Alkitab Mobile SABDA
[VER] : [TAA]     [PL]  [PB] 
 <<  Kisah Para Rasul 27 >> 

1Wali yako etu i Pestus mansongka damampakatu i Paulus malayag njo’u kota Roma ri tana Italia. Pasi re’e seja bara sawei mba’a tau to ratarungku to darapokatu seja sindara-ndara pei i Paulus njo’u kota Roma etu. Wali i Pestus mansarumakaka samba’a kepala ntentara, sanganya i Yulius, damangkeni sira njo’u Roma mapone bangka. I Yulius etu semo samba’a tentara i makole nto Roma pasi ia mangkepalang tentara to satu kaborosinya.

2Wali kami mapone ri bangka to yako ri kota Adramitium. Bangka etu tamo masae damalayag wo’u njo’u pelabuan-pelabuan to ri wii ntasi ri propinsi Asia. Wali ojo karoonya kami mapone ri bangka etu, kami malayag. Tempo kami malayag etu, re’e seja samba’a tau sanganya i Aristarkhus mangalulu kami. Ngkai etu yako ri kota Tesalonika ri propinsi Makedonia.

3Wali yako etu, eo rao wo’u kami dongka nja’u kota Sidon. Tempo etu i Yulius ia manoto kojo lengkonya resi i Paulus, apa ia mangabiaka i Paulus mana’u yako ri bangka nja’u ria. Naka pei ia mangabiaka i Paulus yau see ia maya mayunu resi yununya to nja’u kota etu, see sira maya mangawaika ia anu to danapake.

4Wali ojo karata muni i Paulus ri bangka, kami malayag wo’u. Pei tempo kami malayag etu marimbo kojo ngoyu yako ri tangonya, wali see naka kami liu ri wii mpulo Siprus see taa kono ngoyu marimbo etu.

5Roo see kami mawote tasi to ri tango propinsi Kilikia pasi Pampilia, panewa rata nja’u kota Mira ri tana Likia.

6Wali nja’u Mira etu, kami mana’u yako ri bangka panewa kepala ntentara mangarata wo’u samba’a bangka yako nja’u kota Aleksandria, bangka etu dayau njo’u tana Italia. Wali see naka ia manganto’oka kami mapone wo’u ri bangka to etu. Roo see kami malayag wo’u.

7Pei tempo kami malayag etu bara sawei mbengi kasaenya malengi kojo bangka mami etu apa marimbo ngoyu to yako ri tangonya. Pasi kami mandasai kojo mangampomosuk kota Knidus. Tare pandoonya ngoyu marimbo etu wali see naka kami taa rakurang polas tondo kasoyo nu eo etu, wali kami jamo malayag tondo selatan mangalulu wii mpulo Kreta liu ri urung Salmone, apa ane nja’u ria tamo marimbo kojo njoyu.

8Pei tempo kami malayag mangalulu wii mpulo etu, mandasai kojo palayag mami etu panewa kami rata nja’u pelabuan to rato’oka Pelabuan Magaya. Pelabuan etu mosu ri kota Lasea.

9Wali kami masae sangkodi nja’u ria, liumo temponya to napobiasa nto Yahudi mangorop mangalulu ada ngkita. Wali daratamo temponya rao maja’a, temponya tamo matao mangkeni bangka ri wawo ntasi. See naka i Paulus magombo mampatiendoka tau, to’onya,

10“Pa’a-pa’a, ane ewa pampobuuka to si aku tawa matao ane kita dameyoko yako rire si’i-si’i apa ane kita dameyoko kita damangarata selaka. Ane ewa see bangka pasi ngaya-ngaya datibute yau pasi kita bara damate yau seja.” Ewa see gombo i mPaulus.

11Pei kepala ntentara taa mangaya gombo i mPaulus etu. Ia ojo mampalaika gombo ntau to mangkeni bangka pasi tau pue nu bangka etu. Tau etu rani polas.

12Apa kamonsonya pelabuan etu taa matao rakaroo ane tempo loto apa ngoyu marimbo damampakaja’a bangka. See naka kaborosinya tau to mampobuuka to tao-tao ane kami mampiyaika pelabuan etu pei majoli mangampago nja’u pelabuan Peniks ri pulo Kreta. Wali tuwu-tuwuja kami maya maroo nja’u ria mangampeas liumo tempo loto. Naka pei matao maroo nja’u Peniks etu apa pelabuan etu mampotango tondo kasoyo nu eo, sambali tondo utara pasi sambali tondo selatan, wali taa kono kojo ngoyu marimbo.

13Wali yako etu re’e ngoyu to taa marimbo kojo yako ri tondo selatan, wali tau mampobuuka matao ane kami polas. Sira mangore muni watu balango bangka etu panewa kami malayag mangalulu kojo wii mpulo Kreta.

14Pei ri raya mpalayag mami etu taa masae ratamo ngoyu to marimbo kojo to ewa lembuwu to bae yako ri pulo Kreta. Ngoyu etu rato’oka ngoyu Timur Laut.

15Wali kodi majoli ngoyu etu kono ri bangka mami, wali bangka etu tamo nakurang mangewa ngoyu etu. Wali kami tamo maya malayag mangalulu ewa songka mami, see naka tau to mangkeni bangka etu jamo mangabiaka yau ngoyu etu mangkeni yau bangka ri tondo nakanjo’u ngoyu etu.

16Wali yako etu kami liu ri awe mpulo kodi sanganya Kauda. Nja’u ria ngoyu tamo marimbo kojo wali kami rani mangajagai duangan see taa darapakaja’aka yau ane mangarata wo’u bombang to bae, see naka kami mangokotaka muni duangan etu ndate raya bangka. Mandasai kojo naepe mami tempo mangokotaka duangan etu.

17Wali ojo karoonya kami mangokotaka duangan etu, kami manganso’o see mainti, panewa roo see tau to mapalaong ri bangka etu mangkaitka seja kiyoro bangka etu see maroso. Ojo karoonya etu sira mantauraka yau seja layag apa sira mampomoruka bangka etu bara danakeni yau nu ngoyu nja’u karedenya to rato’oka Sirtis. Apa ane ngoyu mangkeni yau bangka nja’u ria tamo maya rayali apa taa kojo mayombu ue. Wali ojo karoonya sira mantauraka layag, bangka mami jamo nakeni nu bombang.

18Wali tare pandoonya ngoyu marimbo etu kono ri bangka mami, wali see naka eo rao wo’u sira mangantaji yau ngaya-ngaya to nakeni nu bangka etu. Sira mampanasok yau lo’u raya ntasi.

19Panewa ri rayanya dua mbengi wo’u sakowa saga-saga to napake ntau to mapalaong ri bangka etu sira semo to mangantaji yau.

20Wali bara sawei eo kasaenya kami tamo re’e mangkita mata nu eo pasi batu’e pasi taa kojo re’e pandoonya ngoyu to marimbo kojo etu. See naka kami tamo re’e to rasarumakaka damampalaes.

21Wali tau ri bangka, sira masae sangkodi tare mangkoni see naka i Paulus yau makore ri oyo nsira pei manganto’o, “A’i-a’i, to tao-tao ane komi mampodongeka gombongku seore manganto’o ne’ewa rapolasaka yako ri pulo Kreta, apa ane ewa see kita taa mangarata selaka si’i pasi taa seja pura ngayangaya ngkomi.

22Pei si’i-si’i kuto’oka komi pakaroso rayamu apa tare komi to damate yau. Ojo bangka semo datondu yau.

23Naka pei kunsani palaong to damawali etu apa ri raya mburi rata samba’a pomakau i mPue Allah yako ri saruga. I Pue Allah etu, Ia semo Puengku pasi Ia semo to kupampue mampakabae. Wali Ia mampokau pomakauNya etu ma’i makore ri awengku.

24Pomakau etu mampogomboka aku, to’onya, ‘Paulus, ne’e meka, apa i Pue mangararamaka korom ri raya mpalinjamu apa korom taa maya taa mampotango makole nto Roma. Pasi yako ri kanoto i mPue Allah mangandonge pokai-kai ngkorom, see naka samparia tau to re’e ri bangka sindara-ndara pei korom tare to damate yau.’ Etu semo gombo mpomakau i mPue Allah etu.

25Wali a’i-a’i, pakaroso rayamu apa aku kuaya i Pue Allah Ia damangika kojo to Ia room manganto’o etu.

26Pei kita dasore ri karedenya nja’u samba’a pulo, wali bangka ngkita si’i tamo maya darayali.” Wali etu semo gombo i mPaulus resi tau to mapalaong ri bangka.

27Wali ojo kagananya sampuyu pei opo mbengi, ri raya mburi bangka mami etu ojo kabangka-bangka ri wawo ntasi Adria. Tempo etu, bara ntongo wuri, tau to mapalaong ri bangka sira re’e mampondayaka bangka mami etu bara mosu ri tana.

