Alkitab Mobile SABDA
[VER] : [TAA]     [PL]  [PB] 
 <<  Matius 24 >> 

1Wali ojo karoonya i Yesu mampogomboka tau etu ri raya ntongonata banua i mPue Allah, roo see Ia masuwu muni yako ri tongonata etu. Tempo Ia malinja yako nja’u ria, kami to anaguruNya yau resi Ia pei manganto’oka Ia, “Lo’aja ewa wimba kagayanya banua i mPue Allah pasi banua-banua to nja’u awenya etu!”

2Wali i Yesu manganto’oka kami, to’oNya, “Monso pu’u komi mangangkita samparia to magaya si’i. Pei Aku manganto’oka komi, monso pu’u banua i mPue Allah pasi banuabanua to ri awenya etu darapakaja’aka yau, pasi watu bose etu dararantamaka yau samparia. Tare pasi songu to taa darayali yau.”

3Wali yako etu i Yesu yau nto’u Tongku Saitun. Rata ndate ria Ia matunda-tunda ndate rapa ntongku etu. Tempo Ia matunda ndate ria, kami to anaguruNya yau mangampago Ia tempo tare tau to yusa. Kami manganto’o, “To’oka kami, bara mpia temponya danapowali anu to Komi room manganto’oka kami mangkonong banua i mPue Allah darapakaja’aka yau? Pasi kesaa damawali tondong resi kami mangkonong kama’i ngKomi pasi mangkonong kapuranya temponya to si’i?”

4Wali i Yesu mangansono, “Pakatao kojo see komi taa natipu ntau mangkonong temponya Aku dama’i muni ri lino.

5Apa dama’i boros tau to damampoanika Aku, sira damanganto’o samba’a pei samba’a, to’onya, ‘Aku semo i Makole parajanji i mPue Allah.’ Wali malagi tau to danatipu nsira.

6Pasi tempo Aku tawa ma’i muni, tempo etu komi damangandonge seja kareba mangkonong tau masimusu re’e lipu to mosu pasi re’e lipu to longko seja. Pei tempo komi mangandonge kareba etu, ne’e masusa apa palaong to etu yako ri songka i mPue Allah wali taa maya taa mawali. Pei ane tempo etu si’awa temponya to dapura samparia.

7Apa tiroowa re’e palaong to damawali. Wali re’e tau to samba’a bansa damasimusu pei tau yako ri bansa to yusa. Pasi re’e seja tau to samba’a makole damasimusu pei tau to samba’a makole to yusa. “Pasi re’e wo’u palaong to damawali ri tempo etu, etu semo lengko tana pasi oro pasi panyaki to mapari kojo, wali samparia palaong to etu damawali ri malagi lipu ri lino si’i.

8Wali palaong to damawali etu, etu semo pamula kasesa to danarata nto lino. Palaong to etu raporapaka ewa ntida to narata ntau we’a tempo ia owo mula moana, apa yako etu kanjo’u-njo’u kapari-pari ntida danaepe ntau we’a etu sampe ratamo temponya ia roomo moana.

9“Wali ane ratamo tempo kasesa etu komi darasoko pasi darawaika yau resi tau to damangansesai pasi damampopate yau komi. Pasi komi damaja’a nakita ntau samparia bansa apa saba komi mangalulu Aku.

10Pasi tempo etu boros tau to damamposaka yau pangaya nsira. Sira damamposora yau yunu nsira pasi maja’a danakita yunu nsira samba’a pei samba’a.

11Pasi boros to pantuntu tuntu to taa monso to damasuwu tempo etu. Sira damangantipu boros tau.

12Wali tempo etu kanjo’u-njo’u kapari-pari kaja’a nu lengko ntau. Wali see naka boros tau to tamo nakurang mamporayang sa’e.

13Pei tau to mangainsoka kasesa etu sampe rata tempo kapuranya, tau etu darapalaes pei damangarata katuwu to singkasaenya.

14Pasi kareba matao si’i mangkonong ewa wimba i Pue Allah damawali Makole nto lino darapakarebaka njo’u sambawo lino see tau samparia bansa maya mangansani. Wali ojo karoonya tau samparia bansa mangandonge kareba matao etu panewa darata kapuranya temponya to si’i.”

15Wali roo see i Yesu mampakapolas mampakanasaka wo’u kami to anaguruNya mangkonong palaong to damawali tondong mangkonong kapuranya temponya to si’i. Ia manganto’o, “A’i-a’i, pobuuka palaong to nato’o yami nto pantuntu tuntu i mPue Allah tempo owi, i Daniel. Apa i Daniel etu manganto’o ane ri tempo to darata dama’i samba’a tau to maja’a to damampoanika i Pue Allah. Wali ia damakore ri tampa to nato’o i mPue Allah Iaja puenya, to ndate Yerusalem. Wali see naka tampa etu damawali makarika ri pangkita i mPue Allah, wali danapiyaika yau i mPue Allah pasi darapakaja’aka yau. Wali ane nukita ngkomi palaong to etu, piyaimo komi to re’e ri propinsi Yudea, piyai nto’u tongku.(Wali komi to mangabasa gombongKu si’i, pobatuangka kojo.)

16(24:15)

17Pasi ane re’e tau to ri sambali banuanya, pakajoli pana’u pei piyai. Ne’emo masua ri raya banua damangoko ngaya-ngaya to darakeni.

18Pasi ane bara re’e tau to nja’u nawu, ne’emo mawolili yau mangoko jubanya. Piyaimo nto’u tongku.”

19Wali i Yesu manganto’o wo’u, “Kuporayang kojo tau to mangkeni koro pasi tau to bara re’e ana kodi to mansusu ane rata tempo to etu, apa mandasai kojo sira miyai.

20Pei pokai-kai see palaong etu taa damawali tempo uja pasi loto, bara kono ri eo rapandoo.

21Apa tempo danapowali ngkasesa etu, mandasai pasi mapari kojo naepe ntau. Pasi kasesa etu semo to pari-pari wo’u pei kasesa to room narata ntau yako ri tempo lino si’i rapapowali rataka ri tempo si’i. Pasi ane roo kasesa to etu, tamo re’e tau to damangarata wo’u kasesa to ewa wetu kaparinya.

22Pei nempo mapari kojo kasesa etu, pei i Pue Allah damamporayang tau, see naka Ia damanganto’o, ‘Aku taa damangabiaka tau etu masae kojo mangarata kasesa. Wali Aku damampakapodo tempo ngkasesa etu.’ Wali etu semo to danaika i mPue Allah. Apa ane Ia taa mangika ewa wetu, tare to lino to darapalaes yako ri kasesa etu. Wali i Pue Allah mampakapodo tempo ngkasesa etu apa Ia mamporayang tau to Ia roomo mangampilis.

23“Wali tempo powalinya palaong to maja’a etu, ane re’e tau to manganto’oka komi, ‘Lo’aja, si’i semo i Kerisitu, Makole parajanji i mPue Allah!,’ pasi ane re’e tau to manganto’o, ‘Etu semo Ia!,’ ne’e mangaya gombo ntau etu.

24Apa ri tempo etu boros tau to damangawutis tau, sira manganto’o, ‘Aku semo i Kerisitu, Makole parajanji i mPue Allah.’ Pasi re’e seja to manganto’o, ‘Aku semo to pantuntu tuntu i mPue Allah.’ Tau etu sira damangika palaong to taa rapobiasa to mawali tondong resi tau, pasi palaong to mampakaipu raya ntau. Sira mangika palaong to etu apa sira mampobuuka bara maya mangantipu yau tau, nempo tau to natipu etu tau to roomo napilis i mPue Allah.

25Wali padongeka kojo, apa Aku roomo mampakanasaka yami komi palaong to damawali ri tempo etu see komi taa daratipu mangkonong temponya Aku dama’i wo’u.

26“Wali a’i-a’i, Aku manganto’oka wo’u komi, ane re’e tau manganto’oka komi, ‘Lo’aja, nja’u i Kerisitu nja’u pada bone,’ ane ewa see nato’o ntau, ne’e yau mangalo’a. Pasi ane re’e tau to manganto’o, ‘Lo’aja, Ia masaya ri raya nsongi to sire,’ ane ewa see nato’o ntau, ne’e seja raaya.

27Apa tempo Aku, Wiyaa nto Lino damawolili muni, tempo etu damanasa kojo resi to lino. Apa kama’ingKu etu maya raporapaka ewa bilak, apa nempo nja’u tondo mata nu eo bilak etu, mareme seja rata nja’u tondo kasoyo nu eo. Wali kama’ingKu danakita seja ntau samparia.

28“Wali kita re’e ligi to manganto’o, ‘Imbare nakare’e anu to mate, nja’u ria seja nakasiromu tonsi to rato’oka papaa.’ Wali monso pu’u, ane kita mangkita tonsi papaa etu, kita mangansani nja’u ria re’e anu to matem. Pasi ewa see seja, ane mangkita palaong to Aku roomo mampakanasaka komi etu, komi damangansani darata ri kapuranya temponya to si’i.”

29Wali yako etu i Yesu manganto’oka wo’u kami, Ia manganto’o, “Ojo karoonya kasesa tempo etu, ‘mata nu eo damawali mawuri pasi wuya tamo seja re’e remenya. Pasi batu’e damaranta yako ndate yangi pasi samparia to ndate yangi singkayame ewa anu to ranjongko.’

30“Wali tempo etu damiyala ndate yangi tondong to mampakanasaka resi to lino Aku, Wiyaa nto Lino, dama’imo. Wali to lino to samparia bansa damangkita tondong etu. Wali ojo pangkitanya tondong etu, sira samparia datumangi kojo apa manasa resi sira tamo masae sira darahuku. Panewa yako etu sira damangkita Aku, Wiyaa nto Lino, ma’i ri raya limu ndate yangi. Pasi tempo Aku dama’i etu, bae kojo kuasangKu pasi kayawangKu.

31Tempo etu loo ntarompet to maroso kojo daradonge, pasi tempo etu semo Aku damampokau pomakaungKu yako ndate saruga yau damampasiromunaka tau to Aku room mampilis. Sira damampasiromunaka tau etu yako ponto lipu ri sambawo lino. Bara imba-imbare lipu ntau to Kupilis etu, yako nja’u ria sira darapasiromunaka.”

32Wali yako etu i Yesu manganto’oka kami rapa, Ia manganto’o, “Pobuukaja mangkonong ewa kaju ara, pasi pobatuangka. Rapanya, kaju etu ane mosumo tempo eo ia damalonde. Wali tempo kita mangkita kaju etu malonde muni, kita tansani mosumo tempo eo. Wali kaju ara etu mawali tondong to mampakanasaka kita mosumo tempo eo.

33Pasi ewa see seja palaong to Aku room mampakanasaka komi mangkonong anu to mawali ndate yangi. Palaong etu seja damawali tondong resi komi apa ane komi mangangkita samparia palaong to Kuto’oka komi etu damawalimo, wali komi mangansani tamo masae Aku dama’i. Aku mosu kojo dama’i tempo etu, ewa tau to ratamo ri tango mbombo banua.

34Aku manganto’oka komi, monso pu’u tau to tuwu ri tempo tondong-tondong etu mawali, re’e to tawa damate sira damangkita samparia palaong to Aku manganto’o si’i.

35Yangi pasi lino dapura yau, pei kuasa nu gombongKu taa dapura.”

36Panewa i Yesu mampakapolas gomboNya, Ia manganto’o, “Kita tansani damawali kojo palaong to Aku room manganto’oka komi, pei tare tau to mangansani bara eo kesaa pasi bara jam sawei danapowali mpalaong to etu. Nempo pomakau i mPue Allah ndate saruga, sira taa seja mangansani temponya. Ojo patanya Pa’angKu, Ia semo mangansani.

37Ewa wimba palaong to nawali tempo i Nuh tempo owi, ewa see seja to damawali tempo Aku, Wiyaa nto Lino dama’i.

38Apa ane tempo i Nuh, re’e katawanya samal ue, tempo etu katuwu ntau ojo ewa biasa. Sira re’e mangkoni pasi manginu, pasi sira marongo pasi mampaporongo sa’e. Sira mangika palaong to etu sampe rata temponya i Nuh masua ri raya bangka bae.

39Pasi sira taa nansani palaong to damawali, pei kodi majoli ma’i samal ue panewa malodong yau sira. Wali ewa wetu seja tempo Aku, Wiyaa nto Lino, dama’i.

40Apa tempo etu rapanya re’e dua mba’a tau langkai to mapalaong nja’u nawu, samba’a sira darakeni pei yununya darabiaka nja’u ria.

41Pasi rapanya re’e dua mba’a tau we’a to mambaju, samba’a sira darakeni pei yununya darabiaka nja’u ria.

42“Wali ne’e ewa tau bayore. Kasimbalinya yako etu, jagai kojo ne’e lenga mangampeas kama’ingKu, see komi sangkani sigena ane Aku to Puemu kodi majoli ma’i. Apa komi taa nunsani tempo ngkama’ingKu etu.

43Pei pobuuka rapa si’i mangkonong to palima. Rapanya ane pue banua mangansani yami bara jam sawei danakama’i nto palima ri raya mburi, ia taa dayore pasi ia taa damangabiaka to palima etu mampakaja’aka yau banuanya see damasua damampolima yau ngayangayanya.

44Wali ewa naika ntau pue banua etu mangajagai kojo see sigena ane rata to palima, ewa see seja komi. Wali jagai kojo ne’e lenga mangampeas kama’ingKu see komi sangkani sigena, apa ri tempo komi taa mampobuuka bara dama’i Aku, Wiyaa nto Lino, tempo etu semo Aku dama’i.”

45Wali yako etu i Yesu manganto’oka kami rapa apa rani mampakaroso raya mami see kami madota mangampeas kama’iNya. Ia manganto’o, “Pobuuka, rapanya to papolaong to masipato rasarumaka pasi to pande, ane tau pue banua dayau njo’u longko, to papolaong to etu semo to nasarumakaka ntau puenya damampasilonga to papolaonginya to yusa. Wali to papolaong to rasarumaka etu ia semo to mangawaika pangkoni resi tau to maroo ri banua etu ane ratamo tempo mangkoni.

46Wali masanang kojo to papolaong to etu tempo karata muni ntau puenya ane tau puenya etu mangarata ia madota mangangika palaong to rasarumakaka resi ia.

47Wali Aku manganto’oka komi, monso pu’u to papolaong to masipato rasarumaka etu ia danato’oka ntau puenya, ‘Yako tempo si’i korom semo to mampasilonga samparia to Aku puenya.’

48Pei ane to papolaong etu tau to maja’a, ia bara damampobuuka, ‘O, masaewa panewa rata muni tau puengku.’

49Wali see naka to papolaong etu mula mangantidas yununya to papolaong seja. Pasi ia ojo mangkoni-ngkoni pasi manginu-nginu resi tau to panginu.

50Wali ane ewa see, kesaa to damawali resi ia? Ewa si’i damawali. Ane ratamo eo pasi jam to taa napobuuka nto papolaong etu puenya bara darata, tempo etu semo tau puenya darata.

51Panewa puenya mapari kojo danaika mangahuku ia panewa damamposaka yau ia nja’u tampa to masipato darapamposaka tau to ojo gombonya manoto. Wali nja’u ria tau tumangi-mangi pasi sakangke’i baganginya.”


  Share Facebook  |  Share Twitter

Download Audio MP3 (Matius 24):
Mobile (Low Quality) - CD (High Quality)

 <<  Matius 24 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel