Dual Panel1Ayeuna Yosua geus sepuh pisan. PANGERAN ngadawuh, "Ayeuna maneh geus sakitu kolotna. Padahal rea keneh tanah anu kudu direbut.
2Sakuliah tanah Pelisti jeung Gesur,
3kitu deui sakuliah tanah Awim ka kidul. (Ieu tanah ti semet Walungan Sihor anu ngawates ka tanah Mesir, terus ka kaler nepi ka wates tanah Ekron anu kaitung ka tanah Kanaan; ari raja-raja urang Pelisti maratuhna di Gasa, Asdod, Askelon, Gat jeung Ekron.)
4Terus sakuliah tanah Kanaan, tanah Meara (bogana urang Sidon), tanah Apek anu ngawates ka tanahna urang Emor;
5tanah urang Gebal, sakuliah Libanon ka wetan, ti semet Baal Gad kiduleun Gunung Hermon, nepi ka Hamat.
6Sakuliah tanah urang Sidon anu maratuh di daerah pagunungan, antara Pagunungan Libanon jeung Misrepot Maim. Di mana eta diperangan ku urang Israil, nu barogana ku Kami baris diusir sina kalaluar ti dinya. Bagi-bagikeun tanahna ku maneh ka urang Israil sakumaha timbalan Kami ka maneh.
7Ari tanah anu ieu, ayeuna bagikeun ka kaom-kaom Israil anu salapan deui sina dipiboga. Kaom Menase anu saparona deui oge bere bagian."
8Ari kaom Rubin, kaom Gad jeung kaom Menase anu saparona deui, eta mah geus dibagianan tanah ku Musa, abdi PANGERAN tea, nya eta di wetaneun Walungan Yordan.
9Wewengkonna legana nepi ka Arur (di tungtung Lebak Arnon) jeung kota nu aya di tengah-tengah eta lebak, kaasup oge sakuliah padataran luhur ti Medeba nepi ka Dibon,
10terus nepi ka wates daerah Amon, kaasup sakumna kota anu kungsi digeugeuh ku Sihon raja urang Emor, anu kalungguhanana di Hesbon.
11Ngurung oge tanah Gilad, daerah-daerah Gesur jeung Maaka, Gunung Hermon sagemblengna, jeung sakuliah tanah Basan nepi ka tanah Salka.
12Terus sakarajaan Og, turunan bangsa Repaim anu pangahirna tea, anu marentahna di Astarot jeung Edrei. Eta kabeh geus areleh, geus diusiran ku Musa.
13Tapi urang Gesur jeung urang Maaka mah ku urang Israil teh henteu diusir, araya keneh bae di Israil.
14Kaom Lewi ku Musa henteu dibagianan tanah. Lantaran geus aya dawuhan PANGERAN ka anjeunna, saur-Na maranehna mah bagianana teh tina altar PANGERAN, Allahna Israil, tina kurban-kurban anu dibeuleum.
15Sabagian eta tanah ku Musa geus dimilikkeun ka warga kaom Rubin.
16Wewengkonna legana nepi ka Arur (di tungtung Lebak Arnon), jeung kota anu aya di tengah-tengah eta lebak, kaasup oge sakuliah padataran luhur di sakurilingeun Medeba,
17tanah Hesbon katut sakabeh kota-kotana anu di tanah padataran di Dibon, Bamot Baal, Bet Baal Meon,
18Yahas, Kedemot, Mepaat,
19Kiryataim, Sibma, Seret Sahar anu ayana di hiji pasir di eta padataran.
20Bet Peor, lamping-lamping Gunung Pisga jeung Bet Yesimot.
21Kitu deui nagri-nagri di tanah padataran jeung sakuliah tanah karajaan Emor bawahan Raja Sihon anu kalungguhanana di Hesbon. Eta raja geus dielehkeun ku Musa katut bupati-bupati Midian bawahanana, nya eta Ewi, Rekem, Sur, Hur jeung Reba. Eta kabehanana kungsi marentah nagri pikeun Raja Sihon.
22Waktu urang dinya ditumpes, tukang torah anu ngaranna Balhum bin Beor tea oge dipaehan.
23Ari wates daerah kaom Rubin, di beulah kulon, nya eta Walungan Yordan. Ieu kota-kota jeung desa-desana kabeh dimilikkeun ka kulawarga-kulawarga kaom Rubin.
24Tanah anu dijangjikeun ku PANGERAN ka umat Israil teh sabagian ku Musa geus dipaparinkeun oge ka kulawarga-kulawarga kaom Gad jadi milikna.
25Wewengkonna ngurung tanah Yaser jeung sakabeh kota di tanah Gilad, sabeulah tanah Amon nepi ka Arur di wetaneun Raba.
26Eta tanah teh mimiti ti semet Hesbon nepi ka Ramat Mispe jeung Betonim, ti Mahanaim nepi ka wates tanah Lodebar.
27Di Lebak Yordan, ngurung tanah Bet Haram, Bet Nimra, Sukot jeung Sapon, sesa karajaan Sihon, raja Hesbon tea. Di beulah kulon watesna Walungan Yordan, terus ka kaler ka Talaga Galilea.
28Sakitu kabehna kota-kota jeung desa-desa anu dimilikkeun ka kulawarga-kulawarga kaom Gad. sabagian kaom Menase
29Sabagian eta tanah anu dijangjikeun ku PANGERAN ku Musa dibikeun ka saparo kulawarga-kulawarga kaom Menase, dijieun milikna.
30Wewengkonna ti semet Mahanaim ngurung tanah Basan, karajaan Og, raja Basan tea, kitu deui genep puluh desa anu di daerah Yair di tanah Basan;
31sabeulah tanah Gilad, Astarot jeung Edrei, ibukota karajaan Raja Og di Basan. Ieu bagian jadi milikna anak incu Makir bin Menase anu saparona tea.
32Kitu ku Musa dibagi-bagina tanah anu pernahna di wetaneun Yeriho peuntaseun Walungan Yordan teh. Dibikeunna basa anjeunna di tanah Moab keneh.
33Ari kaom Lewi ku anjeunna henteu dibagianan tanah. Saurna, maranehanana mah bagianana teh tina kurban-kurban, anu dikurbankeun ka PANGERAN, Allahna Israil.