28Wali sira mangayui besi pei manguyu ri ue mangansukat bara wimba kayombunya ue etu. Wali ue etu kayombunya mosu opo mpuyu meter. Yako etu sira polas wo’u sangkodi panewa mangansukat wo’u. Pei nja’u ria ue kayombunya mosu togo mpuyu meter.

29Wali sira meka kojo rayanya bara dakono watu see naka sira manguyu opo watu balango yako ri bangka etu tondo ri payunya damanganta’amaka bangka etu. Panewa roo see sira makai-kai see tuwu-tuwuja tamo masae daeomo rao.

30Wali yako etu tau to mapalaong ri bangka sira mangaliwu jaya damampiyaika bangka etu. See naka sira mantauraka duangan lo’u wawo ntasi. Panewa sira mangawutis kami manganto’o sira damamposaka sawei mba’a watu balango la’u tango nu bangka, pei kamonsonya sira rani miyai yako ri bangka.

31Pei i Paulus manganto’oka kepala ntentara to satu pasi joanya, to’onya, “Ane tau etu mampiyaika bangka, komi taa maya rapalaes.”

32Wali tentara etu mangarapas yau yui nu duangan etu see duangan etu nakeni yau nu bombang.

33Wali yako etu ojo kamosueonya i Paulus manganto’oka samparia tau ri bangka, to’onya, “To tao-tao komi samparia mangkoni ruyu, apa komi sampuyu pei opo eo kasaenya ojo mampea-mpeas bara kesaa to damawali pei komi taa mangkoni.

34Wali aku mamporapika resi komi mangkoni ruyu sangkodi see maroso koro ngkomi, apa tare pasi samba’a tau ri oyo ngkomi to darapakaja’aka yau sakowa santoko wayuanya.”

35Wali ojo karoonya i Paulus manganto’o gombo etu ia mangoko roti pei makai-kai ri tango ntau boros etu manganto’oka i Pue Allah tarima matao. Panewa roo see ia mangampesu roti etu pei mangkoni.

36Wali yako etu samparia kami ri bangka maroso raya mami wali kami seja mangkoni.

37Wali kami to re’e ri bangka etu dua atu pei pitu mpuyu pei ono mba’a.

38Wali tempo samparia kami roomo mangkoni nakabosu, sira mangoko wo’u wea nu labu gando to re’e ri bangka pei mantaji yau lo’u raya ntasi see manga’a wo’u bangka etu.

39Yako etu, ojo kaeonya rao, sira mangangkita tana, pei tana etu sira taa nansani bara pulo kesaa. Pei sira re’e mangkita seja suog to re’e bone ri wiinya. Wali sira mansongka ane sira nakurang damampakasore bangka nja’u ria.

40Wali see naka sira mangarapas yau yui nu watu balango pei mangabiaka watu balango etu naka tondu yau. Pasi ri tempo etu seja sira mangalede yau muni po’u nu wose pasi mangore muni layag to ri tango nu bangka see ngoyu damangkeni bangka etu tondo ri wii ntasi.

41Pei bangka mami etu kono bone to ri raya nue. Bangka etu tondo ri tangonya mansaka sore ri bone etu wali bangka tamo kanjo’u. Panewa tondo ri payunya bombang mangabusak yau.

42Wali tentara mansongka damampopate yau samparia tau to rata’amaka to rasarumakaka resi sira etu see tare to maya manangu damampiyaika sira.

43Pei kepala ntentara etu taa mangawaika sira mangika palaong to ewa wetu apa ia rani mampalaes i Paulus. Ia manganto’oka tau to nansani manangu matambesi ruyu lo’u ue panewa manangu mampago nja’u wii ntasi.”

44Wali karoonya tau etu manangu, panewa tau to toronya to taa nansani manangu sira mangoko dopi bara beso ngkaju to yako ri bangka panewa sira mangkongko kaju etu panewa bombang mangkeni sira njo’u wii ntasi. Wali ewa wetu semo kami mangika mampiyaika bangka naka pei kami samparia paka dongka nja’u wii ntasi. Tare pasi samba’a kami to mawela.


  Share Facebook  |  Share Twitter

Download Audio MP3 (Kisah Para Rasul 27):
Mobile (Low Quality) - CD (High Quality)

 <<  Kisah Para Rasul 27 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel