Dual PanelBagah-bagah Hatuahon
1Dob ai roh ma hata ni Jahowa Zebaot hu bangku,
2“Sonon do hata ni Jahowa Zebaot, ʻSimburu tumang do Ahu mangkopkop Sion, anjaha gila tumang do uhur-Hu mangkopkop sidea.ʼ
3Sonon do hata ni Jahowa, ʻMulak ma Ahu use hu Sion anjaha marianan i tongah-tongah ni Jerusalem, anjaha targoran ma Jerusalem: Huta na bujur, anjaha dolog ni Jahowa Zebaot: Dolog Na Pansing.ʼ
4Sonon do hata ni Jahowa Zebaot, ʻManingon hundul do use dalahi na matua ampa naboru na matua i alaman ni Jerusalem, ganup marsijolom tungkotni bei ibagas tanganni halani tuani.
5Anjaha alaman ni huta ai gok dakdanak dalahi ampa dakdanak naboru na marguro-guro i alaman ai.ʼ
6Sonon do hata ni Jahowa Zebaot, ʻAnggo halongangan ai bani pangidah ni simasima ni bangsa on bani panorang on, mintor halongangan ma gakni ai Bangku?ʼ Nini Jahowa Zebaot.
7Sonon do hata ni Jahowa Zebaot, ʻTonggor ma, Ahu ma paluahkon bangsang-Ku hun tanoh na hampit hapoltakan ampa hun tanoh na hampit hasundutan,
8anjaha Ahu mamboan sidea mulak marianan i tongah-tongah ni Jerusalem; jadi gabe bangsang-Ku ma sidea anjaha gabe Naibata ni sidea ma Ahu ibagas hasintongan ampa hapintoron.ʼ
9Sonon do hata ni Jahowa Zebaot, ʻPahinsah hanima ma tangannima, hanima na mambogei hata on, bani panorang on humbani pamangan ni nabi-nabi, bani ari ipasukkon onjolan ni rumah ni Jahowa Zebaot, ase boi ipauli rumah ai.
10Ai i lobei ni ari on seng dong manjalo upah halak atap upah aha pe humbani pinahan; sonai homa bani halak na marhujai-hujon seng dong hahorason i lobei ni munsuh ai; ai marsilawanan do jolma samah jolma Hubahen.
11Tapi anggo sonari seng be bahenon-Ku hubani simasima ni bangsa on, songon sapari,ʼ nini Jahowa Zebaot,
12ʻAi suankonon-Ku ma damei: Bereon ni hayu anggur ma buahni, tanoh on mambere gogohni, anjaha langit ai mambere namurni; bereon-Ku ma ganupan ai bani simasima ni bangsa on gabe parbagiananni.
13Hanima ginompar ni Juda ampa Israel, songon hanima na dob gabe bangsa sibura-buraonkon na saindokah i tongah-tongah ni bangsa-bangsa, sonai ma hanima gabe pasu-pasu tumpakon-Ku. Ulang mabiar, tapi pahinsah hanima ma tangannima.ʼ
14Ai sonon do hata ni Jahowa Zebaot, ʻSongon na dob Husurahon mambahen roh hamagouan bannima, sanggah na pinaroh ni ompungnima ringis-Hu,ʼ nini Jahowa Zebaot, ʻanjaha seng marpangulaki uhur-Hu,
15sonai do sura-surang-Ku bani panorang on laho mambahen na madear bani Jerusalem ampa bani ginompar ni Juda; ulang mabiar.
16Tapi on ma na maningon sibahenonnima: Ganup ma mangkatahon hata hasintongan bani hasomanni anjaha idalankon uhum na bonar bani horbangannima.
17Ulang ma ipingkiri atap ise ibagas uhurni hamagouan bani hasomanni, anjaha ulang ma iharosuhkon hanima na so sintong, ai magigi do uhur-Hu mangidah na sonai ai ganup,ʼ” nini Jahowa.
18Dob ai roh ma hata ni Jahowa Zebaot hu bangku,
19“Sonon do hata ni Jahowa Zebaot, ʻParpuasaon bani bulan ompat, bani bulan lima, bani bulan pitu, bani bulan sapuluh gabe malas ni uhur do ai ampa hasonangan bani ginompar ni Juda, nai ma tongon, gabe pesta parolob-oloban. Halani ai haholongi hanima ma hasintongan ampa damei!ʼ
20Sonon do hata ni Jahowa Zebaot, ʻNa roh ope bangsa-bangsa ampa pangisi ni huta-huta na bolon,
21pangisi ni huta na sada laho bani na sada nari, mangkatahon: Laho ma hita marsombah bani Jahowa, mangindahi Jahowa Zebaot!ʼ Ahu pe laho do hujai.”
22Tongon tene, roh do magira buei bangsa sonai homa bangsa na gogoh mangindahi Jahowa Zebaot i Jerusalem anjaha marsombah i lobei ni Jahowa.ʼ
23Sonon do hata ni Jahowa Zebaot, ʻBani ari ai tangkapon ni sapuluh halak humbani bangsa na marbagei-bagei sahap ai ma sada halak Jahudi bani sisi ni hiouni anjaha ihatahon, “Rap ma hita laho, ai domma ibogei hanami, Naibata do hasoman nasiam.” ʼ