Alkitab Mobile SABDA
[VER] : [TAA]     [PL]  [PB] 
 <<  2 Tesalonika 3 >> 

1Wali a’i-a’i, re’e wo’u to kami rani manganto’oka komi. Kami mamporapika resi komi mangampokai-kaika kami see tuntu i mPue majoli datikareba, pasi see tau damanga’angga tuntu i mPue etu ewa nuika ngkomi seore.

2Pasi pokaikaika seja kami see i Pue Allah damampalaes kami yako resi tau to lengkonya taa masipato pasi maja’a, apa taa samparia tau to mangaya i Pue.

3Pei i Pue masipato rasarumaka, pasi Ia damampakaroso pangaya ngkomi pasi damangararamaka komi yako resi Kepala nto pantipu.

4Wali kami mansarumaka i Pue, see naka kami matantu komi re’e mangalulu paposia mami pasi komi taa damandoo mangalulu paposia mami etu.

5Wali kami mampokaika komi see i Pue damampakanasaka ri raya ngkomi mangkonong pamporayang i mPue Allah, pasi damampakabae sabara ngkomi mangampea kama’i i ngKerisitu.

6Wali a’i-a’i, i Yesu Kerisitu, Pue ngkita, roomo mangawaika kami kuasa. Wali yako kuasa etu semo kami mampaposiaka komi, kami manganto’o, ne’e mampogalungika pua’i ngkita to samba’a pangaya ane bo’onya mapalaong pasi bo’onya mangaluluka paposia to kami roomo mamporata resi komi seore.

7Apa komi nunsani ewa wimba lengko ngkatuwu mami tempo kami maroo ri oyo ngkomi seore. Pasi komi nunsani masipato komi mangika seja ewa lengko ngkatuwu mami etu apa kami madota seja mapalaong tempo etu.

8Pasi samparia pangkoni to nawaika ntau kami, tare to taa naoli mami. Pei wuri eo kami mandasai mapalaong see taa damampakabeu komi.

9Wali kamonsonya masipato kami marapi sawang resi komi, pei kami taa mangika ewa wetu apa kami rani mawali tondong to maya nululu ngkomi.

10Apa pasiwa tempo kami re’e siwaka pei komi seore, tempo etu kami mampaposiaka komi manganto’o, “Tau ane bo’onya mapalaong taa seja maya mangkoni.”

11Wali naka pei kami mampatiendoka komi mangkonong gombo mami seore apa re’e kareba to idonge mami. Kareba etu manganto’o re’e bara sawei mba’a tau ri oyo ngkomi to bo’onya mapalaong. Tau etu tare yusa to naika nsira kasimbalinya yako sangkani rani manganto’oka sa’e ewa wimba daraika palaong to si sira.

12Wali yako kuasa to nawaika i Yesu Kerisitu, Pue ngkita, resi kami, see naka kami mampaposiaka pasi mampatiendoka tau etu. Kami manganto’oka sira ewa si’i, “Ne’e mangarotai raya nsa’e pei pakadota mangika palaong to si komi see danurata pangkoni to danukoni ngkomi.” Wali etu semo paposia mami resi tau etu.

13Pei a’i-a’i, komi to si’a ewa wetu lengko ngkomi, ne’e mosa mangika anu to matao.

14Pasi ane bara re’e yunu ngkomi to bo’onya mampolaika gombo to natulis mami ri raya nsura si’i, jagai kojo tau etu. Pasi ne’e mampogalungika ia see ia damawali mea.

15Pei ne’e mampobuuka ia ewa bali ngkomi. Kasimbalinya yako etu, paposiaka ia ewa to masipato nuika ngkomi mampaposiaka a’i to samba’a pangayamu.

16Wali i Pue semo pu’u ngkarodo ndaya, wali kami makai-kai see nempo kesaa to mawali resi komi, Ia sangkani damangawaika komi karodo ndaya etu. Pasi kami makaikai seja see i Pue dasiwaka pei komi samparia.

17Wali aku, i Paulus, aku taa mangkalingan komi. Pasi aku semo to mangantulis gombo to kapuranya si’i apa ewa wetu semo to inikangku ponto ngkani aku mangika sura resi tau, see mampakanasa sura etu yako resi aku semo. Wali tempo aku to mangantulis, ewa si’i semo ta’anya.

18Wali aku makai-kai resi i Yesu Kerisitu, Pue ngkita, see Ia damampaponsanika komi samparia kanotoNya. Amin. Ungkanyamo ruyu gombongku si’i.


  Share Facebook  |  Share Twitter

Download Audio MP3 (2 Tesalonika 3):
Mobile (Low Quality) - CD (High Quality)

 <<  2 Tesalonika 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran