Alkitab Mobile SABDA
[VER] : [TAA]     [PL]  [PB] 
 <<  1 Korintus 14 >> 

1Wali anu kita mangaliwu jaya see sangkani mamporayang yununta. Pasi anu kita mamporani kojo sora to nawaika i Nosa Mapasing kita to mangaya, taa manto’o sora to nawaika kita mawali to pantuntu tuntu i mPue Allah.

2Apa i semasema to magombo ri raya basa to yusa, tau etu si’a yununya napogomboka, i Pue Allah semo, apa tare yununya to mangansani gombonya etu. Tau etu yako ri kuasa i Nosa Mapasing naka pei magombo mangkonong anu to taa nansani nto lino.

3Pei to pantuntu tuntu i mPue Allah mampogomboka yununya semo. Wali gombonya etu mampakaroso pasi mampaposiaka pasi mampakalindo raya nu yununya etu.

4Wali tau to magombo ri raya basa to yusa, tau etu mampakaroso raya to si iaja. Pei to pantuntu tuntu i mPue Allah, tau etu mampakaroso samparia raya ntau to mangaya.

5Wali aku masanang ane komi samparia nukurang magombo ri raya basa-basa to yusa to taware igurumu, pei to sanang-sanang ane komi mamporata tuntu i mPue Allah. Apa to pantuntu tuntu i mPue semo to bae-bae batuanginya pei tau to magombo ri basa-basa to yusa. Apa tau to magombo ri basa-basa to yusa etu taa mampakaroso raya ntau to mangaya ane ia taa mampakanasaka sira batuangi nu gombonya etu.

6Wali a’i-a’i, ane rapanya aku rata ri oyo ngkomi pei magombo ri basa-basa to yusa, ane ewa see kesaa batuanginya resi komi? Tare kojo batuanginya. Pei ane aku mamporata resi komi anu to napaponsanika i mPue aku, bara mampakanasaka komi tuntu i mPue Allah, bara mamporata tuntuNya, bara mampotundeka komi tuntuNya, ane ewa see bae batuanginya resi komi.

7Wali rapanya ewa anu to taa la’u nosanya pei to mamoni, ewa suling pasi gambus. Ane suling etu taa kono raika mangantawuis pasi ane gambus etu taa kono raika mangantingko, wimba danaika ntau mangansani bara nyanyi to imba to raponyanyika.

8Pasi ewa see seja tarompet to ratawuis mampaponsanika tentara daratamo temponya mampakaroso dayau mamusu. Wali ane tarompet etu pei taa kono raika mangantawuis, tare tentara to mampakaroso yau mamusu.

9Wali ewa see seja komi. Apa ane komi ojo magombo mangampake basa to taa nansani nsa’e, wimba danaika nu yunu ngkomi mangansani batuanginya gombo ngkomi etu? Ane ewa see komi ojo mampogomboka rao.

10Kamonsonya ri lino si’i basa ntau mpangaya-ngaya, pasi tare basa ntau to tare batuanginya.

11Pei ane aku taa manasangku batuanginya gombo ntau to magombo etu, tau etu mampobuuka aku ewa tau to rata ri lipu ntau to yusa. Pasi aku mampobuuka ia ewa see seja apa kami taa masinsani.

12Wali ewa see seja komi ane ojo magombo ri raya basa to yusa. Komi rani kojo mangarata sora yako resi i Nosa Mapasing. Wali ane ewa see, to taotao komi mamporani sora to maya rapake mampakaroso raya ntau samparia to mangaya i Pue.

13Wali see naka tau to magombo ri raya basa to yusa to taotao makai-kai resi i Pue mamporapi kapande see nakurang mampakanasaka yununya batuanginya gombonya etu.

14Apa ane aku makai-kai ri raya basa to yusa, tempo etu rayangku makai-kai, si’a pampobuukangku. Wali gombo to kuto’o etu tare batuanginya apa taa manasa resi aku.

15Wali ane ewa see kesaa to dakuika? Ewa si’i dakuika. Aku damakai-kai magombo ri raya basa to yusa to nawaika i Nosa Mapasing aku, pei aku damakai-kai seja magombo ri raya basa to nansani nsa’e. Pasi ewa see seja ri tempo manyanyi mangabarong i Pue Allah. Tempo etu aku damanyanyi ri raya basa to yusa pei aku damanyanyi seja ri raya basa to nansani nsa’e.

16Wali ane rapanya komi mangabarong i Pue Allah ojo magombo mangampake basa to yusa to nawaika i Nosa Mapasing komi, wimba danaika ntau to mangandonge to taa manasanya gombo etu? Tau etu taa nansani damanganto’o, “Amin,” tempo komi manganto’oka i Pue Allah tarima matao.

17Wali nempo matao kojo pokai-kai ngkomi manganto’oka i Pue Allah tarima matao, pokai-kai etu taa mampakaroso raya nsa’e.

18Wali aku manganto’oka i Pue Allah tarima matao apa aku semo to boro-boros pei komi samparia magombo ri raya basa-basa to yusa.

19Pei ane tempo kasiromu ntau to mangaya i Pue, tempo etu aku mangepe to tao-tao aku nempo ojo lima ntaa gombongku ri raya basa to nansani nsa’e sakowa sampuyu nsowu ntaa gombongku ri raya basa to yusa to taa nansani nsira.

20Wali a’i-a’i, ne’emo mampobuuka ewa naika ngana mayunu. Pobuuka ewa naika ntau bose tu’a. Pei ane mangkonong palaong to maja’a, to tao-tao mampolengkoka lengko nu ana kodi to taa nansani mangika palaong to maja’a etu.

21Ane ri rayanya porenta i mPue Allah re’e ratulis ewa si’i, to’onya, “I Pue manganto’o, ‘Aku damampogomboka to Israel mangampake nganga ntau to magombo ri basa-basa to yusa, pasi mangampake nganga ntau to si’a to Israel. Pei nempo Aku mampogomboka sira ewa wetu, sira taa damampodongeka gombongKu etu.’” Etu semo gombo to ratulis tempo owi.

22Wali kapande ntau magombo ri raya basa-basa to tawa igurunya, kapande etu naka pei nawaika i Nosa Mapasing tau etu see mawali tondong resi tau to tawa mangaya i Pue. Si’anya tondong resi tau to mangaya. Pei kapande mamporata tuntu i mPue Allah, etu semo tondong resi tau to mangaya, si’a resi tau to tawa mangaya.

23Wali rapanya komi samparia to mangaya ri lipu ngkomi, ane komi siromu pasi samparia komi paka magombo ri raya basa-basa to yusa, ane ewa see kesaa damawali ane rata tau to yusa? Ane rata tau to tawa mangansani mangkonong sora i Nosa Mapasing etu, bara rata tau to tawa mangaya, pei mangandonge gombo ngkomi to mpangaya-ngaya etu, wimba to danato’o ntau to rata etu? Sira damanganto’oka komi paka nawando yau.

24Pei ane komi samparia mamporata tuntu i mPue Allah pei rata tau to tawa mangaya bara to tawa mangansani mangkonong sora etu, kesaa to damawali? Tau etu damangandonge gombo ngkomi etu panewa ia damanasa ia tau madosa, apa re’e anu to magombo ri rayanya manganto’o, “Gombo ntau si’i mangkonong aku semo.”

25Wali ewa wetu naika i mPue Allah mampakanasaka samparia pampobuuka to rawuni ri raya ntau. See naka tau etu damadungku apa majea pasi ia damampue mampakabae i Pue Allah pei manganto’o, “Monso pu’u i Pue Allah re’e ri oyo ngkomi.”

