Dual Panel1Wali i Pue Yesu manganto’oka aku, “Tulisika pomakau ntau to mangaya Aku to siromu nja’u kota Epesus sura si’i. To’oka ia: Si’i gombo to yako resi Ia to mangkongko batu’e to pitu mpa’i ri paleNya tondo ngkana, pasi to malinja ri oyo ntinja weyawa to pitu to darapamposaka pansona.
2Wali gomboNya etu manganto’o, Aku mangansani lengko ngkomi. Aku kunsani komi mandasai kojo mapalaong pasi bae sabara. Pasi Aku Kunsani seja komi taa rani masingkatao pei tau to maja’a. Tau etu mampoanika manganto’o, “Aku pomakau i ngKerisitu.” Wali tau etu komi mamparesa ruyu panewa manasa sira mawuti.
3Aku Kunsani komi bae sabara. Komi mangarata kasusa apa saba komi mangaya Aku, pei nempo mangarata kasusa, komi taa mosa mangalulu Aku.
4Pei re’e sala ngkomi to Aku mangkitanaka apa komi si’amo ewa seore. Seore, tempo komi owo mangaya, komi bae pamporayangmu resi Aku pasi resi sa’e, pei si’i-si’i tamo bae pamporayangmu.
5Wali pobuuka kojo ewa wimba kabaenya pasisalanya pamporayang ngkomi tempo seore pasi tempo si’i. Ane roomo komi mampobuuka, panewa ndolika tangomu yako ri palaong to tempo si’i, pei ika wo’u palaong to ewa nuika tempo seore, tempo komi owo mangaya. Apa ane komi taa mangandolika tangomu yako ri palaong to tempo si’i, Aku dama’i mangayali yau tinja mpansona ngkomi yako ri wakanya.
6Pei re’e seja lengko ngkomi to mampakasanang Aku, apa komi maja’a nukita lengko nu joa i Nikolaus ewa Aku seja maja’a Kukita lengkonya etu.
7Si’i gombo i Nosa Mapasing resi komi to mangaya. Wali i sema tau to nadonge ntalinganya, padongeka. Ia manganto’o, ‘I sema tau to menang, Aku mangawaika mangkoni wua ngkaju to mangawaika katuwu. Kaju etu tuwu ri bonde i mPue Allah.’”
8Wali yako etu i Pue manganto’oka wo’u aku, “Tulisika seja pomakau ntau to mangaya Aku to siromu nja’u kota Smirna. To’oka ia: ‘Si’i gombo to yako resi Ia to uyunya pasi to purinya, Ia to namatemo pasi mambangu muni yako ri kapateNya etu.
9Ia manganto’o, Aku Kunsani kasesa to nurata ngkomi. Pasi Kunsani komi masiasi, pei kamonsonya komi tau to masugi! Aku Kunsani seja re’e tau Yahudi to mampoanika mangalulu agama nto Yahudi pei taa mangalulu, sira mampue resi i Kepala Measa. Tau etu manto’o maja’a komi.
10Wali komi darasesai, pei ne’e meka mampobuuka kasesa to danurata ngkomi etu. Padongeka gombo si’i. I Kepala Measa damangantarungku singga’a komi see komi daraparesa. Pasi komi darasesai sampuyu mbengi kasaenya. Wali pakaroso raya ngkomi mangalulu Aku nempo rapopate yau apa saba komi mangalulu etu. Apa ane komi mangika ewa see, Aku damangawaika komi katuwu to raporapaka ewa so’o mbo’o to meyawa.
11Wali si’i gombo i Nosa Mapasing resi komi to mangaya. Wali i sema tau to nadonge ntalinganya, padongeka. Ia manganto’o, ‘I sema tau to menang, ia taa damangarata kapate to kadua.’”
12Wali yako etu i Pue manganto’oka wo’u aku, “Tulisika seja pomakau ntau to mangaya aku to siromu nja’u kota Pergamus. To’oka ia: Si’i gombo yako resi Ia to re’e panai to mataja dua mbalia.
13Ia manganto’o, Aku Kunsani lipu to nukaroos ngkomi. Lipu etu semo to nakuasang kojo i ngKepala Measa. Pei nempo komi maroo nja’u lipu etu, pei komi mangalulu kojo Aku pasi komi taa manganto’oka sa’e, ‘Aku taa mangalulu i Yesu.’ Seore re’e tau to rapopate yau apa saba ia mampakarebaka mangkonong Aku. Etu semo i Antipas to mangalulu kojo Aku. Ia rapopate yau nja’u kota ngkomi, kota to nakaroos i ngKepala Measa. Pei nempo re’e to rapopate yau etu, pei komi taa manganto’oka sa’e, ‘Aku taa mangalulu i Yesu.’
14Pei re’e sala ngkomi to Aku mangkitanaka, apa re’e sawei mba’a komi to mangaluluka anu to napotundeka i mBileam tempo owi. I Bileam etu mampotundeka i Balak see i Balak mangansani ewa wimba raika mangamomis to Israel see sira mangkoni pangkoni to roomo rapampueka resi pue to yusa pasi mangamomis seja sira see sira magoyal pasi masala.
15Pasi re’e seja ri oyo ngkomi to mangaluluka anu to napotundeka nu joa i Nikolaus.
16Wali ndolika tangomu yako ri dosa etu, apa ane komi taa mangandolika tangomu yako ri palaong etu, Aku majoli dama’i resi komi damangamusu tau to mangika palaong etu, Aku damangampake panai to masuwu yako ri ngangangKu.
17Si’i gombo i Nosa Mapasing resi komi to mangaya. Wali i sema tau to nadonge ntalinganya, padongeka. Ia manganto’o, ‘I sema tau to menang, Aku damangawaika sira mangkoni santila pangkoni mana to rawuni. Pasi Aku damangawaika seja tau etu sampa’i watu to buya samba’a pei samba’a. Watu etu nja’u ratulis sanga to bou. Sanga to bou etu tare to yusa mangansani, ojo patanya tau to mangantima mangansani.’”
18Wali yako etu i Pue manganto’oka wo’u aku, “Tulisika seja pomakau ntau to mangaya Aku to siromu nja’u kota Tiatira sura. To’oka ia: Si’i gombo yako resi Ana i mPue Allah anu to mataNya ewa kaa nu apu pasi witiNya ewa tambaga to makilo.
19Ia manganto’o, Aku Kunsani lengko ngkomi, pasi pamporayang ngkomi, pasi pangaya ngkomi, palaong ngkomi pasi kasabara ngkomi nempo mangarata kasusa. Pasi Aku Kunsani palaong to komi mangika ri tempo si’i, palaong to etu semo to boroboros pei palaong to nuika ngkomi tempo komi owo mangaya.
20Pei re’e sala ngkomi to Aku mangkitanaka, apa komi ojo mangabiaka tau we’a to rato’oka i Isebel mampotunde tau to mangaya Aku. Ia mampoanika, ia manganto’o, ‘Aku semo to pantuntu tuntu i mPue Allah.’ Pasi ia mangampotunde ojo mangantipu tau to mangaya Aku, ia manganto’o, ‘Taa mawei tau nempo magoyal pasi masala pasi mangkoni pangkoni to roomo rapampueka resi pue to yusa.’ See naka sira mangika palaong to etu.
21Wali Aku roomo mangawaika i Isebel etu temponya ia mangandolika tangonya yako ri dosanya, pei ia bo’onya mangandolika tangonya yako ri palaong magoyal etu.
22Wali si’i semo to Aku damangika resi ia. Aku damangawaika ia panyaki to mapari kojo see ia jamo maturu-turu ri wawo ngkoi. Pasi tau to masala resi ia, ane sira taa seja mangandolika tangonya yako ri palaong ntau we’a etu, Aku damangawaika seja sira mangarata kasesa to mapari kojo.
23Pasi Aku damampopate yau samparia ana ntau we’a etu. Panewa samparia tau to mangaya Aku damanasa Aku semo to mangansani kojo pampobuuka ntau pasi raya ntau. Pasi Aku damangawaika resi komi anu to singkonong ewa wimba palaong ngkomi samba’a pei samba’a.
24Pei re’e seja komi nja’u Tiatira to taa mangaluluka anu to napotunde i Isebel etu, pasi taa seja maguru anu to rato’oka anu to taa rakita, to napotunde i ngKepala Measa. Wali ane komi, Aku taa damanganto’oka komi paposia to mampakabeu wo’u.
25Ojo si’i Kuto’oka komi, yako tempo si’i rataka temponya Aku ma’i, Aku rani komi ne’e mandoo mangaluluka kojo anu to nululu ngkomi tempo si’i.
26Wali i sema tau to menang pasi to sangkani mangaluluka pamporaningKu sampe rata tempo kapuranya, tau etu daKuwaika kuasa mangkuasang to lino.
27Kuasa to Kuwaika tau etu sewaju pei kuasa to nawaika mPa’angKu Aku. Wali sira damangkuasang to lino damangampake toko wubu. Pasi sira damangkaja’aka yau balinya ewa naika ntau mangabusak yau kura tana.
28Pasi tau etu daKuwaika seja batu’e ngkeo.
29Si’i gombo i Nosa Mapasing resi komi to mangaya. Wali i sema tau to nadonge ntalinganya, padongeka.”