, tapi hanima tangis ma halani horu ni uhur, anjaha doruh-doruh halani uhur na maseda.”
15Tadingkononnima ma gorannima bani halak na Hupilih gabe hata sipakeion mamurai, “Sai ibunuh Tuhan Jahowa ma ho songon sidea.” Tapi anggo juakjuak-Ku diloon do sidea marhitei goran na legan,
16ase atap ise na mamasu-masu dirini i tanoh on, pasu-pasuonni ma dirini marhitei Naibata na sintong in, anjaha atap ise na marbija i tanoh on, marhitei goran ni Naibata na sintong in ma ia marbija; halani domma lupa humbagas uhur hasosakan na dob salpu, anjaha lingod ai humbani matang-Ku.
Bagah-bagah Pasal Tanoh na Baru
17Tongon, tonggor ma, Ahu manompa langit na baru pakon tanoh na baru, anjaha seng be ingaton na parlobei in, barang puho ibagas uhur.
18Tapi marmalas ni uhur anjaha marolob-olob ma hanima ronsi sadokah ni dokahni marhitei na Hutompa ai; ai tonggor ma, Ahu do manompa Jerusalem gabe parolob-oloban, anjaha bangsa pangisini gabe malas ni uhur.
19Marolob-olob do Ahu mangidah Jerusalem, anjaha marmalas ni uhur mangidah bangsang-Ku, seng tarbogei be ijai sora na tangis-tangis, atap sora na doruh-doruh.
20Seng dong be ijai dakdanak siotik umur, atap na matua na so gok ari-ari ni goluhni; ai dakdanak ope na matei saratus tahun umurni, anjaha pardousa iuhum bani na marumur saratus tahun.
21Pajongjongon ni sidea do rumah anjaha iiankon, suanon ni sidea do hayu anggur anjaha ipangan buahni.
22Seng pajongjong rumah sidea, gabe halak na legan mangiankon, seng manuan sidea, gabe halak na legan mangankon. Songon umur ni hayu, sonai do umur ni bangsang-Ku, anjaha na Hupilih ai, panganon ni sidea do na hinalojahon ni tanganni.
23Seng soya-soya sidea marhorja, seng tubuhan anak ase podas matei; ai ginompar pinasu-pasu ni Jahowa do sidea, anjaha ginomparni rap do pakon sidea.
24Lape sidea mardilo domma Hubalosi, marsahap ope sidea domma Hutangihon.
25Sorigala pakon anak ni biribiri rap manampal; singa manggagat na sinabi songon lombu, anjaha ulog mangankon orbuk; seng dong be na manjahati atap na parsedahon bani sab dolog-Ku na pansing in, nini Jahowa.