Alkitab Mobile SABDA
[VER] : [TAA]     [PL]  [PB] 
 <<  Filipi 1 >> 

1Sura si’i yako resi kami dua, i Paulus pasi i Timotius. Kami to papolaong i Yesu Kerisitu. Wali kami mangantulis sura si’i resi komi to nja’u kota Pilipi. Kami mangantulisika komi to i Pue Allah Puenya apa samba’a pei i Kerisitu Yesu. Pasi kami mangantulisika seja komi to penatuapenatua pasi diaken-diaken ntau to mangaya nja’u ria.

2Wali kami makai-kai see i Pue Allah, Pa’a ngkita, pasi i Pue Yesu Kerisitu, damampaponsanika komi kanotoNya pasi damangawaika komi karodo ndaya.

3Wali ponto ngkani aku mampobuuka komi, aku manganto’oka i Pue Allahngku tarima matao.

4Pasi ponto ngkani aku makai-kai resi i Pue Allah mampokaika komi samparia, aku sangkani ndende rayangku mampokaika komi.

5Apa aku re’e mampobuuka ewa wimba nuika ngkomi mangansawang aku mampakarebaka kareba matao. Apa yako ri pamulanya komi mangandonge kareba matao etu rataka ri tempo si’i komi re’e mangansawang aku mangika palaong to etu.

6Wali pansawang ngkomi resi aku etu, etu semo tondong i Pue Allah re’e mangika palaong to matao ri raya ngkomi. Pasi manasa kojo resi aku Ia to mampomulaka palaong to matao etu, Ia seja damampasilonga palaongiNya etu rataka ri temponya i Kerisitu Yesu dama’i wo’u.

7Wali masipato aku mampobuuka ewa wetu mangkonong komi, apa aku kuporayang kojo komi. Pasi i Pue Allah semo matamanasa mangkonong ewa wimba kawongko ndayangku resi komi. Apa aku kuporayang komi, pasi pamporayangku etu i Yesu Kerisitu semo pu’unya. Naka pei aku kuporayang komi apa saba komi mangarata seja kanoto i mPue Allah sewaju pei aku. Ia mangansawang aku nempo aku ri raya ntarungku, pasi tempo aku yau mampakanasaka kojo tau kareba matao pasi mangewa tau to bali ngkareba matao etu.

8(1:7)

9Wali ewa si’i pokai-kaingku mampokaika komi. Aku makai-kai mamporapika resi i Pue Allah see komi kanjo’u-njo’u kabae-bae pamporayang ngkomi. Pasi kanjo’unjo’u tiduga-dugang kanasanya resi komi pasi kapande ngkomi ri pamporayang etu.

10Naka pei aku makai-kai ewa wetu see komi sangkani damangansani mangampilis anu to matao kojo. See boros palaong to singkonong pei i Pue Allah darakita ri raya ngkatuwu ngkomi saba yako pansawang i Yesu Kerisitu. Palaong etu raporapaka ewa wua ngkaju to matao kojo. Wali ane ewa see, tare lengko ngkomi to makarika pasi to masipato rato’oka sala ane ratamo temponya i Kerisitu dama’i wo’u. Pasi yako palaong ngkomi etu, see naka tau damanga’angga pasi damangabarong i Pue Allah.

11(1:10)

12Wali a’i-a’i, aku rani mampaponsanika komi mangkonong palaong to matao to mawali saba yako kasusa to aku mangarata. Apa yako kasusa to kurata etu, kanjo’unjo’u tiduga-dugang kareba matao natikareba resi tau.

13Apa samparia tentara to mangajagang kami to ratarungku ri raya banua makole si’i pasi samparia tau to yusa, sira paka manasa naka pei aku ratarungku apa saba aku mampakarebaka tau mangkonong i Kerisitu.

14Pasi si’a ojo palaong to etu to mawali. Apa boros pua’i ngkita to rire to samba’a seja pei i Pue, sira tidugang karoso ndaya nsira apa mangansani aku ratarungku. Wali see naka tempo si’i sira maroso rayanya mampakarebaka tuntu i mPue Allah pasi tare kameka ndayanya.

15Wali kamonsonya sangga’a tau etu naka pei sira mampakarebaka mangkonong i Kerisitu apa kaloo pasi rani manganangi yununya see sira semo to na’angga nsa’e. Pei re’e seja tau to yusa to buya raya nsira mampakarebaka mangkonong i Kerisitu.

16Tau etu naka pei mampakarebaka mangkonong i Kerisitu saba yako pamporayang nsira. Apa sira mangansani aku napilis i mPue Allah mampasimbalika kareba matao. Pei tau to yusa etu, naka pei sira mampakarebaka mangkonong i Kerisitu see boros tau damangalulu sira, apa sira rani mampakabae angga nsira. Pasi taa matao pampobuuka nsira mangika palaong to etu apa sira ojo rani mampakaloo aku pasi mangadugang wo’u kasusa ndayangku ri rayanya aku ratarungku si’i.

17(1:16)

18Pei nempo ewa wetu, taa mawei. Apa nempo matao pampobuuka ntau mampakarebaka mangkonong i Kerisitu, bara taa matao pampobuuka nsira, pei aku tiroo ndende rayangku mampobuuka kareba matao mangkonong i Kerisitu rapakarebaka resi sa’e. Wali tare kapuranya kandende ndayangku etu.

19Wali monso pu’u aku ndende rayangku mangkonong etu. Pasi aku ndende seja rayangku mangkonong katuwu to si aku. Apa aku kunsani saba yako pokai-kai ngkomi pasi yako pansawang i Nosa i Yesu Kerisitu, see naka samparia kasusa to aku mangarata si’i damawali matao resi aku.

20Pasi aku mamporani kojo pasi mansarumaka i Pue see aku taa damangika bara kesaa to damampakamea aku. Kasimbalinya yako etu, aku rani see nempo kesaa to mawali resi aku ri tempo si’i, pei aku gana karoso ndayangku ewa tempo ruyu. Naka pei aku rani ewa wetu see i Kerisitu danapakabae ntau nempo aku bara tuwu nempo aku bara mate.

21Apa ane ewa pampobuuka to si aku, katuwungku samba’aja batuanginya. Etu semo aku rani mampakabae i Kerisitu. Pei ane aku mate yau, bae wo’u batuanginya resi aku apa aku dasiwaka pei Ia.

22Wali aku dua-dua rayangku apa aku mawongko kojo see naka aku masanang ane mate pei yau siwaka pei i Kerisitu apa etu semo to matao kojo. Pei ane tiroowa re’e palaong to bae batuanginya to aku maya mangika ri lino si’i, matao seja.

23(1:22)

24Pasi kunsani to bae-bae batuanginya resi komi ane aku tiroo tuwu ri lino si’i damangansawang komi.

25Etu manasa kojo resi aku, wali see naka ane ewa pampobuuka to si aku, aku tawa damate ri tempo si’i. Pei aku tiroo datuwu sindara-ndara pei komi samparia see kanjo’u-njo’u karosoroso raya ngkomi pasi tiduga-dugang kandende ndaya ngkomi apa saba pangaya ngkomi resi i Pue.

26Taa manto’o ane aku rata wo’u resi komi, tempo etu komi damangabarong kojo i Yesu Kerisitu apa saba aku ralapamo yako ri tarungku si’i.

27Pei nempo bara kesaa to mawali resi aku, ika lengko ngkatuwu to singkonong pei kareba matao mangkonong i Kerisitu. Ika ewa wetu see aku nempo rata wo’u resi komi bara ojo mangarata kareba mangkonong komi, matantu rayangku mampobuuka kasingkatao ngkomi mainti kojo, pasi komi samba’a pampobuuka mapalaong sindarandara mampakarebaka kareba matao see sa’e damangaya seja.

28Pasi ne’e kojo mampokeka tau to mangewa komi. Apa ane sira mangangkita komi taa kojo meka resi sira, palaong etu damawali tondong to mampakanasaka sira daratamo temponya sira darapakaja’aka yau, pei komi darapalaes. Pasi i Pue Allah semo damangika palaong to etu.

29Wali ane mangkonong kasesa, seore komi re’e mangkita aku mangarata kasesa apa saba mampasimbalika kareba matao. Pasi komi roomo mangandonge kareba to manganto’o tiroowa ewa wetu resi aku. Pasi tempo si’i komi seja mandasai mampasimbalika kareba matao sewaju ewa aku. Apa kita nawaika i mPue Allah sora apa saba i Kerisitu. Etu semo Ia mangawaika kita mangaya i Kerisitu. Pei si’a ojo etu soraNya. Apa Ia mangawaika seja kita mangarata kasesa apa saba kita mangaya i Kerisitu etu.

30(1:29)


  Share Facebook  |  Share Twitter

Download Audio MP3 (Filipi 1):
Mobile (Low Quality) - CD (High Quality)

 <<  Filipi 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel