Dual PanelHamonangan Marimbang Munsuh
1Pangungkabon: Roh do hata ni Jahowa dompak tanoh Hadrah anjaha sogop i Damaskus. Ai Jahowa do simada huta-huta na i Aram ampa ganup marga ni Israel,
2sonai homa Hamat, na marbalog hujai, Tirus ampa Sidon, age pe pentar tumang sidea.
3Tongon, ipauli Tirus do bani sada benteng anjaha ipajunjun bani pirak songon orbuk ampa omas songon hubang na i alaman;
4tapi tangar ma, tabanon ni Jahowa ma huta ai, sampakkonon-Ni ma bentengni ai hu laut, anjaha bois ma huta ai panganon ni apuy.
5Idahon ni Askalon ma ai, gabe mabiar; age Gasa, jadi hitir ma; Ekron pe maningon bador do ia pasal siarapkononni ai. Maningon masab do raja hun Gasa, anjaha seng marpangisi ia Askalon.
6Anak salong-salongan mando marianan i Asdod, anjaha masabkonon-Ku ma pangenjengon ni halak Palistim.
7Buaton-Ku ma daroh ai hun pamanganni ampa hasamboron na hinorjahon ni sidea ai hun holangkolang ni iponni; gabe simasima do age sidea bani Naibatanta, gabe songon sada marga do sidea i Juda, anjaha Ekron gabe songon halak Jebusi.
8Ahu sandiri mangawal bani rumah-Ku dompak halak na marhujai-hujon; seng dong be sipanosak-nosak na mandorab sidea, ai matang-Ku sandiri do nuan mangidah ai.
Raja ni Sion
9Marmalas ni uhur tumang ma ho, ale boru Sion, marolob-olob ma ho, ale boru Jerusalem! Tonggor ma, na roh do Rajamin marayak ho; parpintor anjaha siparmonang do Ia. Toruh do uhur-Ni anjaha mangajak halode, anak ni halode boru-boru.
10Siapkonon-Ni do gareta porang hun Efraim ampa huda porang hun Jerusalem, siapkonon-Ni do homa sior na pinakei marporang. Dob ai ambilankonon-Ni ma damei bani bangsa-bangsa, anjaha gomgoman-Ni hun laut hu laut, hun Eprat das ronsi ujung ni tanoh on.
Haluahon ampa Olob-olob
11Marhalanihon ni daroh parpadananmu paluahon-Ku do homa halak na tarbuang hun bam, humbani godung, na so marisi bah.
12Mulak ma hanima hu bentengnima, hanima na tartangkap, lompit dua do pasuangon-Ku bannima.
13Ai Husintak do Juda Bangku songon sior, anjaha Efraim do Hubahen gabe lingkitni. Diloon-Ku do anakmu, ale Sion, manlawan anakmu ale Tanoh Gorik, anjaha bahenon-Ku ma ho songon podang ni puanglima.
14Jadi talar ma Jahowa ibabou ni sidea, anjaha luar lingkit-Ni songon hilap; sompulon ni Naibata Jahowa ma tarompit anjaha bingkat ma Ia.
15Jahowa Zebaot do na mangondingi sidea, jadi monang ma sidea anjaha bois idogei batu ni umbalang; jadi inumon ni sidea ma daroh ni sidea songon anggur, gabe gok ma songon batil panggalangan, songon suhi-suhi ni anjapanjap.
16Bani ari ai urupan ni Jahowa Naibata ni sidea ma sidea, ai hulanan ni bangsa-Ni do sidea; ai songon batu intan ni sortali, sonai do maningon marsinondang sidea i tanohni.
17Tongon, dearni in anjaha jengesni in ai! Gandum ampa anggur martumbor ibahen, sonai homa anak parana ampa anak boru.