Dual PanelPandiloon bani si Jona ampa Parporusni
1Dob ai roh ma hata ni Jahowa hubani si Jona, anak ni si Amitai, nini,
2“Bingkat ma ho laho hu Ninive, huta na banggal ai, anjaha martingting ma ho dompak huta ai; ai domma das Bangku pasal hajahaton ni sidea.”
3Jadi bingkat ma si Jona laho maporus hu Tarsis hun lobei ni Jahowa. Tuad ma ia hu Joppe, anjaha jumpahsi ma ijai kapal na sihol laho hu Tarsis, igalar ma ongkosni, dob ai masuk ma ia hubagas, laho marlayar pakon sidea hu Tarsis, maporus hun lobei ni Jahowa.
4Tapi iparoh Jahowa ma logou na gogoh hu laut ai, gabe margilumbang ampa marampilaos ma laut ai, gabe laho-laho maripuk ma kapal ai.
5Jadi mabiar ma parkapal ai, anjaha ganup ma marsidilo naibatani bei; ipanggijigkon sidea ma parugas-parugas na adong i kapal ai hubagas laut laho pahampungkon namin. Tapi anggo si Jona domma tuad hu kamar partoruh ni kapal, domma ipapodom bani anjaha sinok tumang.
6Dob ai roh ma kapiten ni kapal ai bani, nini ma dompaksi, “Aha do na masa bam, ase modom-modom ho? Puho ho, dilo Naibatamu, andohar marulak-ulakan uhur-Ni mangidah hita, ase ulang magou hita.”
7Dob ai nini sidea ma samah sidea, “Baen, marruji-ruji ma hita ase ibotoh hita atap halani ise do ase sogop parmaraan on banta.” Jadi marruji-ruji ma sidea, gabe hona ma si Jona.
8Dob ai nini sidea ma hu bani, “Patugah ma bennami, ise do siparsalah ase sogop parmaraan on banta? Aha do horjamu? Roh hunja do ho? Partanoh ja do ho? Anjaha halak aha do ho?”
9Jadi nini ma dompak sidea, “Halak Heber do ahu, anjaha Jahowa sitompa langit do huhabiari, Ia do sitompa laut ampa darat.”
10Mabiar tumang ma halak ai, jadi nini sidea ma dompaksi, “Ai aha adong ibahen ham?” Ai ibotoh halak ai ma, na maporus do hape ia hun lobei ni Jahowa, humbani na dob pinatugahni ai.
11Nini sidea ma hu bani, “Aha ma sibahenonnami bamu, ase minop laut in i lobeita?” Ai lambin parahni do laut ai.
12Nini ma dompak sidea, “Angkat nasiam ma ahu lanjar gijigkon nasiam hubagas laut in, ase minop laut in i lobei nasiam. Ai hubotoh, halani ahu do ase roh logou na parah on bani nasiam.”
13Dob ai igogohkon halak ai ma namin manlugahon kapal ai hu pasir, tapi seng tolap; ai lambin jobuni do laut ai dompak sidea.
14Jadi dilo-dilo ma sidea dompak Jahowa, nini ma, “Ale Jahowa, ulang ma lopas Ham hanami magou halani hosah ni halak on, anjaha ulang ma marsapata bahen Ham bennami daroh na so marpipot, ai ibahen Ham do ale Jahowa, domu hubani harosuh ni uhur-Mu.”
15Dob ai iangkat sidea ma si Jona lanjar igijigkon hubagas laut ai. Jadi soh ma laut ai humbani na gunsang ai.
16Jadi mabiar tumang ma halak ai mangidah Jahowa; manggalang ma sidea bani Jahowa, anjaha marbagah-bagah bei Bani.
17(2-1) Dob ai iparoh Jahowa ma sada dengke na banggal laho mamondut si Jona, jadi ibagas bituha ni dengke ai ma si Jona, tolu ari tolu borngin.