Dual Panel1Wali re’e to yusa to aku rani manganto’oka komi. Apa aku rani kojo mampaposiaka komi si’i-si’i. Ane ewa panto’o ntau, ane aku siwaka pei komi aku meka-meka rayangku, pei ane longko yako resi komi aku makoje rayangku magombo. Ewa see nato’o ntau. Pei si’a ewa see, apa i Kerisitu Ia taa mabae-bae rayanya pasi taa makasar resi sa’e. Wali ewa wimba lengko i ngKerisitu etu, ewa see seja aku damangika mampaposiaka komi apa aku taa seja damakasar resi komi.
2Wali paposiangku resi komi ewa si’i, aku mamporapika resi komi padongeka gombongku to ratulis si’i pei pakakonoka tau to sala gombonya naka ne’e maroso gombongku tempo aku darata muni resi komi. Aku taa kojo rani manganseko tau tempo aku rata resi komi. Pei nempo ewa see, ane palaong etu tawa rapakaroo tempo aku rata resi komi, ane ewa see, songkangku komi damangkita kakojengku manganseko tau to re’e manganto’o kami mangika lengko ngkatuwu to mangalulu pampobuuka nto lino.
3Kami tare mangika lengko ewa to nato’o ntau etu. Kamonsonya kami maroo ri lino, pei kami taa mangampake songka nto lino tempo kami mangewa anu to maja’a.
4Pasi parewa to napake mami mangewa etu, si’a seja parewa to napake nto lino. Apa to napake mami, etu semo parewa i mPue Allah to bae kuasaNya. Wali ane mangampake parewa to etu, kami maya manganangi pampobuuka ntau to mangewa i Pue Allah. Pampobuuka ntau etu raporapaka ewa bente to maroso kojo.
5Wali apa saba mangampake parewa i mPue Allah etu, see naka kami manganangi gombo ntau to mangabanta anu to monso. Pasi see naka kami manganangi pampobuuka to mangei to raporapaka ewa bente to malangan apa pampobuuka to mangei etu mangaba’a tau see sira taa damangansani i Pue Allah. Pasi samparia pampobuuka nto lino to mangewa i Pue Allah, pampobuuka to etu raporapaka ewa bali to nata’amaka mami pasi to nawali yau mami see damampolaika wo’u songka i ngKerisitu. Wali samparia palaong to etu naika mami mangampake parewa i mPue Allah.
6Wali kami mampakaroso yami damangahuku samparia tau to mangewa songka i ngKerisitu. Huku etu, kami damangika gombo to maroso manganseko sira. Pei kami mangampeas ruyu temponya komi damasilongamo nuika ngkomi mampolaika i Kerisitu. Batuanginya komi mampakadota mampakakonoka tau to sala, ewa to roomo kuto’o.
7Wali pobuuka kojo anu to manasamo resi komi. Apa re’e tau to manganto’o ojo sira semo to roomo mawali i Kerisitu Puenya. Pei to taotao sira mampobuuka wo’u anu to monso, etu semo kami seja i Kerisitu Puenya sewaju pei sira. Wali apa saba kami seja i Kerisitu Puenya, to tao-tao komi mampodongeka paposia mami resi komi, apa si’a yako resi kami pei yako i Kerisitu.
8Apa i Pue roomo mangawaika kami kuasa mangika palaong to etu.Wali bara re’e tau to mampobuuka aku tabaro manganto’o gombo etu, pei monso pu’u re’e kuasa to nawaika i mPue kami. Wali aku taa darapakamea apa saba gombo ntau to manganto’o aku tare kuasa apa monso pu’u kuasa etu re’e resi kami. Wali naka pei i Pue mangawaika kami kuasa etu see kami maya mampakaroso pangaya ngkomi, si’a mampakaja’aka yau komi.
9Wali aku manganto’oka komi etu naka ne’e komi mampobuuka aku mangampake kuasangku etu damampakameka komi tempo aku mangantulisika komi sura seore.
10Apa re’e tau to manganto’o, “Sura i mPaulus, gombonya maroso pasi re’e kuasanya, pei ane ia re’e ri oyo ngkita ia si’a ewa wetu. Apa ia mayu’u rayanya pasi gombonya tare batuanginya.” Ewa wetu nato’o ntau mangkonong aku.
11Pei si’a ewa see. Wali to tao-tao tau etu mangansani ewa wimba gombo to itulis mami ri raya nsura tempo taa siwaka pei komi, ewa see seja danaika mami mampolengkoka tempo kami re’e siwaka pei komi.
12Wali tau to manto’o maja’a aku, tau etu manganto’o aku mayu’u rayangku, pei re’e pu’u to kami taa makoje mangika! Etu semo kami taa makoje mampasimba’a bara mampasewajuka lengko mami pei lengko ntau to tabaro, to mampobuuka sira semo to bae-bae angganya pei sa’e. Tau etu manganto’o, “Lengko ngkita matao kojo apa lengko etu to tao-tao pei lengko nu yunu ngkita.” Ewa see nato’o nsira. Pei kamonsonya to masipato sira manganto’o, etu semo, “Gete, lengko ngkita taa kojo matao apa taa sewaju ewa lengko i mPue Allah.” Pei sira taa mampobuuka ewa wetu, wali gete, sira taa kojo re’e kapandenya!
13Wali kita samparia mangansani taa matao ane kita tabaro, pei kami tiroo damangika ewa naika ntau to bea to tabaro etu. Pei kami taa rani tabaro mayabi yako to masipato. Kami ojo manganto’o anu to singkonong pei palaong to nasarumakaka i mPue Allah kami. Wali etu semo to kami mangika seore tempo kami rata resi komi to Korintus mangangkenika komi kareba matao. Palaong etu semo sangga’a palaong to nasarumakaka i mPue Allah kami etu.
14Wali kami taa mangaliunaka songka i mPue Allah resi kami, apa kami taa yau njo’u lipu to Ia taa mangawai. Pasi kami taa yau ri lipu to Ia roomo mangawaika sa’e. Wali kami taa mangaliunaka songkaNya tempo kami rata resi komi seore. Apa kami semo to uyunya rata mampakarebaka resi komi kareba matao mangkonong i Kerisitu.
15Wali ane rapanya masipato tabaro, kami tabaro mangkonong komi to wua mpalaong mami etu. Pei kami taa rani tabaro mangkonong wua mpalaong ntau to yusa, apa si’a palaong to etu to nasarumakaka i mPue Allah kami. Pei ewa si’i pansarumaka mami, tuwutuwuja komi kanjo’u-njo’u tidugadugang karoso mpangaya ngkomi resi i Kerisitu see kami maya mampakaroo palaong mami ri oyo ngkomi. Panewa yako etu komi nukoto mangansawang kami
16see kami maya mampakarebaka seja kareba matao resi tau to tawa mangandonge to maroo ri lipu-lipu to yusa to longko wo’u yako ri lipu ngkomi. Kami taa rani yau damanangkeni kareba matao nja’u lipu-lipu to re’emo tau to mampakarebaka kareba matao. Apa kami taa rani tabaro mangkonong palaong to naika ntau to yusa, pei mampoanika kami semo to mangika palaong to etu.
17Pei ane mangkonong mangabarong, to tao-tao kita mangalulu anu to ratulis ri raya ntuntu i mPue Allah to manganto’o, “I sema-sema tau to mangabarong, to tao-tao ia ojo mangabarong mangkonong anu to naika i mPue.” Ewa wetu ratulis ri raya ntuntu i mPue Allah.
18Wali ne’e kita mangabarong mangkonong anu to yusa kasimbalinya yako i Pue. Apa si’a tau to mangabarong koronya to masipato ra’angga, pei tau to nabarong i mPue, ia semo to masipato ra’angga.