Dual Panel1Wali ewa si’i batuanginya gombongku mangkonong porenta i Musa, rapanya ana to langkai to damangarata panta mpa’anya. Ana etu nempo ia semo damangarata samparia to re’e resi pa’anya, pei ane ia damangurawa ia sewaju angganya pei to papolaong mpa’anya etu.
2Pasi ana etu taa maya taa mampolaika tau to mangkampang pasi tau to rasarumakaka mampasilonga kasuginya. Ia mampolaika sira sampe rata temponya to napakatantuka mpa’anya.
3Wali ewa see seja kita. Apa tempo ruyu, tempo kita tawa mangansani mangkonong i Kerisitu, tempo etu kita ewa watua apa kita nakuasang ada nu agama nto lino.
4Pei ojo karatanya tempo to napakatantuka yami i mPue Allah, Ia mampokau AnaNya ma’i ri lino si’i. AnaNya etu napoanaka ntau we’a to Yahudi wali Ia to Yahudi seja, see naka Ia mangalulu seja porenta i Musa.
5Pei kamonsonya, naka pei Ia ma’i see damangalapa tau to ewa watua apa ri ara mporenta i Musa etu. Ia mangalapa kita see kita maya naoko i mPue Allah mawali anaNya.
6Wali apa saba komi roomo mawali ngana i mPue Allah, see naka Ia mampokau Nosa nu AnaNya ma’i maroo ri raya ngkomi see manasa kojo komi anaNya. Pasi yako Nosa nu AnaNya etu see naka komi mangansani manganto’oka i Pue Allah, “O Baba, Komi semo Pa’angku.”
7Wali ane ewa see, batuanginya komi si’amo to papolaong, komi ngana i mPue Allah. Pasi ane komi nganaNya, batuanginya komi damangarata seja tila to naparajanjika i mPue Allah kita to anaNya apa saba palaong to naika i ngKerisitu.
8Wali tempo ruyu, tempo komi tawa nunsani i Pue Allah, tempo etu komi ewa watua apa komi mampue resi pue-pue to kamonsonya si’a i Pue Allah.
9Pei si’i-si’i komi mangansanimo i Pue Allah. Pasi to kono wo’u rato’o, i Pue Allah mangansanimo komi! Wali ane ewa see, maka pei komi mangandolika muni tango ngkomi resi ada-ada nto lino? Ada etu tare batuanginya pasi tare kuasanya mangansawang komi, wali maka pei komi mamporani mawali muni watua nu ada etu?
10Naka pei aku manganto’oka komi ewa wetu, apa komi manga’angga muni eo rapandoo, pasi roa to tempo mpanaa mbuya, pasi tempo roa to bae, pasi to’u-to’u to na’angga nto Yahudi.
11Wali moru kojo rayangku mampobuuka komi, apa ane komi mawali muni ewa watua nu ada etu, tare batuanginya samparia palaong to nikangku resi komi seore.
12Wali a’i-a’i, ne’e mangika ewa wetu. Aku mamporapika resi komi mampolengkoka lengko to nikangku. Apa aku tamo mansarumaka porenta i Musa. Aku to Yahudi, pei aku roomo mawali ewa komi to si’a to Yahudi. Wali aku taa moru manganto’oka komi gombo to etu apa tempo aku re’e resi komi seore komi tare mangika bara kesaa to maja’a resi aku.
13Komi mangansani naka pei mawali aku mampakarebaka kareba matao resi komi seore, apa saba aku maroo-roo resi komi apa masaki.
14Pasi tempo aku masaki etu, mandasai kojo nuepe ngkomi mangansawang aku. Pei nempo panyaki to si aku mawali soba resi komi, pei komi taa mampobo’o bara mampolime aku. Kasimbalinya yako etu, komi masanang mangantima aku. Rapanya ewa nuika ngkomi mangantima pomakau i mPue Allah yako ndate saruga, bara mangantima i Kerisitu Yesu semo, ewa wetu seja inika ngkomi mangantima aku seore.
15Ndende kojo raya ngkomi tempo etu. Pasi aku kunsani bae kojo pamporayang ngkomi resi aku seore, apa pasiwa mangayali yau mata ngkomi damangabolos matangku to maja’a, ane rapanya mawali raika ewa wetu, buya seja raya ngkomi. Wali maka pei pura yau kandende ndaya ngkomi etu?
16Wimba, aku bara roomo mawali yau balimu ri pangkita ngkomi apa saba gombongku manganto’oka komi anu to monso?
17Ane tau to mampotundeka komi anu to taa monso si’i-si’i, tau etu madota kojo mangamomis komi apa rani masingkatao pei komi. Pei songka nsira taa matao. Sira ojo rani mangaga’a kita see komi damakoro wo’u mangalulu sira.
18Kamonsonya taa sala ane tau madota ane songka ntau etu matao. Pei to tao-tao sira sangkani mangika ewa wetu, si’a ojo ri temponya aku re’e ri oyo ngkomi. Pei tau to mampotundeka komi etu si’a ewa see.
19O komi to ewa ana ngkorongku to kuporayang kojo. Ewa to we’a to mandasai kojo naepe tempo moana, aku seja mandasai wo’u kuepe mampobuuka komi. Pasi ewa wimba to we’a mangampeas ananya to darapoanaka etu, ewa wetu seja rayangku mangampeas temponya pansarumaka ngkomi darapasilonga see ojo i Kerisitu semo to nusarumaka ngkomi.
20Wali aku rani kojo rayangku siromu sindarandara pei komi tempo si’i see aku maya magombo resi komi, si’a ojo mangantulis ewa wimba pampobuukangku. Apa aku bata-bata rayangku mampobuuka komi.
21Wali komi to rani mangalulu porenta i Musa, wimba, komi bara tawa nunsani batuanginya porenta etu?
22Apa re’e ratulis mangkonong i Abraham, ia dua ananya to langkai. Samba’a ana etu indonya watua to sanganya i Hagar. Pei ananya to kadua etu indonya si’a watua. Indonya etu sanganya i Sara.
23Wali ane ananya to indonya watua, ananya etu rapoanaka saba yako pamporani nto lino. Pei ananya to indonya si’a watua, ananya etu rapoanaka apa mangabanang parajanji i mPue Allah resi sira.
24Wali palaong to etu maya mawali tondong resi kita. Apa tau we’a to dua etu sira mawali tondong parajanji i mPue Allah to dua ngaya. Wali i Hagar ia watua, pasi ia tondong samba’a parajanji i mPue Allah, etu semo porenta to Ia mangawaika i Musa ndate Tongku Sinai. Pasi tau to ri ara mporenta to etu, sira raporapaka ewa watua sewaju pei i Hagar pasi ananya.
25Wali i Hagar ia tondong Tongku Sinai nja’u tana Arab. Pei si’a ojo tau Arab to ewa i Hagar. Apa ia seja tondong kota Yerusalem to tempo si’i. Apa i Hagar pasi ananya paka watua, pasi ewa see seja tau to maroo ri kota Yerusalem apa sira tiroo ri ara ngkuasa mporenta i Musa.
26Pei i Sara si’a watua ewa i Hagar. Ia tondong kota Yerusalem to ndate saruga. Kota etu si’a kota to nakaroosi mbatua. Wali kota etu raporapaka ewa indo ngkita to mangaya to boros kojo.
27Apa re’e ligi to ratulis ri raya ntuntu i mPue Allah, ligi etu manganto’o, “To we’a to tempo ruyu ia apa, tau we’a etu semo to boro-boros ananya pei to we’a to taa napiyaika ndongonya. Wali pakasanang rayamu, tau we’a to apa! Pasi korom to taware mangepe ntida to narata ntau to moana, pakabae loomu manganto’o kandende ndayamu apa korom semo to damangarata boros kojo anamu.” Etu semo ligi to ratulis ri raya ntuntu i mPue Allah.
28Wali a’i-a’i, komi seja mawali ana i mPue Allah saba yako parajanjiNya, sewaju ewa Ishak to rapoanaka singkonong pei parajanji i mPue Allah tempo owi.
29Pei tempo owi etu, ana i Abraham to rapoanaka saba pamporani nto lino, ia mampakasusa tua’inya to rapoanaka yako kuasa i Nosa Mapasing. Pasi ewa see seja anu to mawali tempo si’i, apa kita to ana i mPue Allah saba yako parajanjiNya, kita napakasusa ntau to ojo rani mangalulu porenta i Musa.
30Pei kesaa to ratulis ri raya ntuntu i mPue Allah mangkonong palaong to etu? Ewa si’i ratulis, to’onya, “Rubak yau to we’a to watua pasi ananya. Apa taa masipato ana mbatua damangarata seja santila yako ri panta mpa’anya sindara-ndara pei ana nto we’a to si’a watua.” Ewa wetu to ratulis ri raya ntuntu i mPue Allah.
31Wali a’i-a’i, kita si’a raparapaka ewa ana nto we’a to watua etu. Kita ewa ana nto we’a to si’a watua.