26Wali ane ewa see, kesaa to masipato daraika tempo komi siromu damampue mampakabae i Pue Allah? Ewa si’i daraika. Tempo komi siromu sindara-ndara, tempo etu re’e komi to damamponyanyika nyanyi to mangabarong i Pue Allah, re’e wo’u komi to damampotunde, pasi re’e wo’u to damamporata anu to napakanasaka i mPue komi. Pasi re’e to damagombo ri raya basa to yusa, panewa re’e wo’u komi to damampakanasaka yunumu anu to nato’o ntau to magombo ri raya basa to yusa etu. Pei tempo komi mangika palaong to etu, ika see mampakaroso samparia raya ntau to mangaya.

27Wali ane re’e tau to damagombo ri raya basa to yusa, biakam, pei ne’e yabi yako togo mba’a tau etu. To taotao duaja tau to magombo ri raya basa to yusa pasi ne’e sindara-ndara magombo. Pasi taa maya tare tau to mampakanasaka sa’e gombo nsira etu.

28Ane bara tare tau to mampakanasaka sa’e gombo nsira, sira taa maya magombo ri temponya komi siromu. Sira maya ojo mampogomboka i Pue Allah ri raya nsira.

29Pasi ane to pantuntu tuntu i mPue, biakamo dua bara togo sira to magombo. Pasi tempo sira magombo etu, yununya to tao-tao mampodongeka kojo pei mangabotus gombonya etu bara monso pu’u yako resi i Nosa Mapasing bara si’a.

30Pasi ane tongo-tongonya tau samba’a magombo pei kodi majoli re’e anu to napakanasaka i mPue tau to matunda, ane ewa see to tao-tao tau to tongo mpagombonya etu majoli mampakaroo gombonya etu. Roo etu panewa tau to owo room napakanasaka i mPue etu maya magombo.

31Apa komi samparia to pantuntu tuntu i mPue Allah maya masibolos magombo samba’a pei samba’a see samparia tau darapotundeka pasi darapakaroso rayanya.

32Wali naka pei to pantuntu tuntu i mPue Allah etu maya masibolos magombo apa siraja semo to mampasilonga sora to si sira etu samba’a pei samba’a. Tare to mampakasaaka sira magombo, wali sira nakoto mangampeas ane yununya magombo.

33Ewa wetu songka i mPue Allah apa Ia taa rani kita marotai tempo siromu. Ia rani kita masanang siromu. Wali ane ewa porenta to nalulu ntau to mangaya i Pue to siromu nja’u ponto-ponto lipu,

34ane tempo siromu tau to mangaya, to tao-tao tau to we’a ojo maroti. Apa ri tempo etu sira taa rabiaka magombo apa ane ewa porenta i mPue to we’a mampolaika songka nto langkai.

35Wali ane re’e to sira rani mangansani, to tao-tao sira mangampeas rata ri banuanya panewa mangampotanaka resi rongonya. Apa ane tau we’a magombo ri temponya tau to mangaya siromu, palaong etu masipato rapokea.

36Wali bara re’e komi to taa singkonong pei porenta to etu, pei gete, tuntu i mPue Allah si’a yako resi komi kama’inya. Pasi si’a ojo komi to mangarata tuntu i mPue Allah etu.

37Re’e komi to manganto’o, “Aku to pantuntu tuntu i mPue Allah.” Pasi re’e to manganto’o, “Aku bae karoso ndaya to nawaika i Nosa Mapasing aku.” Wali ane tau to etu taa maya taa mampongakung monso pu’u porenta i mPue anu to kutulisika komi si’i.

38Pei ane tau etu bo’onya mampodongeka gombongku si’i, ne’e komi mampodongeka gombo to si ia.

39Wali a’i-a’i, matao ane komi mamporani kojo mawali to pantuntu tuntu i mPue Allah. Pasi ne’e mangaba’a tau to rani magombo ri raya basa-basa to tawa igurunya.

40Pei samparia to nuika ngkomi etu pakatao kojo see komi mangika ewa wimba to masipato pasi masilonga.


  Share Facebook  |  Share Twitter

Download Audio MP3 (1 Korintus 14):
Mobile (Low Quality) - CD (High Quality)

 <<  1 Korintus 14 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel