Dual Panel1Wali i Saulus to mangajagang pake ntau to mampopate yau i Stepanus etu, ia singkonong seja i Stepanus rapopate yau. Wali ojo pampopate yau i Stepanus etu, ma’i tau to mampalaika kojo i Pue Allah saba manga’angga Ia. Sira mangoko lemba i nStepanus panewa mampongkeli yau. Sira mangantangis kojo ia apa mawo kojo rayanya. Pasi ri eo etu semo tau to taa mangaya sira mula mangansesai kojo tau to mangaya ri Yerusalem. Wali see naka tau to mangaya etu samparia tiga’as yau, jamo patanya pomakau i mPue Yesu to re’ewa ri kota etu. Wali sira to tiga’as yau etu sira yau njo’u lipu-lipu ri sambawo propinsi Yudea pasi Samaria.
2(8:1)
3Pei i Saulus, ia tare pandoonya mangansesai tau to mangaya. Ia masua ri raya banua nsira samba’a pei samba’a panewa i sema to mangaya i Yesu bara to langkai, bara to we’a, tau etu ia mangansoko pei mangaditi rakeni daratarungku.
4Pei tau to mangaya to natiga’as yau etu, imba nakanjo’u nsira sira mampakarebaka tau tuntu i mPue Allah.
5Pasi re’e samba’a tau to sanganya i Pilipus ia yau seja njo’u kota ri propinsi Samaria. Nja’u ria ia mampakarebaka tau boros mangkonong i Kerisitu, Makole parajanji i mPue Allah.
6Pasi ia mangika palaong to taa rapobiasa to mawali tondong resi tau boros etu. Wali tempo tau boros etu mangandonge gombonya pasi mangkita palaonginya etu, sira mampodongeka kojo anu to ia manganto’o.
7Apa ia mangarubak yau measa yako boros tau to naposuak measa. Tempo measa narubak i mPilipus etu, tau to naposuak maroso loonya kaboo-boo naika measa etu. Pasi i Pilipus ia re’e seja mampakatao muni boros tau to malulu koronya pasi to sampungku.
8Wali tau to nja’u kota etu sira ndende kojo rayanya.
9Pei ri kota etu re’e samba’a tau to sanganya i Simon. I Simon etu tau to kapake pasi masaemo sangkodi ia mangika palaong to mampakaipu raya nto Samaria. Ia manganto’oka sira, “Aku si’a ojo tau to biasa.”
10Wali tau nja’u ria to bosemo pasi to mayunuwa, sira paka mampodongeka kojo anu to nato’o i nSimon etu. Sira manganto’o, “Tau si’i semo to rato’oka Kuasa i mPue Allah to Bae.”
11Wali sira mampodongeka kojo ia apa masaemo sira ipu kojo rayanya mangkita palaong to ia mangika ri kuasa to yako kapake to re’e resi ia.
12Pei i Pilipus mampakarebaka resi sira kareba matao mangkonong ewa wimba i Pue Allah mawali Makole nto lino pasi mangkonong i Yesu Kerisitu. Wali tempo ia mampakarebaka resi sira etu pasi to langkai pasi to we’a sira paka mangaya pei rabaptis.
13Wali i Simon to kapake etu ia mangaya seja pasi ia rabaptis. Ojo karoonya ia rabaptis ia mangalulu i Pilipus, panewa ia mangkita i Pilipus mangika palaong to taa rapobiasa pasi to mawali tondong resi tau. Wali tempo ia mangkita palaong to nika mPilipus etu ia ipu kojo rayanya.
14Wali yako etu pomakau i mPue Yesu to re’e ri Yerusalem sira mangandonge kareba mangkonong to Samaria. Re’e tau manganto’oka sira, “To Samaria sira seja mampodongeka tuntu i mPue Allah.” Wali ojo pandonge mpomakau i mPue Yesu kareba etu sira mampokau i Petrus sira dua i Yohanes yau resi to Samaria etu.
15Wali sira dua yau mampokaika to Samaria etu see sira seja damangarata i Nosa Mapasing,
16apa i Nosa Mapasing tawa rata resi sira. Sira owo rabaptis mangika tondong sira i Pue Yesu puenya.
17Wali i Petrus dua Yohanes mamposaka palenya ri wawo nto Samaria to mangaya etu panewa to Samaria etu sira seja mangarata i Nosa Mapasing.
18Wali i Simon to kapake seore etu ia mangkita i sema-sema to napotaka i mPetrus sira dua i Yohanes, tau etu mangarata i Nosa Mapasing. Wali ia mangkeni doi resi i Petrus sira dua,
19ia manganto’o, “Waika aku seja kuasa etu see i sema-sema to dakupotaka, tau etu damangarata i Nosa Mapasing.”
20Pei i Petrus manganto’oka ia, to’onya, “Gete korom! To tao-tao korom pasi doimu rapakaja’aka yau apa korom mampobuuka sora i mPue Allah maya raolika doi!
21Korom taa masipato mangika seja palaong to kami mangika si’i, apa rayamu taa singkonong pei i Pue Allah.
22Wali ndolika tangomu yako lengkomu to maja’a etu pei pakai-kai resi i Pue see Ia bara tamo mangkitanaka sala ngkorom, etu semo pampobuukamu to maja’a etu.
23Apa aku kunsani korom timopo kojo rayamu pasi kaloo. Pasi ewa rapanya tau to napowatua ntau to maja’a, tau etu sangkani mangika seja palaong to maja’a mangalulu pamporani ntau puenya etu. Wali ewa wetu seja korom, apa korom ewa napowatua nu dosa see naka sangkani mangika dosa.” Etu semo gombo i mPetrus manganseko i Simon.
24Wali yako etu i Simon mamporapika resi i Petrus sira dua i Yohanes, ia manganto’o, “Pakai-kai resi i Pue pei porapika resi Ia see aku taa damangarata kasesa to room nuto’o ngkomi aku damangarata.”
25Wali yako etu, ojo karoonya i Petrus sira dua i Yohanes mampotundeka pasi mampakarebaka tau nja’u ria tuntu i mPue, roo see sira mawolili muni ndeku Yerusalem. Ri raya mpalinja nsira dayau muni ri Yerusalem etu sira liu mandoo ri boros kampu nto Samaria mampakarebaka kareba matao mangkonong i Yesu.
26Wali yako etu re’e samba’a pomakau i mPue Allah mampogomboka i Pilipus, ia manganto’o, “Pakaroso pei inta tondo njo’u selatan mangampago jaya to tamo boros tau mangampake, jaya to yako nda’a Yerusalem rata lo’u kampu Gasa.”
27Wali yako etu i Pilipus mampakaroso pei yau mampago jaya to room nato’oka mpomakau i mPue Allah ia. Rata nja’u jaya etu ia mangkita samba’a tau to Etiopia liu ri jaya etu dayau muni njo’u lipunya. Ngkai etu tau to bae angganya to mampasilonga samparia kasugi makole nto Etiopia. Makole etu makole to we’a to sanganya i Kandake. Wali tau Etiopia to nakita mPilipus ri jaya etu ia owo room mampue resi i Pue Allah nda’a Yerusalem apa ia mampakabae i Pue Allah.
28Wali ia mapone bendi mawolili muni njo’u lipunya. Pei tempo ia matunda ri raya bendi etu ri jaya ia mangabasa buku to natulis nto pantuntu tuntu i mPue Allah tempo owi, i Yesaya.
29Wali tempo i Pilipus mangkita tau etu, i Nosa Mapasing mampogomboka ia, Ia manganto’o, “Inta pei pamosuk bendi etu.”
30Wali i Pilipus maripo yau mampago bendi etu. Ojo karatanya ri awe bendi, ia mangandonge tau Etiopia etu mangabasa buku to natulis nto pantuntu tuntu i mPue, i Yesaya. Wali ia mampotanaka resi tau etu, to’onya, “Pa’a, wimba bara nunsani ngkomi batuanginya buku to nubasa ngkomi etu?”
31Wali tau etu mangansono, ia manganto’o, “Wimba dakuika mangansani ane tare tau to mampakanasaka aku?” Wali yako etu ia manganto’oka i Pilipus, “Papone mai pei patunda ri awengku si’i.” Wali i Pilipus mapone ri bendi etu.
32Wali si’i semo gombo i Yesaya to nabasa nto Etiopia etu, to’onya, “Ia ewa domba to rakeni darasimbale. Pasi ewa ana nu domba to taa mamoni tempo rapu’ak wuyunya, ewa see seja Ia taa manganto’o bara kesaa.
33Ia narunes ntau pasi tempo tau mangabotus Ia, taa kono botu nsira etu. Ia rapopate yau, wali tamo tuwu ri oyo nto lino. Wali tare tau to maya manganto’o, ‘Si’i wiyaaNya.” Etu semo gombo i Yesaya to nabasa nto Etiopia.
34Wali to Etiopia etu manganto’oka i Pilipus, to’onya, “Sawang pei pakanasaka aku mangkonong gombo i Yesaya si’i. Gombo Yesaya bara mangkonong koronya bara mangkonong tau to yusa?”
35Wali i Pilipus mampakanasaka ia. Ia mula yako ri gombo i Yesaya to owo room rabasa etu panewa mampakarebaka ia kareba matao mangkonong i Yesu.
36Panewa yako etu, ri raya mpalinja nsira ri jaya etu, sira rata ri tampa to nja’u ue. Wali to Etiopia etu ia mangkita ue wali ia manganto’oka i Pilipus, to’onya, “Lo’aja etu ue. Wimba, bara re’e sabanya naka pei aku taa maya rabaptis?”
37Wali i Pilipus manganto’o, “Ane komi monso pu’u mangaya i Pue Yesu, komi maya rabaptis.” Panewa to Etiopia etu manganto’o, “Kuaya i Yesu Kerisitu Ia semo Ana i mPue Allah.”
38Wali yako etu ia manganto’oka tau to mangkeni bendi etu mandoo panewa sira dua i Pilipus mana’u pei yau lo’u ue. Ojo karata nsira dua la’u raya nue etu, i Pilipus mangabaptis ia.
39Yako etu ojo pasuwu nsira dua yako ri ue i Nosa Mapasing mansaka mangkeni yau i Pilipus. Wali to Etiopia etu tamo mangkita ia, pei ia masanang kojo rayanya jamo polas njo’u lipunya.
40Pei i Pilipus ia kodi majoli nja’umo nja’u kota Asdod. Wali yako Asdod etu ia polas wo’u yau njo’u kota Kaisarea. Pei ri raya mpalinjanya etu ponto-ponto kota to nakarata ia mampakarebaka tau nja’u ria kareba matao mangkonong i Yesu.