Dual Panel1Wali ri tempo etu boros kojo tau to mangansarita mangkonong palaong to naika i Yesu. Pasi i Makole Herodes mangandonge seja sarita to etu.
2Wali ia manganto’oka to papolaonginya, to’onya, “Tau etu i Yohanes to Pombaptis rawangu muni yako ri kapatenya. See naka Ia nakoto mangika palaong to taa rapobiasa etu.”
3Naka pei i Herodes ewa wetu pampobuukanya apa saba palaong to nawali seore. Wali ewa si’i palaong to nawali etu. Re’e seore i Herodes mangoko yau indo nu ana i mPilipus, tua’i i Herodes semo. Wali i Herodes mamporongo wo’u tau we’a etu to sanganya i Herodias. Wali ojo pangandonge i Yohanes mangkonong palaong to etu, ia yau resi i Herodes pei manganseko ia, to’onya, “Taa matao palaong to nuika ngkomi apa komi roomo mangoko yau indo nu ana ntua’imu. Pei ane ewa porenta i mPue Allah, taa maya tau mangika palaong to etu.” Ewa wetu nato’o i Yohanes manganseko i Makole Herodes. Wali ojo pangandonge i Herodes gombo i Yohanes etu, ia maja’a rayanya resi i Yohanes, see naka ia rani mampopate yau ia. Pei ia taa mangika ri tempo etu apa ia meka resi tau boros, apa tau boros mampobuuka i Yohanes ia samba’a to pantuntu tuntu i mPue Allah. Wali i Herodes ojo mampokau tau mangansoko i Yohanes panewa mangantarungku ia.
4(14:3)
5(14:3)
6Wali yako etu re’e seore i Herodes mangika roa mangendo eo ngkare’enya. Wali tempo roa etu re’e samba’a ana i Herodias, ia ana we’a, ana woku i Herodes, ia manari-nari ri tango i Herodes pasi ri tango nto pantako to boros. Tempo ia manari etu ia mampakasanang kojo raya i Herodes.
7See naka i Herodes maroso kojo rayanya mamparajanjika tau we’a etu, to’onya, “Kesaa to nuporani, to’oka aku, aku damangawaika korom.”
8Wali tau we’a etu manganto’oka i Herodes gombo to nato’oka nu indonya ia, ia manganto’o, “Wo’o i Yohanes to Pombaptis kuporani. Kenika aku pasaka nja’u raya ndula meja.”
9Wali i Herodes soso rayanya, pei ia roomo mamparajanjika ananya etu, pasi to pantako boros re’e seja mangandonge parajanjinya etu. Wali see naka ia mampokau tentaranya yau mangabanang pamporani nu ana we’a etu.
10Wali tentara etu yau mangampu’ak yau wo’o i Yohanes nja’u raya ntarungku.
11Panewa wo’onya etu ia mangkenika ana i Herodias nja’u raya ndula meja. Wali ana we’a etu mangoko pei mangkenika indonya.
12Wali yako etu anaguru i Yohanes sira mangandonge i Yohanes roomo rapu’ak yau wo’onya, wali sira yau mangoko lembanya yako ri raya ntarungku. Panewa lembanya etu sira mampongkeli yau. Roo see sira yau njo’u rano Galilea pei mampakarebaka resi i Yesu mangkonong kapate i Yohanes. Wali ewa wetu semo palaong to nawali seore, tempo ngkapate i Yohanes etu.
13Wali ojo pangandonge i Yesu mangkonong kapate i Yohanes etu, Ia pasi kami to anaguruNya mapone ri bangka damawote njo’u lipu to tare tau mangkaroos. Pei ojo pangandonge ntau boros i Yesu Ia mayokomo, sira mampiyaika kota nsira samba’a pei samba’a. Sira yau mangalulumaka Ia, sira malinja mbiti mangalilit rano etu.
14Wali ojo kadongka mami ri sambote ndano, i Yesu mana’u yako ri bangka. Roo see Ia mangkita tau boros ma’i mampago Ia. Wali Ia mamporayang sira pasi mampakatao muni sira to masaki.
15Wali yako etu ojo kawenginya rao, kami to anaguru i Yesu yau resi Ia pei manganto’o, “Rao si’i mawengimo pasi lipu si’i tare tau darapangoli pangkoni. Wali pokau tau boros etu yau njo’u kampu-kampu damangoli pangkoni.
16Pei i Yesu mangansono, “Nempo sira taa yau. Komi semo mangawaika sira pangkoni.”
17Wali kami manganto’o, “Gete! Pangkoni to re’e resi kita jamo lima mpa’i roti pasi dua mba’a bau.”
18Wali i Yesu manganto’o, “Kenika mai Aku.” Wali kami mangkenika Ia.
19Roo see Ia manganto’oka tau boros matunda ri wawo ntarempas. Wali sira matunda. Yako etu i Yesu mangoko roti lima mpa’i pasi bau dua mba’a etu, panewa Ia matingoa pei makai-kai manganto’oka i Pue Allah tarima matao. Ojo karoonya Ia makai-kai Ia mangampesu-mpesutimo roti etu panewa mangawaika kami to anaguruNya. Wali kami mangoko pangkoni etu panewa mangampookoka resi tau boros. Pasi ewa wetu seja inikaNya resi bau.
20Wali sira samparia mangkoni paka mabosu. Ojo karoonya sira mangkoni, kami to anaguru i Yesu mangamporomung toro mpangkoni etu. Wali toro mpangkoni to naporomung mami etu dasampuyuwa pei dua karanji nabuke.
21Wali tau to mangkoni etu, lima nsowu kaborosinya owo to langkai, tawa manto’o to we’a pasi ngana mayunu.
22Wali ojo karoonya i Yesu mampokoni tau boros etu, Ia mampokau kami to anaguruNya mapone ri bangka, Ia manganto’o, “Patiruyu komi mawolili njo’u sambote ndano. Aku damampokau muni tau boros si’i.” Wali kami mayoko pasi i Yesu manganto’oka tau boros, “Inta muni njo’u lipu ngkomi.”
23Wali ojo karoonya Ia mampokau sira yau muni njo lipunya etu, Ia mandake ngkalionya nto’u pantana yau damakai-kai. Wali tempo Ia ndatewa ndate pantana etu rao mawengimo.
24Pei tempo etu bangka mami longkomo yako ri wii ndano pasi kanggoli-nggoli naika nu bombang, apa ngoyu marimbo yako ri tangonya.
25Wali yako etu ojo kamosueonya i Yesu ma’i mangampago kami to anaguruNya, Ia malinja ri wawo nu ue.
26Wali tempo kami mangkita Ia malinja ri wawo nu ue etu, kami meka kojo raya mami see naka kami sakaboo. Kami manganto’o, “Etu wonggo!”
27Pei i Yesu mansaka manganto’oka kami, “Ee, pakasanang raya ngkomi! Ne’e meka, Aku sei.”
28Wali i Petrus manganto’o, “Ane monso pu’u Komi etu Pue, to’oka aku yau resi Komi malinja ri wawo nu ue si’i.”
29Wali i Yesu manganto’oka i Petrus, “Maimo.” Wali i Petrus mana’u yako ri bangka, ia malinja ri wawo nu ue etu yau mangampago i Yesu.
30Pei tempo ia mangkita ewa wimba kabosenya bombang, naika nu ngoyu marimbo, ia meka rayanya, wali ia damalodongimo. See naka ia kaboo manganto’o, “O Pue, palaes aku!”
31Wali i Yesu mansaka mangaranga resi i Petrus pei mangoko ia. Ia manganto’o, “Maka pei batabata rayamu? Taa kojo maroso pangayamu resi Aku.”
32Wali roo see sira dua mapone ri bangka. Ojo papone nsira ri bangka, ngoyu marimbo mandoo.
33Wali kami to anaguru i Yesu to re’e seja ri raya bangka etu, kami mampue mampakabae Ia, kami manganto’o, “Monso pu’u Komi ana i mPue Allah.”
34Wali ojo pawote mami rano etu, kami dongka nja’u lipu Genesaret, panewa mana’u yako ri bangka.
35Wali tau Genesaret etu sira mangkita pasi mangansani i Yesu semo to rata. See naka sira mampokau tau yau mampakarebaka resi samparia tau ri lipu-lipu to ri awenya mangkonong karata i Yesu. Wali yako etu ma’i tau mangkenika i Yesu samparia tau to masaki.
36Sira mamporapika kojo resi i Yesu see tau to masaki etu maya mampotaka nempo ojo ri wii nu mpakeNya. Wali i Yesu Ia mangabiaka tau to masaki mampotaka wii nu mpakeNya, panewa samparia sira to mampotaka ri wii nu mpake i Yesu etu, sira rapakatao muni.