Dual Panel1PANGERAN nimbalan ka Musa,
2"Kemah Tepangan PANGERAN teh adegkeun dina tanggal hiji bulan kahiji.
3Peti Perjangjian anu dieusi Sapuluh Timbalan tea simpen di eta Kemah, halangan ku lalangse ti hareupna.
4Meja ka jerokeun, parabotna tatakeun. Suku palita asupkeun, palita-palitana terapkeun.
5Altar emas pangukusan teundeun hareupeun Peti Perjangjian, lawang Kemahna alingan ku lalangse.
6Altar kurban beuleuman teundeun hareupeun Kemah.
7Jolang paranti kukumbah teundeun antara Kemah jeung altar, eusian cai.
8Jieun palataran Kemah, kubeng, lawangna alingan ku lalangse.
9Kemah jeung paparabotanana istrenan, lisahan ku minyak suci supaya jadi suci.
10Tuluy altar jeung paparabotanana istrenan, lisahan ku minyak suci, tanwande jadi suci.
11Pon kitu jolang paranti kukumbah jeung alasna, sucikeun saperti kitu.
12Harun jeung anak-anakna bawa ka lawang Kemah, tuluy sina mandi suci.
13Harun dangdanan ku pakean imam, lisahan sangkan jadi suci, layak jadi imam anu ngawula ka Kami.
14Anak-anakna kamejaan,
15tuluy lisahan saperti bapana, supaya jaradi imam ngawulaan Kami. Ieu pangistrenan bakal ngukuhkeun maranehna jeneng imam saterusna."
16Musa ngajalankeun piwarangan PANGERAN.
17Dina tanggal hiji bulan kahiji, taun kadua ti barang kaluar ti Mesir, Kemah Tepangan PANGERAN geus nangtung.
18Ku Musa geus dilantean, dipapanan, dipapalangan, tihang-tihangna geus ditangtungkeun,
19lapis-lapis Kemah beulah jero jeung tutup luarna geus diterapkeun sakumaha timbalan PANGERAN.
20Papan batu anu dua gebleg tea ku Musa geus diasupkeun ka jero Peti Perjangjian, rancatan petina geus dicorokkeun kana geugeulanganana, tutup petina geus dipasang di luhurna.
21Petina disimpen di jero Kemah, jeroeun lalangse aling-aling, jadi eta Peti Perjangjian teh dibunikeun, sakumaha dipiwarangna ku PANGERAN.
22Ari meja diteundeunna di jero Kemah teh di sisi kaler luareun reregan,
23sarta roti haturan PANGERAN ditata dina eta meja sakumaha dipiwarangna ku PANGERAN.
24Ari suku palita diteundeunna di Kemah teh di sisi kidul, paeunteung-eunteung jeung eta meja,
25sarta palita-palitana geus diseungeut di payuneun PANGERAN, sakumaha dipiwarangna ku Mantenna.
26Altar emas ku anjeunna diteundeunna di jero Kemah, hareupeun reregan,
27seug dibeuleuman seuseungitan anu arum sakumaha timbalan PANGERAN.
28Lawang kemah geus dialingan ku lalangse,
29sarta di hareupeun lalangsena Musa neundeun altar paranti kurban beuleuman jeung kurban gandum, sakumaha dipiwarangna ku PANGERAN.
30Jolang paranti kukumbah diteundeunna di antara Kemah jeung eta altar, dieusian cai.
31Musa, Harun, jeung putra-putra Harun, kudu wawasuh heula panangan jeung sampean ku cai tina eta jolang,
32samemeh lebet ka jero Kemah atawa nyampeurkeun altar, sakumaha timbalan PANGERAN.
33Palataran sakuriling Kemah jeung altar ku Musa geus dipidamel, lawang palataranana geus dialingan ku lalangse. Geus kitu sagala padamelan Musa teh beres.
34Geus kitu Kemah teh diliputan ku mega bray aya cahaya matak serab nandakeun yen PANGERAN hadir ngeusian eta Kemah.
35Ku hal eta Musa jadi teu iasa lebet.
36Ari urang Israil, samangsa-mangsa eta mega unggah ti Kemah, bral parindah masanggrahanana.
37Sapanjang eta mega tacan unggah mah maranehna tacan waka parindah masanggrahanana.
38Sapanjang maranehna ngalalakon di jalan, eta mega anu nandakeun yen PANGERAN hadir teh mun ti beurang katembong mayungan Kemah, mun ti peuting katembong ngagebur luhureun Kemah.