Alkitab Mobile SABDA
[VER] : [TABARU]     [PL]  [PB] 
 <<  Roma 9 >> 

1'Okia naga gee tosidemo-demo ne'ena ge'ena ma gou-goungu 'itiai sababu ngoi de ma Kristus mimarimoiokau. Ngoi kotoelukuwa, de 'ai singina gee 'o Ngomasa 'Itebi-tebini yaparetano mita 'ingose 'ato 'ai demo ne'ena ma gou-goungu 'itiai.

2Ngoi 'ai singina 'isusa de 'isangisara ma sala,

3ma sababu tatiba-tibangi to ngoi 'ai nyawa-nyawa 'o Israeloka. Sababu ma ngale takiriwo 'ona, so ngoi ma sirete tomodeke ma Jo'oungu ma Dutu woikorosau de woisikati-tingaka de ma Kristus.

4'Ona ge'ena ma Jo'oungu ma Dutu wakiiri-iriki wadiai to 'una ma sirete 'awi ngowa-ngowaka, de wosidumutu 'awi kumati de 'awi singina ma sure 'onaka. 'Una wodiai 'o jaji de wakikula 'onaka 'o besesongo gee 'o Musa wositota-totara. Ma Jo'oungu ma Dutu wosidemo 'onaka kokia salingou 'ona wisuba 'una, de 'ona yadawongokau mita 'awi jaji.

5'Ona ge'ena manga 'asali to ngone nanga edete de nanga dotumino. Ma Kristus womadadi 'o nyawa, 'awi 'asali 'onano. 'Una 'ifoloi 'awi kuasa 'iamoko de 'o sagala moi-moi. 'Unau ge'ena ma Jo'oungu ma Dutu gee salingou powisiarene kaisi'ado-'adonika! 'Amin. Koge'enau.

6Ngoi tosidemo ne'ena ko ma dumutuwa 'ato ma Jo'oungu ma Dutu 'awi jaji ge'ena kowagounguwa, ma 'ena 'o Israel ma nyawa koyoodumuwa ma Jo'oungu ma Dutu wakiiriki yodadi 'awi 'umati.

7Koiodumuwa 'o Abraham 'awi waata ge'ena yakisironga ma Jo'oungu ma Dutu 'awi ngowa-ngowaka. Sababu ma Jo'oungu ma Dutu wongose 'o Abrahamuka, "Ka 'o Ishak 'awi waata duga dua yosironga to ngona 'ani waata."

8Ge'ena ma ngale 'o Abraham 'awi waata gee yodadi ma Jo'oungu ma Dutu 'awi ngowa-ngowaka, ge'ena duga ka gee yolahiri sababu ma Jo'oungu ma Dutu 'awi jaji, ma 'awi waata koiodumuwa.

9Sababu ma Jo'oungu ma Dutu 'awi jaji ge'ena konee, "Ma 'orasi gee 'isitatapuokau, ngoi 'asa toboali de ngo Sara 'asa momadamake 'o ngowaka 'o nauru moi."

10De kage'enawa duga. Ngo Ribka momaku'arene 'o ngowaka 'o nauru yamididi ma dea kawomatengo, ge'ena la 'o Ishak to ngone nanga edete de nanga dotumu.

11'O ngowaka yamididi go'ona koyolahiruawasi, 'ena ma Jo'oungu ma Dutu wositatapuokau nago'ona wakiiriki. Ma Jo'oungu ma Dutu woiriki ge'ena moteke to 'una 'awi mau waki'asoko, so ko ma ngalewa 'ato sababu manga manarama. Sababu ma 'orasi ngo Ribka 'ami ngowaka 'o nauru yamididi go'ona koya'akunuawasi yodiai yaowa-owa bolo 'ito-torou,

12'ena ma Jo'oungu ma Dutu wongosekau ngo Ribkaka 'ato, "'O riaoka 'asa wileleani 'o dodotika."

13'O Buku 'Itebi-tebinoka 'isilefoku konee, "'O Yakub towiiriki, ma 'o Esau kotowiirikuwa."

14Nako koge'ena de ngone 'okia pongose? 'Ato ngone pongose 'ato ma Jo'oungu ma Dutu kowoloawa? Ma Jo'oungu ma Dutu 'una ge'ena ma gou-goungu woloa!

15Sababu ma Jo'oungu ma Dutu wongose 'o Musaka, "Ngoi 'asa takisimara'ai 'o nyawa gee tomau takisimara'ai, de ngoi 'asa takisibosono 'o nyawa gee tomau takisibosono."

16So ma Jo'oungu ma Dutu wairiki 'o nyawa ge'ena moteke ko 'o nyawawa manga mau bolo manga manarama, ma 'ena moteke 'awi singina ma 'ofi.

17Sababu 'o Buku 'Itebi-tebinoka 'isilefoku konee, "Ma Jo'oungu ma Dutu wongose 'o Mesir manga koanika, 'Ngoi tonigoraka nodadi koana ge'ena 'ai dumutu ka 'o ngai moi duga, ge'ena la ma ngekomo ngona, ngoi tosidumutu 'ai kuasa de tadiai 'ai ronga 'o dunia yasuluunuku yokoki'isene.'"

18So nako ma Jo'oungu ma Dutu womau wakidora moikani, ge'ena dua wadiai koge'ena. De nako ma Jo'oungu ma Dutu wakidiai moikani manga singina 'i'opini, ge'ena dua wadiai koge'enali.

19Poilia dua ngini niosano ngoino, "Nako koge'ena de 'ido'oa so ma Jo'oungu ma Dutu kawosisalasi 'o nyawa? Komoiwa 'idadi yatatoko ma Jo'oungu ma Dutu 'awi mau!"

20Duga 'Esa moi! Ngini ma ka 'o nyawa. De ngini koya'akunuwa niomoroini nioributu ma Jo'oungu ma Dutuka! 'Isoka 'o boso tonaka gee 'o tonaka 'ita-tagakaka yadi-diaiku 'ena koidadiwa 'isano yodi-diaika, "'Ido'oa so noidiai kone'ena?"

21Gee 'o boso tonaka yodi-diai go'ona ya'aturu 'o tonaka ge'ena yadiai moteke to 'ona manga mau. 'O tonaka ya'eseno, 'idadi yadiai ma boso tonaka 'o 'iniki modidioka; ngai moi 'itero-tero de moioli gee koiterowa rekeni.

22Koge'enali mita 'o kianikia gee ma Jo'oungu ma Dutu wodiai. 'Una womau wosidumutu 'ato 'una wito'otasa de womau 'o nyawa yanako 'ato 'una wopareta. Ma 'una wosabari 'onaka gee yadaene salingou yakihukumu sababu yodiai 'una wito'otasa.

23Ma Jo'oungu ma Dutu womau wosidumutu mita ngoneno 'okia sonaa 'isure-sure gee wosigutiokau ngoneku wonasiboso-bosono gee. Ngone wonadua-duangou ma ngale padawongo 'okia sonaa 'isure-sure ge'ena.

24Ngoneu ne'ena gee wona'asokokau, duga ka 'o Yahudiwa ma nyawa, ma 'o nyawa 'iregu-reguno mita.

25Sababu ma Nabii Hosea 'awi bukuoka 'isilefoku ma Jo'oungu ma Dutu wongose konee, "'O nyawa gee kotakisirongawa 'ai 'umati, 'asa takisironga 'ai 'umati. 'O nyawa gee kotosirongawa to ngoi 'ai nyawa takisiboso-bosono, 'asa tongose 'ato, 'Takisiboso-bosono'.

26De ma ngii kiaka naga gee ma Jo'oungu ma Dutu wongose 'ato, 'Ngini ko to ngoiwa 'ai 'umati,' 'ona ge'enaka dau gee 'asa yakisironga ma Jo'oungu ma Dutu wo'ahu-'ahu 'awi ngowa-ngowaka."

27Ma Nabii Yesaya wosidemokau ma ngale 'o Israel ma nyawa, "Ngaro 'o Israeloka manga gudai 'isoka 'o dowongi 'o ngootoka, ma dua ka munuka duga yamake 'o laha,

28sababu ma Jou dua wacobou wosiguti 'o hukumani 'o dunia yapasiku."

29'O Yesaya konedali mita wongose, "Nako 'iso ma Jo'oungu ma Dutu gee 'awi kuasa ma batingi koi'iwa kowosibosonuwa nanga waata, ma raiokau ngone poodumu 'inahukumu so podadiokau 'isoka 'o Sodom de 'o Gomora so koina'iwau."

30So ne'ena ge'ena koneda: Ko 'o Yahudiwa ma nyawa 'ona koyomariwowa yomarimoioli de ma Jo'oungu ma Dutu. Ma ngano 'ona yongaku, so ma Jo'oungu ma Dutu wodiai 'una de de 'ona yomarimoioli.

31'Ipulutu so 'o Yahudioka 'ona yomariwo yamoteke 'o besesongo gee 'o Musa wositota-totara, la 'ona de ma Jo'oungu ma Dutu yomarimoioli, ma ge'enau de 'ona koyomadagakunuwa.

32'Ido'oa so 'ona koyomadagakunuwa? Sababu 'ona yadiai ge'ena ko de manga ngo-ngakuwa, so 'ena ka to 'ona ma sirete manga manarama. So 'ona yoruba ngano yomasipeleke 'o tetosa gee 'o nyawa yomasipele-peleke.

33Ma ngale 'o teto ge'ena, naga 'o Buku 'Itebi-tebinoka 'isidemo konee, "Nialega niosidi-diai naneda: 'O Sionoka tanoakou 'o teto 'o ngai moi dua 'asa 'o nyawa yomasipeleke, ge'ena la 'o teto moi 'iamo-amoko gee dua ma duanguku 'o nyawa yoruba. Ma 'o nyawa gee yongaku-ngaku 'unaka 'asa manga singina koitingoonuwa."


  Share Facebook  |  Share Twitter

Download Audio MP3 (Roma 9):
Mobile (Low Quality) - CD (High Quality)

 <<  Roma 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel