Alkitab Mobile SABDA
[VER] : [TAA]     [PL]  [PB] 
 <<  Galatia 5 >> 

1Wali kita si’amo ewa watua apa i Kerisitu roomo mangalapa kita yako ri ara mporenta i Musa. Wali pakaroso raya ngkomi naka ne’e mangandolika muni tango ngkomi resi porenta etu damawali wo’u watuanya.

2Wali padongeka! Aku, i Paulus, manganto’oka komi, ane komi rasui mangalulu ada nu agama nto Yahudi apa mampobuuka etu semo jaya danato’o i mPue Allah tare dosamu, ane ewa see i Kerisitu tamo re’e batuanginya resi komi.

3Wali sangkani wo’u aku mampaposiaka tau to rani rasui mangalulu ada nu agama nto Yahudi. Ane tau etu mansarumaka etu semo jaya see danato’o i mPue Allah tare dosanya, sira taa maya taa mangalulu seja samparia porenta i Musa to yusa.

4Pasi komi to mampobuuka komi danato’o i mPue Allah tare dosamu apa saba mangalulu porenta i Musa, batuanginya komi maga’a yako ri pansawang i ngKerisitu. Pasi komi roo mampiyaika yau kanoto i mPue Allah.

5Pei ane kami to mansarumaka kanoto i mPue Allah, kami nato’o i mPue Allah tare dosa mami. Pasi yako pangaya mami, see naka kami nasawang i Nosa Mapasing mangampeas anu to nasarumaka mami. Etu semo temponya i Pue Allah damampogomboka kami ri tango ntau samparia pei manganto’o, “Komi tare dosamu.”

6Apa ane kita to samba’a pei i Yesu Kerisitu apa saba pangayanta, taa mawei nempo rasui mangalulu ada nto Yahudi, nempo taa. Apa si’a ada to etu to bae batuanginya. To bae batuanginya, etu semo pangayanta. Pasi pangayanta etu manasa saba yako pamporayanginta resi sa’e.

7Wali tempo ruyu komi ewa tau matilumba to magasi maripo, apa tempo etu komi maroso kojo pangayamu. Pei si’i-si’i komi ewa re’e talanya naka pei komi tamo mangalulu kojo anu to monso. Wali gete, sema to mangantalas komi etu?

8Kamonsonya si’a i Pue Allah to mangika see komi mansarumaka porenta i Musa. Apa Ia semo to mampokio komi damansarumaka i Kerisitu.

9Wali tau to mangantalas komi etu, gombo nsira raporapaka ewa ragi. Pasi monso pu’u ligi to manganto’o, “Nempo kodi kojo raginya rapake, roti etu damawali bae.” Ewa see ligi to nato’o ntau.

10Pei nempo ewa wetu, aku taa moru-moru mampobuuka komi apa komi seja samba’a pei i Pue. Wali aku mansarumaka i Pue damangansawang komi see komi dasamba’a pampobuuka pei aku mangkonong palaong to mawali etu. Pasi ane tau to mangarotai raya ngkomi etu, nempo sema tau etu, manasa ia darahuku.

11Wali a’i-a’i, ane ewa pampobuuka ngkomi, maka pei aku tiroo nasesai nto Yahudi? Ane aku bara mangampotundeka tau manganto’o kita to mangaya tiroowa parluu rasui mangalulu ada nto Yahudi, ane ewa see tare to Yahudi to masusa resi aku. Sira ojo masanang resi aku. Pei sira maja’a kojo rayanya resi aku apa aku mampakarebaka mangkonong kapate i Yesu Kerisitu ri kaju pasape, aku manganto’o kapateNya etu gana kojo. Tamo daradugang wo’u.

12Wali ane tau to mampakasusa pangaya ngkomi, to tao-tao sira si’a ojo rasui, pei rakabiri yaumo!

13Wali a’i-a’i, naka pei komi napokio i mPue Allah see komi seja daralapa yako ri ara ngkuasa mporenta i Musa. Pei nempo kita ralapa, si’a batuanginya kita maya mangaluluka yau muni pampobuuka ngkita to masae. Wali ne’e kita mangika ewa wetu. To tao-tao, anu kita masisawang apa saba kita masiporayang.

14Apa samparia porenta to re’e ri raya mporenta i Musa paka nalulukamo ntau ane mangalulu porenta to samba’a si’i. Etu semo, “Porayang yunumu ewa nuika mamporayang koromu ngkalio.”

15Pei ane komi sangkani matingka pei masipoja’a ewa naika nu asu masobo, ane ewa see, pakatao kojo. Apa palaong to etu ojo mampakaja’aka yau kasingkatao ngkomi.

16Wali ewa si’i aku manganto’o. Biaka i Nosa Mapasing mangkentar komi. Apa ane kita mangabiaka Ia mangkentar kita, ane ewa see, kita tamo damangaluluka pamporani mpampobuuka ngkita to masae.

17Apa pamporani mpampobuuka ngkita to masae, pamporani to etu mangewa pamporani i Nosa Mapasing. Pasi pamporani i Nosa Mapasing mangewa pamporani mpampobuuka ngkita to masae. Wali pamporani to dua etu masimusu, see naka kita taa takoto mangika palaong to kita rani mangika.

18Pei ane kita nakentar i Nosa Mapasing, batuanginya kita tamo ri ara ngkuasa mporenta i Musa.

19Wali kita mangansani lengko to naika ntau to ojo mangaluluka yau pampobuuka nsira to masae. Lengko etu semo sira masala, magoyal, mangika palaong to makarika, pasi mangika lengko to masipato rapokea.

20Sira mampue resi tau-tau, pasi mangampake do’a, maja’a nakita sa’e, matingka, timopo, maja’a rayanya, pasi mampobuuka koronya to bae-bae batuanginya pei sa’e. Sira masimpayu raya pei sa’e, pasi nasoumaka yau yununya to samba’a pangaya jamo mangaluluka yau tau to yusa pampobuukanya.

21Sira kaloo, pasi mampopate sa’e, pasi manginu see mawali kayangu, pasi mangika roa-roa to mawali palaong to masipato rapokea, pasi mangika samparia palaong to ewa wetu. Wali aku manganto’o wo’u patiendo to aku roomo manganto’oka komi seore. Etu semo, tau to sangkani mangika palaong to ewa wetu, tau etu taa damangarata anu to matao to rawaika resi tau to Makolenya i Pue Allah.

22Pei lengko to naika ntau to mangalulu pamporani i Nosa Mapasing, lengko etu raporapaka ewa wua ngkaju to matao. Wali lengko etu semo sira mamporayang sa’e, ndende rayanya pasi rodo rayanya. Sira bae sabaranya, matao resi sa’e, manoto resi sa’e pasi masipato rasarumaka.

23Pasi sira taa makasar resi sa’e pasi nakurang manganta’amaka pamporani ndayanya. Wali lengko to ewa wetu, tare porenta to manganto’o ne’e raika ewa wetu.

24Wali tau to i Kerisitu Puenya, tau etu mampobuuka pampobuukanya to masae ewa roomo mate rapaku ri kaju pasape sindarandara pei i Kerisitu. Wali anu to naporayang pasi to naporani mpampobuuka to masae etu, anu to etu tamo masipato mangkuasang ia.

25Wali ne’e kita rani nabarong nsa’e. Pasi ne’e kita mampakasusa sa’e samba’a pei samba’a pasi ne’e seja kita kaloo samba’a pei samba’a. Kita roomo nawaika i Nosa Mapasing katuwu to singkasaenya, see naka masipato kita mangabiaka Ia mampasilonga katuwu ngkita.

26(5:25)


  Share Facebook  |  Share Twitter

Download Audio MP3 (Galatia 5):
Mobile (Low Quality) - CD (High Quality)

 <<  Galatia 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel