Alkitab Mobile SABDA
[VER] : [TAA]     [PL]  [PB] 
 <<  Markus 8 >> 

1Wali yako etu re’e seore ma’i wo’u tau boros siromu mangampago i Yesu. Ojo kagananya togo mbengi sira nja’u nja’u ria, tau boros etu tamo re’e pangkoninya, wali i Yesu mampokio anaguruNya pei manganto’oka sira,

2“Aku mamporayang kojo tau boros si’i apa togo mbengimo sira sindara-ndara pei Aku, pei si’i-si’i puramo pangkoninya.

3Wali ane Aku mampokau sira mawolili muni njo’u lipunya pei sira taa mangkoni ruyu, sira damatewula ri jaya apa re’e to yako longko kama’inya.”

4Wali anaguru i Yesu manganto’o, “Lipu si’i taa re’e tau mangkaroos, wali kita tare jaya damangoli pangkoni. Wali yako imbare kita damangarata pangkoni to gana darapokoni tau to ewa si’i kaborosinya?”

5Pei i Yesu mampotanaka resi sira, Ia manganto’o, “Sawei mpa’iwa roti to re’e resi komi?” Wali sira mangansono, “Pitu mpa’i.”

6Wali yako etu i Yesu manganto’oka tau boros, “Patunda ri wawo ntana.” Roo see Ia mangoko roti pitu mpa’i etu panewa Ia manganto’oka i Pue Allah, “Tarima matao.” Roo see Ia mangampesumpesutimo roti etu pei mangawaika anaguruNya panewa sira mangampookoka tau boros.

7Pasi sira re’e seja bara sawei mba’a bau to mayunu. I Yesu mangoko wo’u bau etu panewa Ia makai-kai wo’u manganto’oka i Pue Allah, “Tarima matao.” Roo see Ia mangawaika anaguruNya bau etu, panewa sira mangampookoka wo’u tau boros etu.

8Wali sira samparia mangkoni paka mabosu. Ojo karoonya sira mangkoni, anaguru i Yesu mangamporomung muni toro mpangkoni etu dapituwa karanji nabuke.

9Wali kaborosinya tau to mangkoni etu yabi opo nsowu. Wali yako etu i Yesu mampokau tau boros etu yau muni njo’u lipu nsira.

10Panewa roo etu i Yesu pasi anaguruNya mapone ri bangka pei yau njo’u lipu to rato’oka Dalmanuta.

11Wali tempo i Yesu pasi anaguruNya nja’uwa nja’u Dalmanuta, tempo etu re’e sawei mba’a to Yahudi to aliran Parisi rata resi Ia. Sira rani mangakal Ia, see naka sira mula mangabanta gomboNya pasi mamporapika resi Ia, to’onya, “Ikaka kami palaong to taa rapobiasa see damawali tondong resi kami kuasaMu yako ri saruga semo.”

12Wali i Yesu Ia kanguru ri rayanya pei manganto’o, “Maka pei komi to tuwu ri tempo si’i pei mamporapika palaong to damawali tondong resi komi? Aku manganto’oka komi, monso pu’u tare tondong to darapapokitaka resi komi.”

13Ojo karoonya i Yesu manganto’oka sira gombo etu, Ia mampiyaika sira. Ia mapone muni ri bangka sindara-ndara pei anaguruNya dayau njo’u sambote ndano.

14Wali tempo anaguru i Yesu mapone ri bangka, sira mangkalingan mangkeni roti. Wali jamo sampa’i roti to re’e ri raya bangka etu.

15Wali ri raya mpalayag nsira etui Yesu mampatiendoka sira, Ia manganto’oka sira ligi, to’oNya, “Pakatao kojo ragi nto Yahudi to aliran Parisi pasi ragi i Herodes.”

16Wali tempo anaguru i Yesu mangandonge gombo etu, sira taa nansani i Yesu bara mangaligi sira. Sira ojo magombo samba’a pei samba’a, sira manganto’o, “Apa kita tare roti to kita mangkeni see naka Ia magombo mangkonong ragi.”

17Pei i Yesu mangansani anu to nato’o nsira, wali Ia mampotanaka resi sira, Ia manganto’o, “Maka pei komi magombo-gombo manganto’o tare roti. Wimba, komi bara tawa mangansani i sema kamonsonya Aku? Wimba, komi bara mako’o wo’omu?

18Komi re’e matamu, pei komi ewa taa mangkita. Pasi re’e talingamu, pei komi ewa taa mangandonge. Wali wimba, komi bara roomo mangkalingan yau palaong to Aku roomo nangika seore?

19Tempo Aku nangampesu-mpesutika tau lima nsowu roti to ojo lima mpa’i etu, tempo etu sawei karanji to nabuke toro mpangkoni etu to nuporomung ngkomi?” Wali anaguru i Yesu mangansono, “Sampuyuwa pei dua karanji nabuke.”

20Panewa i Yesu mampotanaka wo’u, “Wimba tempo Aku mampesu-mpesutika tau opo nsowu roti to ojo pitu mpa’i etu, tempo etu sawei karanji to nabuke wo’u toro mpangkoni etu to nuporomung ngkomi?” Wali anaguru i Yesu mangansono wo’u, “Dapituwa karanji nabuke.”

21Wali roo see i Yesu manganto’o, “Wali gete, maka pei komi taa mangansani Aku taa kojo mampomoruka roti tempo Aku manganto’oka komi pakatao kojo ragi nto Yahudi to aliran Parisi pasi ragi i Herodes?”

22Wali yako etu re’e seore i Yesu pasi anaguruNya yau njo’u kota Betsaida. Rata nja’u ria re’e tau to mangkenika i Yesu tau to buta. Sira mamporapika resi i Yesu, to’onya, “Kami rani Komi mampotaka mata ngkai si’i, see matao muni.”

23Wali i Yesu mangkongko pale ntau buta etu pei mangkentar ia njo’u sambali ngkota etu. Rata nja’u ria Ia mangerus mata ntau etu pei mampotaka. Panewa Ia mampotanaka, “Wimba, nukitamo ngkorom bara kesaanya?”

24Wali tau buta etu mantengku mbo’o pei manganto’o, “See. Aku mangkita tau malinja-linja, pei ojo ewa kaju ta’anya.”

25Wali i Yesu mampotaka wo’u mata ntau buta etu, panewa tau buta etu mampoyoas, samparia to kitanya etu mayoasinyamo.

26Roo etu i Yesu manganto’oka ia, “Ne’ewa masua ri kota. Pawolili muni njo’u lipumu.”

27Wali yako kota Betsaida, i Yesu pasi anaguruNya polas wo’u njo’u kampu-kampu to ri awe ngkota Kaisarea Pilipi. Ri raya mpalinjanya etu i Yesu mampotanaka resi anaguruNya, “Ane ewa panto’o ntau, sema Aku?”

28Wali sira mangansono, to’onya, “Re’e sangga’a tau manganto’o i Yohanes to Pombaptis. Pei re’e seja to manganto’o i Elia. Pasi re’e seja tau to manganto’o Komi samba’a to pantuntu tuntu i mPue Allah to tempo owi.”

29Pei i Yesu mampotanaka wo’u resi sira, “Pei ane ewa panto’o ngkomi, sema Aku si’i?” Wali i Petrus mangansono, to’onya, “Komi semo i Kerisitu, Makole parajanji i mPue Allah.”

30Wali ojo pangandonge i Yesu pasono i mPetrus etu, Ia mampatiendoka anaguruNya, to’oNya, “Ne’e kojo manganto’oka sa’e Aku semo Makole parajanji i mPue Allah.”

31Wali tempo etu semo i Yesu mula mampotundeka anaguruNya mangkonong anu to damawali resi Ia. To’oNya, “Aku, Wiyaa nto Lino, damangarata boros kasesa. Pasi Aku danapobo’o ntau tu’a nto Yahudi pasi kepala-kepala nto pampue pasi tau to mampoguru porenta i Musa. Wali Aku darapopate yau, pei yako etu, ri rayanya togo eo Aku damambangu muni yako ri kapatengKu.”

32Wali manasa kojo gombo i Yesu resi anaguruNya etu. Pei ojo pangandonge i mPetrus gombo i Yesu etu, ia mangkeni yau i Yesu longko sangkodi yako resi yununya to yusa. Panewa ri raya mpalinja nsira etu ia manganseko i Yesu apa ia taa masanang mangandonge gomboNya etu.

33Pei i Yesu mangalekoka yau tangoNya pei mangalo’aka resi anaguruNya to sampuyu pei samba’a etu. Panewa Ia manganseko i Petrus, to’oNya, “Gete, piyaimo yako resi Aku, korom to mangika lengko to ewa lengko ngKepala Measa! Apa korom taa mampobuuka pamporani i mPue Allah. Korom ojo mampobuuka pamporani ngkomi to lino semo.”

34Wali ojo karoonya etu i Yesu mampokio tau boros pasi anaguruNya to sampuyu pei samba’a etu. Ojo karata nsira resi Ia, Ia manganto’oka sira, “I sema tau to rani mangaluluka Aku, tau etu taa maya taa mamposaka yau pamporani ndaya to si ia. Wali ia nempo rapopate yau saba mangalulu Aku, ia tiroowa mangaluluka Aku.

35Pei re’e tau to mampobuuka katuwunya semo to bae kojo batuanginya see naka sira taa mangalulu Aku naka ne’e nasesai ntau. Pei tau etu nempo taa napopate ntau apa saba mangalulu Aku pei tiroo darata temponya sira damate yau. Pei i sema tau to buya rayanya nempo mate yau apa saba ia mangaya Aku pasi ia mampakarebaka kareba matao, tau etu damangarata katuwu to monso.

36Apa kesaa batuanginya resi tau nempo kasuginya ri lino samparia paka ia puenya pei ane ia taa mangarata katuwu to singkasaenya? Tare batuanginya resi ia,

37apa tare kesaa to maya danabayarika ntau daraolika katuwu to singkasaenya etu.

38Wali tempo si’i re’e tau to tuwu to room mampiyaika yau i Pue Allah pei mangaluluka wo’u pue to yusa. Tau etu madosa kojo. Wali komi ne’e mea mangaluluka Aku ri tango ntau madosa etu. Apa tempo to darata, Aku, Wiyaa nto Lino, dama’i muni ri lino si’i sindara-ndara pei pomakau to i Pue Allah puenya. Tempo etu kuasa pasi kayawangKu sewaju pei kuasa pasi kayawa mPa’angKu. Wali i sema tau to mea mangaluluka Aku pasi gombongKu ri tango ntau to madosa tempo si’i, Aku damea seja mangampongakung tau etu Aku puenya tempo Aku dama’i etu.”


  Share Facebook  |  Share Twitter

Download Audio MP3 (Markus 8):
Mobile (Low Quality) - CD (High Quality)

 <<  Markus 8 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran