Dual Panel1Ahas putra Yotam mimiti jadi raja Yuda meneran taun katujuh belas Pekah bin Remalya ngarajaan di Israil,
2dina yuswa dua puluh taun. Calikna di Yerusalem, ngarajaanana genep belas taun. Lampahna teu hade, teu cara lampah Raja Daud karuhunna, malah midamel anu henteu kamanah ku PANGERAN Allahna,
3nuturkeun kanircaan raja-raja Israil. Malah meuncit putrana, diduruk disuguhkeun ka arca brahala, lampah anu pikagirukeun cara kalakuan bangsa-bangsa anu ku PANGERAN geus diusiran basa urang Israil mimiti rek arasup ka eta tanah.
4Ahas ngurban jeung ngukusna teh di tempat-tempat ibadah ka brahala, di puncak-puncak pasir jeung di handapeun tangkal-tangkal anu ngarunggunuk.
5Hiji mangsa Raja Resin ti Siria jeung Raja Pekah ti Israil narajang jeung ngepung Yerusalem, tapi Ahas henteu bisa dielehkeun.
6(Sabot kitu kota Elat direbut deui ku raja Edom, urang Yuda di dinya dibuburak. Ti harita saterusna Elat dicaricingan deui ku urang Edom.)
7Ti dinya Ahas ngutusan ka Raja Tiglat Pileser di Asur, badaratna, "Sim kuring sumeja pasrah sadaya-daya ka Sang Raja, seja nyuhunkeun pitulung sarehna keur diperangan ku raja Siria sareng raja Israil."
8Utusanana dibahanan perak jeung emas candak ti Bait Allah jeung ti kamar rajabrana karaton, baktikeuneun ka raja di ditu.
9Pamundut Ahas ku Tiglat Pileser ditarima, bral eta raja jengkar nyandak balad ka Damsik. Damsik karebut, Raja Resin tiwas, rahayatna dicandak ka Kir jaradi boyongan.
10Raja Ahas angkat ka Damsik seja nepangan Raja Tiglat Pileser. Di Damsik anjeunna ningali hiji altar tuluy diconto, contona dikirimkeun ka Imam Uria.
11Seug Uria nyieun altar ceples sakumaha contona. Memeh Ahas sumping geus anggeus.
12Sasumpingna ti Damsik tur altar geus anggeus,
13Ahas tuluy peupeuncitan terus diduruk dina eta altar jeung kurban kadaharan, altarna dikucuran ku getih sato kurban jeung ku cianggur.
14Ku sabab altar tambaga paranti ngurban ka PANGERAN ayana teh di antara altar anyar anu anjeunna jeung Bait Allah, eta altar ku Ahas dipindahkeun ka beulah kalereun altar anyar anu anjeunna.
15Geus kitu anjeunna nimbalan ka Uria, "Kurban beuleuman isuk, kurban kadaharan sore, sakabeh kurban beuleuman jeung kurban kadaharan sore, sakabeh kurban beuleuman jeung kurban kadaharan ti raja jeung jalma rea, kitu deui sakabeh kurban inuman ti jalma rea, kudu dikurbankeunana dina ieu altar kami anu gede. Sato-sato kurban getihna kucurkeun kana eta. Ari altar tambaga mah ngan pikeun kaperluan kami bae, pikeun menta pituduh ti para arwah."
16Sakumaha timbalan raja ku Uria dilampahkeun.
17Jeung deui Raja Ahas ngakatan bagian papadatian tambaga paragi Bait Allah tea, paso-pasona diangkat. Tatalagaanana ge diangkat tina dua belas sasapian tambaga anu mungguna, diteundeun dina dadampar batu.
18Jeung pikeun nyenangkeun panggalih raja Asur, hateup anu ngauban singgasana raja di jero Bait Allah ku Ahas dikakat, sarta lawang anu ngawungkul pikeun raja lebet ka Bait Allah ku anjeunna dibongkar.
19Carita Raja Ahas salian ti eta aya dina Kitab Babad Raja-raja Yuda.
20Ahas pupus, dikurebkeun di makam karajaan di Kota Daud, tuluy diganti ku Hiskia putrana.