Dual Panel1Wali yako etu kanjo’u-njo’u tiduga-dugang wo’u kaborosinya to Yahudi to mangaya i Yesu. Tau etu sira singga’a basanya basa Yunani panewa singga’a basanya basa Ibrani. Wali ri tempo etu to Yahudi to basanya basa Yunani sira mangkambumbuka yununya to basanya basa Ibrani. Sira masusa rayanya apa doi pasi pangkoni to biasa ratilaka samparia tau to balu, tau balu to basanya basa Yunani etu sira taa mangarata.
2Wali pomakau i Yesu to sampuyu pei dua, sira mampasiromunaka samparia tau to mangaya panewa manganto’oka sira, “Taa matao ane kami mandoo yau mampakarebaka tau tuntu i mPue Allah panewa jamo mangantila pangkoni.
3Wali a’i-a’i, pilis pitu mba’a tau to yako ri oyo ngkomi. Tau pitu etu tau to lengkonya tare to maya napakasala nsa’e, pasi to bae kojo karoso ndaya to nawaika i Nosa Mapasing sira, pasi to re’e kapandenya. Panewa tau pitu etu kami damangawaika damampasilonga palaong to etu.
4Wali ane ewa see kami yoa sangkani mangika palaong to si kami, etu semo makai-kai pasi mampakarebaka tau tuntu i mPue Allah.”
5Wali tempo tau boros mangandonge gombo mpomakau etu sira masanang kojo. Wali sira mangampilis pitu mba’a tau. Tau to ipilis etu samba’a sanganya i Stepanus. Ia tau to mangaya kojo i Pue Yesu pasi to bae kojo karoso ndaya to nawaika i Nosa Mapasing ia. Pasi kasimbalinya yako i Stepanus etu re’e ono wo’u tau to sanganya i Pilipus, i Prokorus, i Nikanor, i Timon, i Parmenas pasi i Nikolaus to yako ri kota Antiokhia. I Nikolaus etu ia si’a to Yahudi pei ia room masua agama nto Yahudi.
6Wali tau pitu etu nakeni ntau boros mampotango pomakau i Yesu. Panewa pomakau etu mampokaika tau pitu etu. Tempo makai-kai sira mamposaka palenya ri wawo ntau pitu etu mangika tondong tau pitu etu semo to rapilis mangika palaong to danaika nsira.
7Wali yako etu tuntu i mPue Allah natikareba-reba wo’u resi tau to yusa. Wali kanjo’u-njo’u kaboro-boros tau ri Yerusalem to mangaya i Yesu. Pasi boros kojo to pampue to mangaya seja kareba matao mangkonong i Yesu.
8Wali ri tempo etu i Stepanus nasawang kojo i mPue Allah pasi ia nawaika i mPue Allah kuasa. Wali boros palaong to inikanya ri oyo ntau boros etu to mampakaipu raya nsira pasi to mawali tondong resi sira.
9Pei re’e tau to mangabanta ia. Tau to mangabanta ia etu sira yako ri banua to napampotunde nto Yahudi to tempo ruyu sira watua pei tempo si’i tamo napowatua ntau. Tau etu yako ri kota Kirene pasi kota Aleksandria pasi yako ri propinsi Kilikia pasi Asia. Wali tau etu semo to mangabanta i Stepanus.
10Pei sira taa nakoto manganangi ia, apa ia nawaika i Nosa Mapasing kapande tempo ia mampogomboka sira.
11Wali yako etu sira mangamomis bara sawei mba’a tau see sira manganto’o gombo to taa monso ri tango ntau boros. Wali tau etu mampakasala i Stepanus, sira manganto’o, “Kami re’e mangandonge ia manto’o maja’a i Musa pasi i Pue Allah.” Wali etu semo gombo nsira mampakasala i Stepanus.
12Wali gombo nsira etu mampakaja’a kojo raya ntau boros pasi tau tu’a nto Yahudi pasi tau to mampoguru porenta i Musa. Maja’a kojo raya nsira resi i Stepanus, see naka sira mangampago pei mangansoko ia. Panewa sira mangkeni ia mampotango to pobotus nto Yahudi.
13Pasi sira mangkeni seja matamanasa to taa monso etu. Tau etu manganto’o, “Ngkai si’i tare pandoonya manto’o maja’a banua i mPue Allah pasi porenta i Musa.
14Apa kami re’e mangandonge gombonya manganto’o i Yesu to Nasaret etu Ia damangabungkas yau banua i mPue Allah, pasi damangawali yau ada to nawaika i Musa resi kita.”
15Wali ojo karoonya matamanasa to taa monso etu magombo, samparia to pobotus to nasiromu nja’u ria, sira mangalo’aka resi i Stepanus. Tempo sira mangalo’aka ia etu, sira mangkita lionya mareme ewa lio mpomakau i mPue Allah.