Dual Panel1Wali i Yesu manganto’oka sira rapa, Ia manganto’o, “Rapanya re’e samba’a tau to mangika nawu danapampomuya anggur. Ojo karoonya ia mangika nawu etu, ia mampomuya anggur panewa roo see ia mangampampa yau nawu etu. Ojo karoonya ia mangampampa ia mangkeke wo’u wayau daraika tampa danapangalombu-lombu anggur etu see masuwu uenya. Panewa roo see ia mangawangu toal mangika tampa darapangajagai nawu etu. Wali ojo karoonya ia mangika palaong to etu ia mangawaika sawei mba’a tau damampasilonga nawu etu. Ia manganto’oka tau etu sira darawaika ntanapanya, etu semo sira darawaika santilaja yako ri wuanya, panewa kaborosinya wua nu anggur etu ia semo puenya. Wali roo see tau pue nawu etu ia mayoko dayau njo’u longko.
2“Wali ojo karatanya temponya wua nu anggur etu matasamo, tau pue nawu etu mampokau samba’a to papolaonginya yau njo’u to pangkampang nawu etu damangokoka ia wua nu anggur to si ia.
3Pei ojo karata nto papolaong etu, to pangkampang nawu sira mangansoko ia pei mangantidas, panewa manganto’oka ia pawolili muni resi tau puenya. Pasi tare wua nu anggur to nawaika nsira ia.
4Wali tau pue nawu etu mampokau wo’u to papolaonginya to yusa yau njo’u to pangkampang nawu etu. Pei ojo karata nto papolaong to etu, to pangkampang nawu sira mangabobak ia ri wo’onya pasi mangarunes panewa manganto’oka ia pawolili muni.
5Roo see tau pue nawu mangampokau wo’u to papolaonginya to yusa wo’u, pei ojo karatanya nja’u ria, to pangkampang nawu mampopate yau ia. Panewa yako etu boros wo’u to papolaong to napokau ntau pue nawu. Wali to papolaong to boros etu, sira samba’a pei samba’a rata resi to pangkampang nawu. Pei sangga’a nabobok nto pangkampang etu pasi sangga’a napopate yau nsira.
6“Wali yako etu tau pue nawu mampobuuka, ‘Jamo samba’a tau to maya kupokau, etu semo anangku to kuporayang. Wali aku damampokau ia yau njo’u to pangkampang nawu etu apa ane anangku si’i dakupokau, sira damanga’angga ia.’ Wali tau pue nawu mampokau ananya yau wo’u njo’u to pangkampang nawu.
7Pei ojo karata nu ana mpue nawu etu, to pangkampang nawu sira mangkita ananya etu, wali sira manganto’o samba’a pei samba’a, ‘Si’i semo tau to damangantima panta ntau pue nawu si’i. Anu kita mampopate yau ia see kita semo damangantima pantanya etu.’
8Roo see sira mangansoko ana mpue nawu panewa sira mampopate yau panewa lembanya napanasok yau nsira yako ri nawu anggur.”
9Wali ojo karoonya i Yesu manganto’o rapa etu Ia mampotanaka wo’u resi kepala-kepala nto pampue pasi yununya, Ia manganto’o, “Wali ane ewa pampobuuka ngkomi, kesaa danaika ntau pue nawu etu? Ewa si’i danaika, ia dayau resi to pangkampang nawu etu pasi damampopate yau sira panewa roo see ia damangawaika wo’u tau to yusa damampasilonga nawunya etu.
10Wimba, komi bara tawa re’e mangabasa gombo to ratulis nja’u raya ntuntu i mPue Allah? Gombo etu ligi mangkonong Makole parajanji i mPue Allah, Ia raporapaka ewa watu, wali gombo to ratulis etu manganto’o, ‘Re’e tau to mangawangu banua watu, tau etu mangantaji yau songu watu apa sira mampobuuka watu etu taa masipato rapake ri banua etu. Pei i Pue Allah mamporani watu etu semo to rapake mangawangu banua etu, see naka watu etu rapake muni. Wali i Pue Allah mangampake watu etu panewa watu etu semo to mawali yau watu to bae kojo batuanginya ri banua to etu.
11Wali i Pue semo nangika palaong to etu, wali ane ewa pampobuuka ngkita magaya kojo palaong to etu.’ Etu semo gombo to ratulis tempo owi. Wali komi semo to mampobo’o Aku etu.”
