Alkitab Mobile SABDA
[VER] : [TAA]     [PL]  [PB] 
 <<  Filipi 4 >> 

1Wali a’i-a’ingku to kuporayang kojo, see naka pakaroso pangaya ngkomi resi i Pue apa komi seja samba’a pei Ia. Aku mamporayang komi pasi mawongko kojo rayangku resi komi. Pasi aku ndende rayangku mampobuuka komi. Komi wua mpalaongingku wali komi raporapaka ewa dale to meyawa to narata ntau to menang.

2Wali aku mamporapika resi i Euodia sira dua i Sintike see masingkatao sira dua, apa sira dua paka samba’a pei i Pue.

3Pasi yunungku to monso pu’u samba’a palaong pei aku, aku mamporapika resi korom mangansawang tau we’a dua etu see sira mawali masingkatao. Apa seore sira dua maroso palaonginya mangansawang aku mampakarebaka kareba matao. Sira mangansawang aku sindara-ndara pei i Klemen pasi samparia yunungku to yusa to samba’a palaong pei aku. Pasi sanga nsira samparia paka re’e ratulis nja’u raya buku to rapangantulis sanga ntau to mangarata katuwu to singkasaenya. Wali to’oka sira to taotao sira dua masingkatao.

4Wali ne’e pura yau kandende ndaya ngkomi apa saba komi seja samba’a pei i Pue. Pasi kuto’oka wo’u komi pakandende raya!

5Pasi paponsanika samparia tau kanoto ndaya ngkomi apa i Pue mosu rata.

6Wali ne’e moru-moru raya ngkomi mampobuuka bara kesaa. Pei nempo bara kesaa to mawali, pokai-kai resi i Pue Allah mamporapika resi Ia anu to nuporani ngkomi. Pasi ri raya mpokaikai ngkomi etu, ne’e rakalingan manganto’oka i Pue Allah tarima matao.

7Apa ane ewa wetu nuika ngkomi, i Pue Allah damangawaika komi karodo ndaya to bae kojo, to taa masua ri akal nto lino. Wali karodo ndaya etu damangika see raya ngkomi pasi pampobuuka ngkomi tare pombalinya apa komi seja samba’a pei i Kerisitu Yesu.

8Wali a’i-a’i, si’i semo paposiangku to kapuranya. Jagai kojo anu to nupobuuka ngkomi. To matao rapobuuka, etu semo anu to monso, anu to masipato ra’angga, anu to singkonong pei i Pue Allah, anu to mapasing, anu to magaya, pasi anu to nato’o nsa’e matao. Wali samparia anu to matao kojo pasi to masipato rabarong, etu semo anu to danupobuuka ngkomi.

9Pasi palengkoka anu to roomo kupotundeka resi komi pasi to komi roomo mangantima yako resi aku. Pasi anu to kuto’o to roomo nudonge ngkomi, pasi lengkongku to roomo nukita ngkomi, palengkoka seja anu to etu. Apa ane komi mangika ewa wetu, i Pue Allah, pu’u ngkarodo ndaya, re’e siwaka pei komi.

10Wali apa saba aku seja samba’a pei i Pue, see naka aku ndende kojo rayangku si’i-si’i mangampobuuka pamporayang ngkomi resi aku. Apa komi re’e mangansawang wo’u aku tempo si’i. Masae kojo komi tare mangansawang aku, pei kamonsonya si’a ewa wetu pamporani ngkomi. Komi rani mangansawang aku pei masae pei mangarata jaya.

11Wali naka pei aku manganto’oka komi gombo etu, si’a apa saba aku taa gana to dakupake. Si’a! Apa si’i-si’i aku mananyamo pasi nempo ewa wimba katuwungku aku tiroo mangepe masanang.

12Nempo taa gana to dakupake, pasi nempo gana kojo, paka biasamo resi aku. Wali see naka aku mananyamo nempo bara kesaa to mawali resi aku. Nempo mangkoni mabosu, pasi nempo moro kompongku, pasi nempo sugi, nempo masiasi, pei re’e anu to monso to mampakasanang rayangku.

13Etu semo, aku kunsani samparia to pamporani i mPue Allah resi aku paka kukurang mangika saba yako pansawang i ngKerisitu to mampakaroso rayangku.

14Pei nempo aku nasawang i ngKerisitu ewa wetu, matao kojo palaong to nuika ngkomi mangansawang aku ri raya ngkasusangku.

15Pasi komi to Pilipi, komi nunsani palaong to mawali seore tempo aku owo mamula mampakarebaka resi komi kareba matao. Tempo etu aku mayoko yako ri propinsi Makedonia, pei ojo komi semo to mangansawang aku. Tare tau to mangaya to siromu nja’u lipu-lipu to yusa to mangansawang aku ri raya mpalinjangku etu. Ojo komi semo to mangawaika aku pansawang panewa komi mangantima rasi yako resi i Pue Allah.

16Sakowa tempo aku nja’u nja’u kota Tesalonika seore komi si’a ojo sangkani mampokatu pansawang resi aku tempo aku taa gana to kupake.

17Wali aku si’a mamporani wo’u sora yako resi komi naka pei aku mampatiendoka komi mangkonong palaong to etu. Si’a. Naka pei aku masanang mampobuuka sora ngkomi seore etu apa saba komi damangarata ntanapa to danawaika i mPue Allah komi apa saba mangika palaong to ewa wetu.

18Wali tempo si’i gana kojo to re’e resi aku, tamore to kupoipu apa aku roomo mangantima sora to nakeni i Epaproditus yako resi komi. Pasi kamonsonya re’e mayabimo yako ri anu to dakupake. Wali sora ngkomi etu maya raporapaka ewa pampue to magaya waunya to masanang kojo i Pue Allah mangantima.

19Wali i Pue Allahngku damangawaika resi komi samparia to danupake. Ia damangansora komi yako kasugiNya to bae kojo kayawanya apa komi seja samba’a pei i Kerisitu Yesu.

20Wali masipato i Pue Allah, Pa’a ngkita, darabarong rataka ri singkasaenya. Amin.

21Wali aku taa mangkalingan samparia komi to nja’u Pilipi to i Pue Allah Puenya apa saba samba’a pei i Kerisitu Yesu. Pasi pua’i ngkita to samba’a pangaya to re’e siwaka pei aku rire, sira taa seja mangkalingan komi. Wali porata resi sa’e gombongku etu.

22Pasi samparia tau to i Pue Allah Puenya to re’e ri lipu si’i, taa manto’o sira to maroo ri raya banua i ngKaisar, sira taa seja mangkalingan komi.

23Wali aku makai-kai resi i Pue Yesu Kerisitu see Ia damampaponsanika komi samparia kanotoNya. Ungkanyamo ruyu gombongku si’i.


  Share Facebook  |  Share Twitter

Download Audio MP3 (Filipi 4):
Mobile (Low Quality) - CD (High Quality)

 <<  Filipi 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel