Dual Panel1Wali taa masae yako etu, kami to anaguru i Yesu yau mangampago Ia. Kami mampotanaka resi Ia, kami manganto’o, “I sema tau to bae kojo angganya ane ri oyo ntau to Makolenya i Pue Allah?”
2Wali i Yesu mampokio samba’a ana kodi to re’e seja ri raya banua etu see naka ana kodi etu mai makore ri awe i Yesu ri tongo mami.
3Panewa i Yesu manganto’o, “Aku manganto’oka komi, monso pu’u ane komi taa mangawali pampobuukamu pei mampolaika i Pue Allah ewa naika nu ana kodi si’i mampolaika tau tu’anya, ane ewa see komi taa damawali tau to Makolenya i Pue Allah.
4Wali ewa si’i panto’ongKu mangkonong angga ntau. Ane tau damawali tau to bae kojo angganya ane ri oyo ntau to Makolenya i Pue Allah, ane ewa see tau etu taa maya taa mampakakodi angganya pei mawali ewa ana kodi si’i.
5“Pasi re’e wo’u to Aku manganto’oka komi, etu semo, ane tau manga’angga nempo ojo ana kodi to ewa si’i apa saba ia mangalulu Aku, ane ewa see batuanginya tau etu manga’angga seja Aku.
6Pei i sema tau to mangika palaong to mampakaja’a pangaya nu ana kodi to mangaya Aku si’i, taa kojo matao. Tau to etu to tao-tao ia so’o watu to bae ri le’enya panewa panasok yau ri raya ntasi naka lodong yau.To tao-tao ewa wetu apa ane ia mampakaja’a pangaya ntau, gete, mapari wo’u huku to danarata!”
7Wali yako etu i Yesu manganto’o wo’u, to’oNya, “Bae kasesa to danarata ntau to mangagoda sa’e see naka tau to ragoda etu mangandolika tangonya yako ri pangaya nsira. Kamonsonya tare pandoonya tau to mangaya mangarata panggoda ri lino si’i, pei ane tau to mangagoda sira etu, tau etu bae kojo huku to danarata nsira.
8“Wali see naka Aku manganto’oka komi, ane rapanya pale bara witi ngkomi mampolengkoka pamporani ndayanya to maja’a, ane ewa see pakadota kojo mampandooka mangika palaong to maja’a etu. Kadota etu raporapaka ewa tau to mangampu’ak yau palenya bara witinya sambali pei mangantaji yau see napandooka mangika palaong to maja’a etu. Apa to tao-tao nempo jamo sambali palenya bara witinya pei ia mangarata katuwu to singkasaenya sakowa ia dua mbaliawa palenya pasi witinya ane ia damasua ri apu to singkasaenya mawea. Apa ane masua ri apu etu, nempo dua mbaliawa palenya pasi witinya masiasi kojo ia.
9Pasi ane mata ngkomi mangalo’aka anu to taa matao ralo’aka, ane ewa see pakadota kojo mampandooka mangalo’aka anu to maja’a etu. Kadota etu raporapaka ewa tau to mangansu’i yau sambali matanya etu pasi mantaji yau see napandooka mangalo’aka anu to taa matao ralo’aka etu. Apa to tao-tao jamo sambali matanya pei mangarata katuwu to singkasaenya sakowa ia dua mbaliawa matanya pei ane rataji yau lo’u apu naraka. Apa ane masua ri apu naraka, nempo dua mbaliawa matanya masiasi kojo ia. Wali jagai kojo naka ne’e mangalulu ane ragoda. Pasi ne’e seja mangagoda sa’e.”
