Alkitab Mobile SABDA
[VER] : [TAA]     [PL]  [PB] 
 <<  Yohanes 14 >> 

1Wali yako etu i Yesu manganto’oka wo’u kami to anaguruNya, Ia manganto’oka kami, “Ne’e moru-moru raya ngkomi mangampobuuka Aku mampiyaika komi. Komi mansarumaka i Pue Allah, wali sarumaka seja Aku.

2Naka pei komi taa parluu moru-moru mampobuuka Aku mampiyaika komi apa ndate saruga ri banua mPa’angKu re’e boros tampa rakaroo, pasi Aku yau nto’u ria damampasigenaka komi tampa rakaroo etu. Wali monso pu’u ewa Kuto’oka komi etu, apa ane taa monso, Aku taa manganto’o.

3Wali Aku yau damampasigenaka komi tampa, roo see Aku damawolili muni damangoko komi see komi maya maroo siwaka pei Aku.

4Wali komi mangansanimo jaya rata ndate tampa to daKukayako etu.”

5Wali yako etu i Tomas manganto’oka i Yesu, to’onya, “Pue, kami taa kunsani bara imbare danukayako ngKomi, wali wimba danaika mami mangansani jaya?”

6Wali i Yesu manganto’o, “Aku semo jaya to rata resi Pa’angKu. Pasi Aku semo to mampakanasaka tau anu to monso mangkonong Ia, pasi Aku semo pu’u ngkatuwu to singkasaenya. Wali tare tau to rata resi Pa’angKu ane taa mangalulu Aku.

7Ane komi roomo mangansani i sema kamonsonya Aku, matantu komi mangansani seja i sema kamonsonya Pa’angKu. Wali yako tempo to si’i komi mangansani kojo Pa’angKu pasi komi ewa roomo mangkita Ia.”

8Wali i Pilipus manganto’o, “Pue, papokitaka kami Pa’aMu apa ane kami roomo mangkita Ia, tare to yusa to raporani.”

9Pei i Yesu manganto’oka ia, “O Pilipus, Aku masaemo siwaka pei komi. Wimba, korom bara tawa mangansani i sema kamonsonya Aku? Maka pei korom manganto’o, ‘Papokitaka kami Pa’aMu?’ Apa tau to roomo mangkita Aku, tau etu ewa room seja mangkita Pa’angKu.

10Wimba, korom bara taa mangaya Aku samba’a pei Pa’angKu, pasi Pa’angKu samba’a pei Aku? Kami monso pu’u samba’a. Wali see naka gombo to Aku manganto’oka komi, si’a Aku pu’unya, Pa’angKu semo pu’unya. Pasi samparia palaong to Aku mangika, si’a seja Aku pu’unya apa Pa’angKu to maroo ri rayangKu, Ia mangika palaong to si Ia mangampake Aku.

11Wali Aku rani komi mangaya gombongKu tempo Aku manganto’o Aku samba’a pei Pa’angKu, pasi Pa’angKu samba’a pei Aku. Pei ane tiroo masuli nuepe ngkomi mangaya ane ojo yako ri gombongKu etu, ane ewa see, pobuuka palaong to taa rapobiasa to roomo nukita ngkomi Aku mangika. Roo see, apa saba palaong to etu, aya Kami dua Pa’angKu monso pu’u samba’a.

12“Wali Aku manganto’oka komi, monso pu’u, i sema tau to mangaya Aku, tau etu danakoto seja mangika palaong to taa rapobiasa to Aku roomo mangika etu. Pei si’a ojo palaong to ewa wetu to ia damangika. Ia damangika palaong to bae wo’u batuanginya pei palaong to etu. Apa Aku yau damaroo resi Pa’angKu,

13wali nempo bara kesaa to komi mamporapi resi Pa’angKu mangika, Aku damangikaka komi apa saba komi Aku puenya. Naka pei Aku damangika ewa wetu see Pa’angKu darabarong saba yako palaong to Aku, AnaNya, mangika etu.

14Wali ane komi mamporapi resi Aku damangika bara kesaa, Aku damangikaka komi apa saba komi Aku puenya.” Wali ewa wetu gombo i Yesu mampakanasaka kami to anaguruNya sabanya naka pei kami danakoto mangika palaong to bae wo’u batuanginya pei palaong to taa rapobiasa to Ia roomo mangika etu.

15Wali yako etu i Yesu manganto’oka wo’u kami to anaguruNya, Ia manganto’o, “Ane komi mamporayang Aku, komi damampalaika porenta-porentangKu.

16Pasi Aku damamporapika resi Pa’angKu, panewa Ia damangawaika resi komi to Pansawang to yusa, to damaroo resi komi rataka ri singkasaenya.

17To Pansawang etu, Ia semo i Nosa to mampaponsanika komi anu to monso mangkonong i Pue Allah. Wali ane to lino to taa mangaya, sira taa rani nasawang i Nosa etu. Naka pei sira taa rani Ia mangansawang sira apa sira taa maya mangkita Ia pasi taa seja mangansani i sema kamonsonya Ia. Pei komi to mangaya, komi mangansani i sema kamonsonya Ia, apa Ia re’e maroo siwaka pei komi. Pei ane ri tempo to darata Ia damaroo ri raya ngkomi.

18“Wali tempo Aku mate yau, komi taa damawali ewa ana ilu to tamore tau to mampiara, apa Aku damawolili muni resi komi.

19Pei ane to lino to taa mangaya, tamo masae panewa sira tamo damangkita Aku. Pei komi to mangaya damangkita Aku. Pasi apa saba Aku datuwu muni, see naka darata temponya komi seja datuwu muni yako ri kapatemu.

20Wali tempo palaong etu mawali, tempo etu komi damanasa Aku samba’a pei Pa’angKu, pasi komi samba’a pei Aku, pasi Aku samba’a pei komi.

21“Wali i sema tau to mampodongeka pasi mampalaika porenta-porentangKu, tau etu semo to mamporayang Aku. Pasi tau to mamporayang Aku etu, ia danaporayang mPa’angKu. Pasi Aku seja mamporayang ia pasi damampakanasaka ia mangkonong Aku.”

22Wali yako etu i Yudas, to si’a i Yudas Iskariot, ia manganto’o, “Pue, maka pei Komi damampakanasaka kami mangkonong koroMu, pei taa damampakanasaka to lino to boros?”

23Wali i Yesu mangansono, Ia manganto’o, “Ane tau mamporayang Aku, ia damampalaika gombongKu. Wali Pa’angKu damamporayang ia, pasi Kami dama’i maroo resi tau etu.

24Pei tau to taa mamporayang Aku, tau etu taa damampalaika gombongKu wali Kami taa dama’i maroo resi ia. Wali gombo to Kuto’oka komi si’i, si’a Aku pu’unya. Pa’angKu to nampokau Aku, Ia semo pu’unya.

25“Wali Aku manganto’oka komi samparia to etu tempo Aku tiroowa re’e siwaka pei komi.

26Pei tempo to darata, Pa’angKu damampokau to Pansawang damangabolos Aku. To Pansawang etu, Ia semo i Nosa Mapasing. Wali Ia damangampotundeka komi samparia anu to bae batuanginya resi komi. Pasi Ia damampatiendoka komi mangkonong samparia gombo to room Aku manganto’oka komi.

27“Wali tempo Aku yau, re’e to Aku ewa mangansombo resi komi. Etu semo karodo ndaya. Wali karodo ndaya to Kuwaika komi etu sewaju ewa karodo ndaya to re’e resi Aku. Pasi tempo Aku mangawaika komi karodo ndaya etu, taa kojo sewaju pei karodo ndaya to biasa komi mangarata ri lino. Gana kojo karodo ndaya to Kuwaika komi etu. Wali ne’e moru-moru raya ngkomi mangampobuuka Aku mampiyaika komi pasi ne’e meka.

28“Komi roomo mangandonge Aku manganto’o, ‘Aku dayau, pei roo see Aku damawolili muni resi komi.’ Wali ane komi monso pu’u mamporayang Aku, to tao-tao komi mangepe ndende rayamu mampobuuka Aku dayau muni resi Pa’angKu. Apa Pa’angKu to nampokau Aku, Ia semo to bae-bae anggaNya pei Aku, wali bae kojo batuanginya resi Aku dayau muni resi Ia.

29Wali Aku manganto’oka yami komi mangkonong samparia palaong to damawali etu, see ane mawalimo palaong etu komi damangendo gombongKu etu pei damangaya monso pu’u gombongKu etu.

30Wali si’i-si’i tamo masae Aku mampogomboka komi, apa daratamo i Kepala Measa to mangkuasang to lino to balingKu. Ia taa maya mangkuasang Aku,

31pei Aku buya rayangKu mangabiaka palaong to danaika nu joanya resi Aku. Aku damangika ewa wetu mangalulu samparia to naporentangika mPa’angKu Aku see to lino damangansani Aku mamporayang Pa’angKu. Wali yaumo kita, mampiyaika tampa si’i.”


  Share Facebook  |  Share Twitter

Download Audio MP3 (Yohanes 14):
Mobile (Low Quality) - CD (High Quality)

 <<  Yohanes 14 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel