Dual Panel1(89-1) Lagu atikan ti Etan, urang Esrah. (89-2) Abdi salamina bade nganyanyikeun satia asih Gusti, nun Allah, salamina bade ngamashurkeun kasatiaan Gusti.
2(89-3) Abdi terang kaasih Gusti tetep salalamina kasatiaan Gusti sateguh langit.
3(89-4) Saur Gusti, "Kami geus jangji ka hiji jalma pilihan Kami; Kami geus sumpah ka Daud, abdi Kami,
4(89-5) ‘Hiji turunan maneh salawasna bakal jadi raja, tahta karajaan maneh bakal langgeng.’"
5(89-6) Satungkebing langit muji kaajaiban padamelan Gusti, nu saruci muji-muji kasatiaan Gusti, nun PANGERAN.
6(89-7) Di sawarga teu aya nu sapertos Gusti, teu aya mahluk sawarga anu nandingan Gusti.
7(89-8) Dina pasamoan mahluk-mahluk suci, Gusti pada mikagimir, sadayana alajrih ka Gusti.
8(89-9) Nun GUSTI Allah Nu Maha Kawasa, teu aya anu hebatna sapertos Gusti, Gusti satia dina sagala perkawis, nun PANGERAN.
9(89-10) Gusti murba kana kaangkaraan laut, ombakna nu ngamuk ku Gusti dilelerkeun.
10(89-11) Rahab, naga laut, ku Gusti dipaehan, diremukkeun, musuh-musuh kucar-kacir ku kawasa Gusti.
11(89-12) Langit kagungan Gusti, bumi oge kagungan Gusti, alam dunya saeusina nya Gusti anu ngagelarkeun.
12(89-13) Kaler sareng kidul Gusti anu nyiptakeun, Gunung Tabor sareng Gunung Hermon nyanyi kangge Gusti.
13(89-14) Kawasa Gusti tanpa tanding! Gusti bedas liwat saking!
14(89-15) Karajaan Gusti napak dina kaestuan sareng kaadilan, kaasih sareng kasatiaan tembong dina samudaya karya Gusti.
15(89-16) Estu bagja jalmi anu sumujud ka Gusti bari gumbira, anu hirupna dina cahaya kasaean Gusti.
16(89-17) Sadidintenna suka bungah ku karana Gusti, muji sukur ku karana piwelas Gusti.
17(89-18) Gusti maparin kaunggulan ka abdi-abdi, ku karana asih Gusti abdi-abdi tiasa unggul.
18(89-19) Gusti, nun PANGERAN, maparin papayung, Gusti, Nu Suci, Allah Israil, maparin raja ka abdi-abdi.
19(89-20) Ti kapungkur keneh, dina hiji titingalian, Gusti ngandika ka para kawula Gusti nu saratia, "Kami geus nulung hiji prajurit anu kamashur, diangkat ti tengah rahayat, sina ngadiukan tahta.
20(89-21) Abdi Kami Daud, ku Kami dijadikeun raja, geus diistrenan ku Kami ku minyak suci.
21(89-22) Salawasna baris dideudeul ku kabedasan Kami, kakawasaan Kami baris jadi kakuatanana.
22(89-23) Musuh-musuhna moal bisa ngelehkeun, nu daroraka moal bisa meunang ka manehna.
23(89-24) Kami nu baris nyasaak musuh-musuhna, Kami nu baris maehan nu ngarewaeunana.
24(89-25) Kami rek mikanyaah, rek satia ka manehna, ku Kami rek disina meunangan terus.
25(89-26) Karajaanana rek dilegakeun, ti Laut Tengah nepi ka Walungan Eprat.
26(89-27) Ngabasakeunana ka Kami, ‘Rama, Allah abdi. Ama benteng sareng panyalindungan abdi.’
27(89-28) Estu, ku Kami rek dijieun anak cikal, anu pangpunjulna ti sakabeh raja-raja.
28(89-29) Jangji Kami ka manehna salawasna bakal ditedunan, perjangjian Kami ka manehna bakal langgeng.
29(89-30) Tahtana rek dipageuhkeun sapageuh langit, ti turunanana salawasna aya bae anu pijadieun raja.
30(89-31) Tapi lamun turunanana teu nurut kana hukum Kami, hirupna teu nurutkeun parentah-parentah Kami,
31(89-32) lamun ngalanggar aturan-aturan jeung katangtuan-katangtuan Kami,
32(89-33) maranehna geus tangtu baris dihukum, baris disusahkeun ku karana kasalahanana.
33(89-34) Najan kitu kanyaah Kami ka Daud moal laas, jangji Kami ka manehna moal gingsir.
34(89-35) Perjangjian Kami ka manehna moal pegat, jangji Kami sarupa ge moal aya nu dicabut.
35(89-36) Sabab Kami geus sumpah demi kasucian Kami: pamohalan Kami jalir ka Daud!
36(89-37) Salawasna bakal aya turunanana, karajaanana baris diaping ku Kami satungtung aya keneh panonpoe.
37(89-38) Sina tetep aya saperti bulan, nu jadi saksi satia di langit."
38(89-39) Nanging Gusti bet bendu ka anjeunna, raja pilihan Gusti ku Gusti dipiceun, ditolak.
39(89-40) Perjangjian Gusti ka anjeunna dipegatkeun, makutana ku Gusti dialungkeun ka nu jeblog.
40(89-41) Kuta-kuta kotana dirugrugkeun, benteng-bentengna diburak-barik,
41(89-42) harta milikna diranjah ku nu laliwat, sarta anjeunna diseungseurikeun ku para tatangga.
42(89-43) Musuh-musuhna ku Gusti disina unggul, disina saruka bungah.
43(89-44) Anjeunna disina eleh perangna, pakarangna disina taya gunana.
44(89-45) Iteuk karajaanana ku Gusti dicandak, tahtana dibeubeutkeun kana taneuh.
45(89-46) Mangsa anomna ku Gusti disinggetkeun, dipopokan ku kahinaan.
46(89-47) Na Gusti teh bade teras nyumput bae? Bade dugi ka iraha Gusti bendu ngagugudug?
47(89-48) Mugi diemut, umur abdi teh kacida pondokna. Mugi diemut, manusa teh ku Gusti dijadikeun mahluk pana.
48(89-49) Saha pijalmieunana anu moal keuna ku ajal, anu tiasa ngejat tina alam kubur?
49(89-50) Nun PANGERAN, mana tanda kanyaah Gusti anu kapungkur teh? Mana jangji-jangji Gusti ka Daud teh?
50(89-51) Ulah lali, abdi Gusti sakieu diasorkeunana, nandangan panghina bangsa-bangsa deungeun.
51(89-52) Nun PANGERAN, raja pilihan Gusti teh dihina ku musuh-musuh Gusti! Mios ka mana ge teu weleh dinistakeun.
52(89-53) Puji PANGERAN salalanggengna! Amin! Amin!