Dual Panel1Wali aku rata resi komi seore rata mampakarebaka komi kareba mangkonong palaong to naika i mPue Allah. Pei tempo aku mampakarebaka komi etu, aku taa mangampake ewa gombo ntau to malangan sekolanya pasi aku taa seja mangampake kapande ngkita to lino.
2Apa aku mangansongka ane kasaenya aku maroo-roo ri oyo ngkomi etu, aku jamo damampobuuka i Yesu Kerisitu, etu semo kapateNya ri kaju pasape.
3Wali tempo aku re’e resi komi seore, tempo etu aku mayu’u wukungku, pasi meka kojo rayangku sampe karongko-rongko.
4Wali tempo aku magombo mampakarebaka komi kareba matao, tempo etu aku taa mangampake gombo ntau to pande to ojo mangamomis sa’e. Pei gombongku etu mampakanasaka komi kuasa i Nosa Mapasing.
5Naka pei aku mangika ewa wetu see komi si’a mangaya yako kapande nto lino, pei saba kuasa i mPue Allah.
6Pei nempo taa mangampake kapande nto lino, pei tiroo re’e kapande to kami mampakarebaka tau to marosomo pangayanya. Kapande to etu si’a kapande nto lino ri tempo si’i pasi si’a seja kapande ntau to bose angganya to ri tempo si’i, apa kuasa nsira dapaya yau.
7Pei kapande to kami mampakarebaka etu, etu semo kapande i mPue Allah anu tawa nansani nto lino tempo ruyu. Apa re’e katawanya i Pue Allah mampapowali lino Ia mansongka yami Ia damampaponsanika kita to mangaya kapandeNya see kita dara’angga. Pei Ia mangawuni kapandeNya etu rataka ri tempo si’i.
8Wali tare tau to bose angganya tempo si’i to mangansani kapande i mPue Allah etu, apa ane sira mangansani seore, sira taa mangampaku yau i Pue, anu bae kojo anggaNya, ri kaju pasape.
9Pei ane ewa ratulis ri raya ntuntu i mPue, i Pue Allah manganto’o, to’oNya, “Tawa re’e tau to mangangkita, pasi tawa re’e to mangandonge, pasi tawa re’e tau to mampobuuka anu to room napasigenaka i mPue Allah resi tau to mamporayang Ia.”
10Ewa see to ratulis, pei kita mangansani anu to taa nansani nsa’e etu apa i Pue Allah room mampokau NosaNya ma’i resi kita mampakanasaka kita samparia etu. Apa i Nosa Mapasing Ia mamparesa samparia. Wali sakowa songka i mPue Allah anu to rawuni, Ia mangansani.
11Apa i sema to lino to mangansani pampobuuka ntau kasimbalinya yako rayanya ngkalio? Tare to lino to mangansani. Pasi ewa see seja i Pue Allah. Tare tau to mangansani pampobuuka i mPue Allah kasimbalinya yako Nosa i mPue Allah.
12Wali kita to mangaya taa mangantima nosa nto lino. Kita mangantima Nosa to yako resi i Pue Allah see kita maya mangansani samparia sora to nawaika i mPue Allah kita yako ri kanotoNya.
13Wali sora etu to kami mampakarebaka. Pasi tempo kami mampakarebaka etu, kami taa mangampake gombo to napotundeka nto lino to pande kami. Kami mangampake gombo to napotundeka i Nosa Mapasing kami. Wali anu to monso to napotundeka i Nosa Mapasing kami, etu semo to kami mamporata resi tau to room mangantima i Nosa Mapasing.
14Pei tau to tare i Nosa Mapasing resi ia, tau etu bo’onya mangantima anu to yako resi i Nosa Mapasing etu. Ia manganto’o, “Gombo etu ojo gombo ntau bea.” Wali ia taa nakurang mangansani apa gombo to yako resi i Nosa Mapasing etu, ojo i Nosa Mapasing semo to maya mampakanasaka ri raya ntau.
15Pei tau to re’emo i Nosa Mapasing resi ia, tau etu nakurang mangansani batuanginya samparia to yako resi i Pue Allah. Pei tau to taa nansani i Pue Allah, ia taa seja nansani batuanginya lengko ngkita to mangaya i Pue Allah.
16Apa re’e ratulis ri raya ntuntu i mPue ewa si’i, to’onya, “Tare tau to mangansani pampobuuka i mPue see maya mampotundeka Ia.” Wali etu semo to ratulis ri raya ntuntu i mPue. Pei kita to mangaya room nawaika i Nosa Mapasing mangansani pampobuuka i ngKerisitu.