Dual Panel1Wali kami mapalaong sindara-ndara pei i Pue Allah, see naka kami mampaposiaka komi manganto’o, pake kanoto to nawaika i mPue Allah komi naka ne’e kanoto etu damawali yau tare batuanginya resi komi.
2Apa re’e gombo i mPue Allah to ratulis ri raya ntuntuNya to manganto’o, “Ri tempo to singkonong pei Aku, ri tempo etu Aku manoto resi korom; pasi tempo etu Aku mangansono pokai-kaimu. Pasi ri tempo to masipato Aku mampalaes korom, tempo etu Aku mangansawang korom.” Ewa wetu gombo i mPue Allah tempo owi. Wali padongeka! Apa si’i semo temponya. Si’i semo temponya i Pue Allah damampaponsanika kita to lino kanotoNya. Pasi si’i semo temponya Ia mampalaes kita. Wali ne’e kita mangabiaka kanotoNya etu damawali yau tare batuanginya resi kita!
3Wali kami to rato’oka pomakau i Yesu, kami taa rani palaong mami danato’o maja’a ntau. Wali see naka kami mangajagai kojo naka ne’e kami mangika bara kesaa to damawali ewa watu to nakatisumpul ntau naka pei sira mangampobo’o kareba matao.
4Kasimbalinya yako etu, nempo bara kesaa to mawali, kami sangkani mampaponsanika sa’e kami to papolaong i mPue Allah semo. Apa sira maya mangkita ewa wimba naika mami mangainsoka ri raya ngkasesa pasi soba pasi kasusa.
5Kami mangainsoka tempo ratidas, pasi ratarungku, pasi narotai ntau boros. Kami mangainsoka seja tempo mandasai mapalaong, pasi taa gana yore, pasi taa seja gana pangkoni. Wali bae kojo kasesa mami etu.
6Pasi re’e wo’u lengko mami to mampaponsanika sa’e kami to papolaong i mPue Allah. Etu semo, kami taa mangika lengko to masipato rapokea, pasi kami mangansani anu to monso mangkonong i Pue Allah, kami mansabaraka pasi mangika manoto resi sa’e. Pasi kami re’e i Nosa Mapasing resi kami, pasi mamporayang sa’e ri kamonsomonsonya.
7Pasi kami mampaponsanika sa’e kami to papolaong i mPue Allah apa kami mampakarebaka anu to monso, pasi re’e kuasa i mPue Allah resi kami. Pasi lengko mami to matao, lengko etu raporapaka ewa anu to napake ntentara tempo yau manga’e. Tentara etu ri palenya tondo ngkana mangangkongko wada pasi ri palenya tondo ngkii mangangkongko kantar. Wali ewa see seja lengko anu matao to kami mangika, apa kami mangampake lengko to matao damanganangi anu to maja’a.
8Wali re’e tau to manga’angga kami pasi re’e seja tau to mangarunes kami. Re’e tau to mangabarong kami pasi re’e seja tau to manto’o maja’a kami. Pasi re’e tau to manganto’o kami to panipu, pei kamonsonya kami manganto’o anu to monso.
9Pasi re’e tau to manganto’o, “Se’i Paulus taa masipato nansani ntau,” pei kamonsonya kami nansani ntau boros. Pasi re’e seja tau to manganto’o kami damatemo, pei lo’a kami, tiroo tuwu! Kami rasesai pei taa rapopate yau.
10Wali kami mangarata kasusa, pei tare pandoonya ndende raya mami. Kami masiasi, pei yako palaong mami see naka boros tau to mangarata kasugi to monso. Pasi ane ri pangkita ntau kami tare kesaa to re’e resi kami, pei kamonsonya samparia rasi ndate saruga paka kami puenya. Wali manasa kami to papolaong i mPue Allah semo! Pasi ane manasa kami to papolaong i mPue Allah, ane ewa see manasa seja masipato komi mangaya kareba matao to napakarebaka mami resi komi.
11Wali komi to Korintus, samparia pampobuuka ndaya mami paka roomo ipakanasaka mami resi komi. Pasi bae pamporayang mami resi komi.
12Wali si’a kami to manta’amaka pamporayang mami resi komi. Komi semo to manta’amaka pamporayang ngkomi resi kami.
13Wali aku mampobuuka komi ewa ngana ngkorongku, see naka kuto’oka komi pakabae pamporayang ngkomi masiporayang pei kami.
14Wali matao ane komi mampakabae pamporayang ngkomi resi kami, pei si’a batuanginya matao ane mampakabae pamporayang ngkomi resi samparia tau nempo bara kesaa to naaya nsira. Apa to tao-tao ne’e samba’a pei tau to taa mangaya apa palaong to etu raporapaka ewa binatang to masiyusa to napasingkenta mpasanga. Wali taa masipato raika ewa wetu. Apa anu to singkonong pei i Pue Allah taa maya masingkatao pei anu to mangewa i Pue Allah. Pasi ewa see seja anu to raporapaka ewa reme pasi anu to raporapaka ewa wuri, apa reme pasi wuri taa maya rapasimba’a.
15Pasi i Kerisitu taa seja masingkatao pei i Kepala nto pantipu to rato’oka seja i Belial. Pasi ewa see seja tau to mangaya i Kerisitu taa maya samba’a pei tau to taa mangaya.
16Wali wimba, bara masipato ane tau to mangaya i Kerisitu pei mampue tautau? Gete, taa! Apa koro ngkita roomo mawali banua to nakaroo i mPue Allah to tuwu, wali taa kojo masipato mangampake banua i mPue Allah mampue resi tau-tau! Wali palaong etu singkonong pei gombo i mPue Allah to ratulis ri raya ntuntuNya, to manganto’o, “Aku damaroo ri raya nsira pasi datuwu masingkatao pei sira. Aku damawali Allah nsira pasi sira damawali taungKu.”
17Wali ewa wetu pamporani i mPue, see naka Ia manganto’o wo’u, “Piyai yako ri oyo ntau to taa mangaya pasi poga’aka sira. Pasi ne’e mangika lengko to maja’a ewa naika nsira. Panewa Aku damasanang damangantima komi.”
18Pasi Aku damawali Pa’a ngkomi pasi komi damawali nganangKu to langkai pasi nganangKu to we’a. Ewa wetu gombo i mPue to Makuasa.” Wali manasa taa masipato mampue resi tau-tau.