Dual Panel1Wali ane mangkonong mampolaika, re’e seja to matao ane nuika ngkomi samparia to we’a to marongom. Etu semo, polaika songka mpa’a nu anamu samba’a pei samba’a. Apa ane bara re’e pa’a nu ana ngkomi to taa mangaluluka tuntu i mPue Allah, sira damangkita lengko ngkatuwu ngkomi to indo nu ananya matao kojo. Panewa yako lengko ngkatuwu ngkomi etu, tuwu-tuwuja sira damangaya seja nempo tare bara kesaa to nato’o ngkomi mangkonong pangaya etu.
2Apa sira mangangkita komi mampalaika kojo i Pue Allah saba manga’angga Ia, pasi lengko ngkatuwu ngkomi tare to masipato rapakasala.
3Pasi ane mangkonong karoro ngkomi to we’a, ne’e-ne’e anu to nupake ngkomi mampasilonga koro ngkomi to mawali pu’u ngkaroromu. Ewamo mangayumpi wayua pasi mangampake weyawa pasi baju to masuli olinya.
4To tao-tao raya ngkomi to taa nakita nsa’e, etu semo pu’u ngkaroro ngkomi. Wali batuanginya, yako ri raya ngkomi etu see naka komi simpalai pasi taa makasar. Apa lengko to ewa wetu tare kapuranya karoronya, pasi bae kojo batuanginya ri pangkita i mPue Allah.
5Wali ewa wetu semo kagaya ntau we’a tempo owi to i Pue Allah Puenya pasi to mansarumaka Ia. Sira mangaluluka songka ndongo nsira samba’a pei samba’a.
6Rapanya i Sara. Apa ia mampalaika i Abraham pasi manganto’oka ia, “Puengku.” Wali komi to we’a to tempo si’i matao seja mangika ewa wetu. Apa ane komi mangika lengko to matao pasi taa meka-meka bara moru-moru raya ngkomi, ane ewa see masipato komi darato’oka wiyaa i nSara etu, ewa ngana mayunu to mangaluluka lengko nu indonya.
7Wali komi to langkai to marongom, re’e seja to matao ane nuika ngkomi samparia. Etu semo, ri raya ngkatuwu ngkomi siwaka pei indo nu ana ngkomi samba’a pei samba’a, ika resi sira ewa wimba to singkonong pei anu to roomo napakanasaka i mPue Allah komi. Raramaka sira, apa sira semo to yu’u-yu’u pei komi. Pasi angga sira apa sira damangarata seja sora to danawaika i mPue Allah komi. Etu semo katuwu to singkasaenya. Wali ewa wetu lengko to masipato danuika ngkomi resi indo nu anamu, see tare to damangantalas pokai-kai ngkomi.
8Wali ri lelenya ri kapuranya to si’i aku re’e to rani manganto’oka komi samparia. Etu semo, masipato komi samba’a pampobuuka ngkomi, pasi mangepe seja kandende ndaya pasi kamawo ndaya to naepe nu yunu ngkomi samba’a pei samba’a. Pasi masipato komi masiporayang ewa tau to moa’i. Pasi masipato seja komi ne’e mabae-bae rayamu. Pasi matao seja komi rani mangansawang tau to ri raya ngkasusa.
9Ne’e mamponsawak ane re’e tau to mangika maja’a resi komi. Pasi ne’e seja mampoja’a tau to re’e mampoja’a komi. Kasimbalinya yako etu, matao ane komi makai-kai mamporapika resi i Pue Allah see Ia mangawaika tau to mampoja’a komi etu rasi. Wali ane komi mangika ewa wetu, komi danawaika seja i mPue Allah rasi, apa etu semo naka pei komi napokio i mPue Allah, see komi maya damangarata seja rasi to Ia damangawaika kita to anaNya.
10Apa re’e to ratulis ri raya ntuntu i mPue Allah to manganto’o, “Tau to rani tuwu masanang pasi rani mangarata katuwu to matao, tau etu to tao-tao mangajagai nganganya naka ne’e manganto’o gombo to maja’a pasi gombo to manipu.
11Pasi to tao-tao ia mangandolika tangonya yako ri lengko to maja’a, pei ika lengko to matao. Pasi to tao-tao ia mangaliwu jaya see maya tuwu masingkatao pei yununya, panewa mangalulu jaya etu.
12Apa i Pue mangararamaka kojo tau to singkonong lengkonya pei Ia, pasi Ia mampodongeka kojo pokai-kai nsira. Pei Ia mangewa tau to mangika lengko to maja’a.” Ewa wetu gombo to ratulis ri raya ntuntu i mPue Allah. Wali ika to matao resi yunu ngkomi samba’a pei samba’a see katuwu ngkomi masanang.
13Wali ane komi madota mangika palaong to matao, i sema to damangika maja’a resi komi? Tare to maya!
14Pei ane rapanya re’e tau to mangansesai komi apa saba komi mangika palaong to singkonong pei i Pue Allah, nempo ewa wetu komi mangarata rasi. Wali ne’e mampokeka tau to mangarai komi, pasi ne’e seja masusa raya ngkomi.
15Pei angga i Pue Allah ri raya ngkomi, pasi pongakung Ia semo Pue ngkomi. Pasi pakaroso ri rayamu damangansono samparia tau to mampotanaka resi komi mangkonong pansarumaka to re’e resi komi. Pei tempo komi mangansono, pakatao kojo raika mangansono gombo ntau pasi ne’e mangei raya ngkomi.
16Pasi jagai kojo lengko ngkomi see raya ngkomi taa damangepe sala ri tango i mPue Allah. Apa re’e tau to manganto’o maja’a komi pei mampakasala lengko to matao to nuika ngkomi apa saba komi samba’a pei i Kerisitu. Pei ane komi mangajagai lengko ngkomi, tau to manganto’o gombo to maja’a etu damawali mea.
17Wali jagai lengko ngkomi. Apa ane pamporani i mPue Allah komi mangarata kasesa, to tao-tao komi mangarata kasesa etu apa saba mangika palaong to matao sakowa mangarata kasesa apa saba mangika palaong to maja’a.
18Apa sakowa i Kerisitu, Ia mangarata seja kasesa. Ia sangkanija mate mangansompo dosa ngkita, pasi kapateNya etu ganamo. Ia tare dosaNya, pei Ia mangkapateka kita to madosa see Ia maya mangika kita see mawali masingkatao pei i Pue Allah. Wali koroNya namate yau, pei yako kuasa i Nosa Mapasing Ia rawangu muni yako ri kapateNya etu.
19Pasi yako kuasa i Nosa Mapasing seja Ia yau tempo owi mampakarebaka kareba matao resi tau. Tau etu semo to tonii nsira ratarungku la’u lipu ntau mate tempo si’i.
20Wali tau to tonii nsira ratarungku, etu semo tau to taa mampolaika i Pue Allah tempo owi, ri tempo i Nuh. Tempo etu i Pue Allah bae sabaraNya resi sira mangampeas temponya bangka bae roomo napasilonga i Nuh. Pei roo see taa malagi tau to rapalaes apa tau to boros bo’onya mampalaika i Pue Allah. Ojo wayu mba’a tau to rapalaes yako ri samal ue apa sira masua ri raya bangka etu.
21Wali sira rapalaes yako ri samal ue apa sira masua ri bangka etu. Wali palaong etu mawali tondong resi kita, apa kita seja rapalaes yako ri kapate to singkasaenya saba pangaya ngkita resi i Kerisitu. Apa kita mangaya i Kerisitu rawangu muni yako ri kapateNya, see naka kita rapalaes seja yako kapate to singkasaenya. Wali tempo kita rabaptis si’a mamposo’i yau anu to makarika to re’e ri koro ngkita. Si’a! Naka pei kita rabaptis see mampaponsanika resi sa’e manasa kojo resi kita dosa ngkita roomo ralapa apa i Yesu nambangu munimo yako ri kapateNya.
22Wali tempo i Yesu Kerisitu mambangu muni yako ri kapateNya, yako etu Ia yau muni nto’u saruga. Wali tempo si’i Ia re’e ri tondo ngkana i mPue Allah, ri tampa to bae kojo angganya. Pasi tempo si’i Ia mangkuasang pomakau i mPue Allah ndate saruga, pasi mangkuasang seja samparia to maporenta pasi to re’e kuasanya. Wali manasa resi kita saba yako kasesa to narata i ngKerisitu, see naka bae kojo kayawa to Ia mangarata. Wali masipato kita buya seja rayanta nempo mangarata kasesa sewaju ewa to narata i ngKerisitu etu.