Dual PanelPanonggoran na Paualuhkon: Gareta na Ompat
1Dob ai mangkawah ma use ahu dompak datas, anjaha tonggor ma, ompat gareta roh hun holangkolang ni dua dolog; ia dolog ai humbani tombaga do.
2Bani gareta na parlobei adong do huda sigerger, bani gareta na paduahon huda sibirong,
3bani gareta na patoluhon huda silopak, bani gareta na paompatkon huda sibolang.
4Dob ai ningku ma bani malekat na marsahap pakon ahu ai, “Ai aha do arti ni ai, ale tuanku?”
5Jadi nini malekat ai ma mambalosi ahu, “Na bingkat do sidea hu deisa ni langit na ompat in, dob mangadap sidea hu lobei ni Tuhan sigomgom ganup tanoh on.”
6Gareta na marhuda sibirong ai laho dompak tanoh na hampit utara, na lopak ai laho dompak tanoh na hampit hapoltakan, sibolang ai dompak tanoh na hampit dangsina,
7anjaha sigerger ai laho dompak tanoh na hampit hasundutan. Sanggah na roh ai huda ai laho maniari tanoh on, nini ma, “Laho ma, lioti hanima ma tanoh on!” Jadi ilioti sidea ma tanoh on.
8Dob ai idilohon ma hu bangku, “Tonggor ma, na laho dompak tanoh na hampit utara ai, ai ma na pahombun ringis-Ku i tanoh na hampit utara ai.”
Sortali na Bani si Josua; Tugah-tugah Pasal Tumbor
9Dob ai roh ma hata ni Jahowa hu bangku, sonon,
10“Jalo ma sibere-bere humbani halak na tarbuang, humbani si Heldai, si Tobia ampa humbani si Jedaya na dob mulak hun Babel; lanjar laho ma ho bani ari ai hu rumah ni si Josia, anak ni si Sepanya.
11Jalo ma humbani sidea pirak ampa omas, anjaha pauli ma sada sortali anjaha nahkon ma ai bani ulu ni si Josua, anak ni si Josadak, sintua ni malim ai,
12anjaha hatahon ma hu bani, ʻSonon do hata ni Jahowa Zebaot, “Tonggor ma, sada dalahi na margoran si Tumbor. Bani iananni do martumbor anjaha ia do na paulihon rumah ni Jahowa.”
13Ia do tongon na paulihon rumah ni Jahowa; anjaha ia do sijujung hamuliaon; hundul anjaha manrajai do ia bani paratasni. Adong do sada malim i lambung ni paratasni; anjaha masa do pangarusion na mardamei-damei i tongah-tongah ni sidea na dua ai.
14Ia sortali ai tading do ai i rumah ni Jahowa, bahen pardingatan bani si Heldai, si Tobia, si Jedaya ampa si Josia anak ni si Sepanya.
15Roh do homa halak humbani tanoh na daoh mangurupi laho paulihon rumah ni Jahowa, ase ibotoh nasiam, Jahowa Zebaot do na marsuruh ahu bani nasiam. Maningon jadi do on, anggo sintong itangihon nasiam sora ni Jahowa, Naibata nasiam.”