10Wali yako etu i Yesu manganto’o, “Re’e tau to manganto’o ane tau to ewa ana kodi si’i, tau etu tare batuanginya. Wali jagai kojo naka ne’e komi mampobuuka seja ewa wetu. Apa Aku manganto’oka komi, kamonsonya bae kojo batuanginya tau to ewa ana kodi si’i, see naka re’e pomakau i mPue Allah yako ndate saruga to mangararamaka sira. Wali pomakau to mangararamaka sira etu, pomakau etu sangkani mampotango Pa’angKu ndate saruga. Wali sira mampasimbalika tau to nato’o nsa’e tare batuanginya etu.
11“Wali wimba pampobuuka ngkomi ane ewa rapa si’i? Rapanya re’e tau to pue domba to satu kaborosinya, pei samba’a dombanya etu pusa yau. Kesaa danaika mpue nu domba etu? Ia damampiyaika dombanya to sio mpuyu pei sio nja’u pantana pei dayau mangaliwu muni dombanya to pusa. Pasi ane ia mangarata domba etu ia masanang kojo rayanya. Aku manganto’oka komi, monso pu’u to sana-sanang tau etu mampobuuka dombanya to samba’a to narata muni etu sakowa mampobuuka dombanya to sio mpuyu pei sio to taa napusa yau. Wali ewa see seja pamporani mPa’amu to ndate saruga. Apa Ia taa rani pasiwa samba’a tau to ewa ana kodi si’i dapusa yau. Wali see naka Aku, Wiyaa nto Lino, ma’i ri lino si’i. Aku ma’i damampalaes tau to raporapaka ewa domba to pusa yau etu.”
12(8:11)
13(8:11)
14(8:11)
15Wali ojo karoonya i Yesu manganto’o rapa to etu, Ia manganto’o wo’u, “Ane bara re’e yunu to mangika sala resi komi, yau resi ia tempo tare tau to yusa pei pakanasaka ia salanya. Wali ane yunumu etu mampodongeka komi, komi dua damasingkatao muni.
16Pei ane ia bo’onya mampodongeka komi, ane ewa see yau wo’u resi ia pei sale yunumu samba’a bara dua mba’a. Wali tau to nusale ngkomi etu sira damangansabi pei mawali matamanasa tempo komi mampogomboka wo’u ia mangkonong salanya. Ika ewa wetu apa palaong etu singkonong ewa to ratulis ri raya ntuntu i mPue Allah to manganto’o, ‘Ane re’e dua mba’a bara togo mba’a tau to mawali matamanasa mangkonong palaong to mawali, ane ewa see manasa kojo palaong to etu monso pu’u mawali.” Etu semo to ratulis ri raya ntuntu i mPue Allah.
17Wali ane tau etu bo’onya seja mampodongeka yunu ngkomi etu, panewa to’oka wo’u taungKu to boros to mananya siromu nja’u lipumu. Panewa ane ia bo’onya seja mampodongeka paposia ntaungKu to boros mangkonong salanya etu, ane ewa see to tao-tao komi manga’angga ia sewaju ewa nuika ngkomi resi tau to taa mangaya bara resi tau to pantagi asele to taa nupogalungika ngkomi.
18“Wali Aku manganto’oka komi, i Pue Allah dasingkonong pei botu ngkomi mangkonong tau to sala etu. Apa monso pu’u samparia to nuto’o ngkomi taa masipato danaika ntaungKu ri lino si’i, to etu danato’o seja i mPue Allah ndate saruga taa masipato daraika. Pasi samparia to nuto’o ngkomi masipato danaika ntaungKu ri lino si’i, to etu danato’o seja i mPue Allah ndate saruga masipato daraika.
19“Wali ewa si’i seja dakuika mampakanasaka resi komi iPue Allah dasingkonong resi komi ane komi samba’a pampobuuka ngkomi. Wali rapanya re’e nempo ojo dua mba’aja komi to makai-kai resi Pa’angKu ndate saruga, pasi komi samba’a pampobuukamu mangkonong anu to nuporapi ngkomi resi i Pue Allah etu, ane ewa see Ia damangabanang pokai-kai ngkomi etu.
20Wali komi manasa pokai-kai ngkomi etu darapodongeka. Apa ane re’e tau to siromu apa saba mangalulu Aku, nempo ojo dua bara togo mba’a tau etu, Aku nja’u seja siwaka pei sira damangansawang sira.”
21Wali roo see i Petrus yau resi i Yesu pei mampotanaka resi Ia, to’onya, “Pue, ane yunungku mandudu ngkani mangika sala resi aku, sawei ngkani to masipato aku mangalapa salanya etu? Wimba bara gana ane pitu ngkani?”
22Wali i Yesu mangansono, Ia manganto’o, “Si’a ojo pitu ngkani to Aku manganto’o gana, pei pitu mpuyu kani pitu ngkani.
23“Wali naka pei matao komi mangalapa sala nu yunu ngkomi ewa wetu apa palaong to masipato naika ntau to i Pue Allah Makolenya maya raporapaka ewa si’i. Re’e samba’a makole to rani mangantagi inda yako resi to papolaonginya.
24Ojo pamulanya palaong to etu, re’e samba’a to papolaonginya to rakeni ri tangonya. To papolaong etu indanya yabi saro ntau sampuyu pei lima nto’u mapalaong.
25Pei ngkai etu taa nakoto mangabayar indanya etu. Wali see naka makole to puenya etu manganto’oka sa’e mampobalu yau ia damawali watua ntau, pasi pobalu seja indo nu ananya pasi ngananya pasi samparia ngaya-ngayanya. Panewa doi oli nsira etu darapake mangabayar indanya.
26“Wali ojo pangandonge ngkai etu gombo to nato’o makole, ia mambokotu yau ri tangonya pei mamporapika kojo resi ia, to’onya, ‘O Pue, sabaraka ruyu resi aku, aku damangabayar muni samparia indangku resi komi.’
27Wali makole to pue nto papolaong to etu mamporayang ia, see naka ia mampakalino indanya pasi mangabiaka ia yau.
28“Pei ojo pasuwu ngkai etu yako ri tango makole, ia mangarata samba’a yununya to papolaong makole seja. Yununya etu re’e inda resi ia. Indanya etu sewaju ewa saro ntau satu eo mapalaong. Wali ojo parata ngkai etu yununya to kainda resi ia etu, ia mangansoko pei mangangkoko ia, to’onya, ‘Bayar muni indamu resi aku!’
29“Wali yununya etu mambokotu ri tangonya pei mamporapika kojo resi ia, to’onya, ‘Sabaraka ruyu resi aku, aku damangabayar muni indangku resi korom.’
30Pei ngkai etu bo’onya mangampeas. Kasimbalinya yako etu, ia yau manganto’oka tau mangantarungku yununya etu sampe rata temponya ia nakoto mangabayar indanya.
31“Wali ojo pangkita nto papolaong to yusa palaong to mawali etu, sira masusa kojo rayanya. Wali see naka sira yau resi makole to puenya pei mangansaritaka resi ia mangkonong samparia palaong to mawali etu.
32“Wali makole mampokau tau yau mangangkeni to papolaonginya to nangika palaong to etu. Ojo karata ngkai etu, makole manganto’oka ia, to’onya, ‘Gete korom to papolaong to maja’a! Aku roomo mampakalino samparia indamu apa saba korom marapi kojo resi aku.
33See naka masipato korom mamporayang seja to papolaong to yunumu etu sewaju ewa aku mamporayang korom.’
34Wali makole to pue nto papolaong to etu ia maja’a kojo rayanya wali see naka ia mangawaika yau to papolaonginya etu resi tau to mangajagang tarungku daratarungku sampe rata temponya ia nakoto mangabayar muni samparia indanya. Wali etu semo rapa to kuto’oka komi.
35“Wali ewa wetu seja Pa’angKu to date saruga damangika resi komi ane komi taa buya rayamu mangalapa sala nu yunumu apa bae kojo sala ngkomi to Ia roomo mangalapas.”