Dual PanelPanonggoran na Patoluhon: Halak Sijolom Tali Sibar-sibar
1(2-5) Dob ai mangkawah ma use ahu dompak datas, anjaha tonggor ma; sada dalahi jolom bani tali sibar-sibar ibagas tanganni.
2(2-6) Dob ai ningku ma, “Laho huja ham?” Nini ma mambalosi ahu, “Laho manibar Jerusalem, laho mangidah barang sadiha do bolagni anjaha sadiha do ganjangni.”
3(2-7) Jadi tonggor ma, roh ma malekat na marsahap pakon ahu hinan, anjaha roh ma homa sada malekat na legan manjumpahkonsi,
4(2-8) anjaha nini ma dompaksi, “Ne ma, hatahon ma hubani anak garama na ijai ai. Gabe ianan na buha ma Jerusalem halani hinabuei ni jolma ampa pinahan na i tongah-tongahni.
5(2-9) Ai Ahu do,” nini Jahowa, “gabe tembok apuy inggot huta ai, anjaha Ahu do gabe hamuliaon i tongah-tongahni.”
Naibata i Tongah-tongah ni Bangsa-Ni
6(2-10) “Podas! Podas! Lintun ma hanima hun tanoh par Utara,” nini Jahowa, “ai humbani deisa na ompat in do sihol patumpuon-Ku hanima,” nini Jahowa.
7(2-11) “Podas, maporus ma hu Sion, hanima na marianan rap pakon boru Babel.”
8(2-12) Ai sonon do hata ni Jahowa Zebaot pasal bangsa-bangsa na mangayob hanima, “Barang ise na manjamah hanima, anak ni matani do na jinamahni ijai.
9(2-13) Tonggor ma, mardas tangan ma Ahu bani sidea, ase gabe taban-taban sidea bani halak na pinarjabolon ni sidea na sain dokah,” ase ibotoh hanima, paboa Jahowa Zebaot do na marsuruh ahu.
10(2-14) “Marolob-olob anjaha marmalas ni uhur ma ho, ale boru Sion, ai tonggor ma, na roh ma Ahu marianan i tongah-tongahmin,” nini Jahowa.
11(2-15) Jadi buei ma bangsa na pasadahon dirini bani Jahowa bani ari ai, gabe bangsa-Ni ma sidea, anjaha marianan ma sidea i tongah-tongahmin, ase ibotoh ho, paboa Jahowa Zebaot do na manuruh ahu marayak ho.
12(2-16) Jadi ainon ni Jahowa ma use Juda bahen parbagianan-Ni i tanoh na mapansing in, anjaha pilihon-Ni ma use Jerusalem.
13(2-17) Sip ma ganup dunia on i lobei ni Jahowa! Ai domma hehe Ia humbani ianan hapansingon-Ni ai.