12Wali ojo pangandonge ngkepala-kepala nto pampue pasi tau to mampoguru porenta i Musa pasi tau tu’a nto Yahudi ligi to nato’o i Yesu etu, sira manasa batuanginya mangkonong sira semo. See naka sira rani kojo mangansoko Ia. Pei taa mawali apa sira mampokeka tau boros. Wali sira mawolili muni mampiyaika i Yesu.
13Wali yako etu kepalakepala nto pampue pasi tau to mampoguru porenta i Musa pasi tau tu’a nto Yahudi etu sira mampokau sawei mba’a to Yahudi to aliran Parisi pasi sawei mba’a joa i Makole Herodes yau resi i Yesu damangakal Ia see Ia dasala gomboNya. Wali tau to rapokau etu, sira yau mampago i Yesu.
14Rata resi Ia sira manganto’o, “Pa’a Guru, kami kunsani Komi tau to monso gomboMu. Pasi tempo Komi mampotundeka tau pamporani i mPue Allah, tempo etu ojo anu to monso to nuto’o ngKomi. Komi taa ojo mangamomis tau, ojo rani mampakasanang raya nsira. Wali manasa resi kami Komi taa mangampilis tau. Wali see naka kami rani Komi manganto’oka kami ewa wimba pampobuukaMo. Apa i Kaisar, makole nto Roma, ia mampakasaaka kita to Yahudi see kita mangabayar asele, pei palaong to etu bara taa matao raika ane ewa porenta i mPue Allah. Wali kami mampotanaka resi Komi, wimba ane ewa pampobuukaMo, bara singkonong pei porenta i Musa ane kita mangabayar asele resi makole nto Roma etu, bara taa?” Wali etu semo pampotanaka nsira rani mangakal i Yesu. Pei i Yesu Ia mangansani tau etu ojo gombonya to manoto. See naka Ia manganto’o, “Maka pei komi ojo rani mangakal Aku? Poraoka Aku sangkomba doi pera.”
15(12:14)
16Wali sira mangkenika Ia doi etu. Roo see Ia mampotanaka resi sira, to’oNya, “Gambar nsema to re’e ri doi si’i, pasi sanga nsema to re’e ratulis reria?” Wali sira mangansono, “Kaisar semo.”
17Panewa i Yesu manganto’oka sira, “Wali ane ewa see, waika i Kaisar anu to masipato rawaika ia. Pasi pampueka resi i Pue Allah anu to masipato rapampueka resi i Pue Allah.” Wali ojo pangandonge nsira gombo i Yesu etu, sira ipu kojo rayanya apa pande kojo pasonoNya etu.
18Wali yako etu ma’i seja sawei mba’a to Yahudi to aliran Saduki, sira ma’i resi i Yesu. Tau to etu ane ewa panto’o nsira tare tau to mambangu muni yako ri kapatenya. Wali ojo karata ntau etu resi i Yesu sira manganto’oka Ia,
19“Pa’a Guru, ane ewa porenta i Musa resi kita to Yahudi, ane to langkai ia marongo pei roo see ia mate yau taa riana, ane ewa see tukakanya bara tua’inya mangoko wo’u balunya etu. Wali ane sira dua re’e ana, ananya etu darato’oka ana ntau to namate yau etu. Ewa see porenta i Musa.
20Wali wimba ane ewa sarita si’i. Re’e pitu mba’a tau langkai to sintua’i. Wali re’e seo to tu’anginya ia marongo panewa ia mate yau taa riana.
21See naka tua’inya to tondanya mangoko yau balunya etu. Panewa roo see ia seja mate yau pei taa seja riana pasi ewa see seja tua’inya to katogo.
22Wali sira pitu samparia paka nawali ewa see. Paka mate yau taa riana. Panewa roo see tau we’a etu ia seja mate yau.
23Wali si’i pampotanaka mami resi Komi. Wimba ane re’e pu’u temponya tau samparia mambangu muni yako ri kapatenya, tau we’a etu, to imba tau pitu etu to darato’oka rongonya, apa sira pitu sintua’i paka re’e mamporongo ia?”
24Wali i Yesu manganto’oka sira, “Sala pampobuuka ngkomi apa komi taa mangansani batuanginya tuntu i mPue Allah pasi komi taa seja mangansani ewa wimba kabaenya kuasa i mPue Allah.
25Apa tempo tau mambangu muni yako ri kapatenya, tempo etu katuwu ntau etu damawali ewa katuwu mpomakau i mPue Allah ndate saruga. Pomakau etu sira taa marongo pasi taa seja rapaporongo, wali tau tempo etu tamo seja marongo.
26Pei mangkonong tau mambangu muni yako ri kapatenya, wimba, komi bara tawa re’e mangabasa nja’u raya ntuntu i mPue to natulis i Musa tempo owi mangkonong sarita tempo i Pue Allah mampogomboka i Musa yako ri raya njunju to mawea? Ia magombo mangkonong i Abraham sira togo i Ishak pasi i Yakub. Pei tempo Ia magombo mangkonong sira etu, tempo etu sira togo paka masaem kapatenya yau. Pei nempo ewa wetu Ia tiroo manganto’oka i Musa, Ia manganto’o, ‘Aku semo Allah to napue i Abraham, pasi to napue i Ishak, pasi to napue seja i Yakub.’ Etu semo gombo i mPue Allah resi i Musa tempo owi.
27Wali kita mangansani i Pue Allah Ia taa napue ntau to mate. Ia napue ntau to tuwu wali manasa nempo roomo namate yau koro i Abraham sira togo i Ishak pasi i Yakub, pei sira tiroowa tuwu ndate saruga apa nato’o i mPue Allah sira tiroowa mampue mampakabae Ia. Wali sala kojo komi mampobuuka tau tamo mambangu muni yako ri kapatenya.” Wali etu semo gombo i Yesu mangansono to Yahudi to aliran Saduki etu.
28Wali re’e seja nja’u ria samba’a tau to mampoguru porenta i Musa. Tau etu re’e mangandonge tempo to Yahudi to aliran Saduki masibanta pei i Yesu etu. Pasi ia mangandonge seja pasono i Yesu pande kojo. Wali ia mampotanaka resi i Yesu, ia manganto’o, “Pa’a Guru, to imba porenta i Musa to bae kojo batuanginya?”
29Wali i Yesu mangansono, Ia manganto’o, “Porenta to bae kojo batuanginya, etu semo porenta to manganto’o, ‘O to Israel, padongeka kojo! I Pue Allah Ia semo Pue ngkita. Ia samba’aja, tare Pue to yusa kasimbalinya yako Ia.
30Wali pakabae kojo pamporayang ngkomi resi i Pue Allahmu. Pasi biakamo pamporayang ngkomi resi Ia etu damampasilonga katuwumu. Pasi biakamo see yako pamporayang ngkomi resi i Pue Allah, see naka komi nupobuuka kojo Ia, pasi see naka komi mampakaroso rayamu mangika palaong to Ia mangawaika resi komi.’ Etu semo porenta to bae kojo batuanginya.
31Pasi si’i porenta to kadua, to’onya, ‘Porayang sa’e ewa raika mamporayang koro ngkalio.’ Wali tare yusa porenta to bae wo’u batuanginya pei porenta to dua etu.” Etu semo pasono i Yesu.
32Wali tau to mampoguru porenta i Musa etu, ia manganto’oka i Yesu, “Monso pu’u pasono mPa’a Guru. Apa monso pu’u i Pue Allah Ia samba’aja, tare to yusa kasimbalinya yako resi Ia.
33Wali see naka kita mampampueka resi Ia pampue to ratunju pasi pampue to yusa. Pasi bae batuanginya resi i Pue Allah ane kita mangika pampue to etu. Pei kamonsonya bae wo’u batuanginya resi Ia ane kita mangalulu porenta to dua etu. Etu semo kita mampakabae kojo pamporayang ngkita resi Ia panewa yako ri pamporayanginta etu see naka kita mampobuuka kojo Ia, pasi mangabiaka pamporayanginta resi Ia etu damampasilonga katuwu ngkita pei mampakaroso raya ngkita mangika palaong to Ia mangawaika resi kita. Pasi ane kita mamporayang sa’e ewa raika mamporayang koro ngkalio. Wali ane kita mangalulu porenta to dua etu, palaong to etu semo to bae-bae batuanginya resi i Pue Allah pei mangika pampue.”
34Wali i Yesu mangandonge matao kojo pasono ntau etu. Ia manganto’oka tau etu, “Korom mosu kojomo damawali tau to Makolenya i Pue Allah.” Wali yako etu tamo re’e tau to makoje rayanya mampotanaka bara kesaa wo’u resi i Yesu damangakal Ia.
35Wali tempo i Yesu re’e mampotundeka tau nja’u raya banua i mPue Allah, Ia manganto’o, “Tau to mampoguru porenta i Musa, sira re’e manganto’o i Kerisitu, Makole parajanji i mPue Allah, Ia ojo wiyaa i Makole Daud. Wali maka pei sira manganto’o ewa see?
36Monso pu’u Ia wiyaa i Daud, pei re’e gombo to nawaika i Nosa Mapasing i Daud to natulis i Daud ri raya ntuntu i mPue Allah tempo owi. Tempo etu i Daud magombo mangkonong i Kerisitu, ia manganto’o, ‘I Pue Allah magombo resi Puengku, Ia manganto’oka Puengku, to’oNya, “Patundamo ri awengKu ri sambali tondo ngkana sampe rata temponya Aku manganangi baliMu pei mangawaika Komi mangkuasang sira.”’ Etu semo gombo to natulis i Daud. Wali pobuuka ruyu batuanginya tempo ia manganto’o, ‘I Pue Allah manganto’oka Puengku’. Pobuuka gombonya etu apa si’i wo’u pampotanakangKu resi komi.
37Wali Makole parajanji i mPue Allah nempo wiyaa i Daud, pei i Daud tiroo manganto’oka Ia ‘Puengku’. Wali ane ewa see, wimba, Makole parajanji i mPue Allah etu Ia bara ojo wiyaa i Daud bara napowimba wo’u Ia?” Wali tempo i Yesu manganto’o gombo etu, boros kojo tau to mangandonge. Sira masanang kojo mangandonge gombo i Yesu etu.
38Wali yako etu i Yesu mampotundeka wo’u tau boros, Ia manganto’o, “Pakatao kojo tau to mampoguru porenta i Musa apa sira masanang kojo nabarong nsa’e. Tempo sira yau malinja-linja sira masanang kojo mangampake juba to marade to tondong ntau to bae angganya. Pasi sira masanang kojo natabea ntau tempo sira yau njo’u pasar.
39Pasi tempo sira yau ri banua to napampatunde nto Yahudi sira masanang kojo matunda ri gadera to napatunda ntau to bae angganya. Pasi ewa see seja ane yau mangkoni ri roa. Sira masanang seja matunda nja’u tampa to napatunda ntau to bae angganya.
40Pasi tau etu ojo mangantipu tau balu panewa mangoko yau kasuginya. Pei tempo sira makai-kai ri tango ntau, sira makai-kai masae kojo see matao nadonge nsa’e, pei tau etu ojo gombonya manoto. Wali see naka i Pue Allah damampakapari wo’u huku to danarata ntau etu.”
41Wali yako etu, tempo i Yesu re’ewa ri tongonata banua i mPue Allah, tempo etu Ia yau matunda ri tango mpeti to napamposaka ntau doi to rawaika resi i Pue Allah. Tempo Ia matunda ri tango mpeti etu Ia mangalo’a pei mangkita tau boros mamposaka doi ri raya mpeti etu. Boros tau to sugi sira bae doi naposaka.
42Pei yako etu ma’i seja samba’a tau balu to masiasi kojo, tau we’a etu mamposaka seja doi re’e ria. Doi to iposakanya etu dua ngkomba doi tambaga, doi to kodi kojo angganya.
43Wali i Yesu mampokio anaguruNya, Ia manganto’o, “Mai rire.” Wali sira yau resi Ia panewa Ia manganto’o, “Aku manganto’oka komi, monso pu’u ane ri pangkita i mPue Allah, anu to nawai ntau balu to masiasi etu semo to bae-bae batuanginya pei anu to nawai nsa’e.
44Apa samparia sira nempo bae doi naposaka etu, sira mangawai yako ri yabi ngkasugi nsira. Pei tau balu etu ia mangawaika yau resi i Pue Allah samparia doi to re’e resi ia. Wali see naka tempo si’i sakowa doi to danaolika pangkoni tamo re’e.”