Alkitab Mobile SABDA
[VER] : [TOBA]     [PL]  [PB] 
 <<  1 Samuel 24 >> 

1(24-2) Jadi dung mulak si Saul sian na mangalele halak Palistim, tarbortik ma tu ibana; ida ma di halongonan Engedi do si Daud.

2(24-3) Dung i diarahon si Saul ma toluribu baoa angka na pinillit sian sandok Israel, jala laho ibana mangalului si Daud dohot angka halak donganna i di atas ni angka dolok batu parbeduan.

3(24-4) Jadi tolhas ma ibana tu angka parbaraan ni birubiru di lambung dalan, adong disi sada liang, laos bongot si Saul tu bagasan laho manghungkupi patna nian; alai juguk dingkan pamurnangan ni liang i anggo si Daud dohot angka donganna i.

4(24-5) Jadi ro ma hata ni angka dongan ni si Daud mandok tu ibana: Ida ma, nunga jumpang ari na nidok ni Jahowa tu ho: Ida ma, Ahu pasahathon musum tu bagasan tanganmu, asa bahenonmu tu ibana guru lomo ni roham. Dung i hehe ma si Daud laho marsibuni maneat sada suhisuhi sian ulos ni si Saul.

5(24-6) Alai dung salpu mallobuk ma taroktok ni si Daud, ala naung sineatna i suhisuhi sian ulos ni si Saul.

6(24-7) Dung i didok ma tu angka donganna i: Dao ma i sian ahu ala Jahowa, tung bahenonku songon i tu tuanku, naung miniahan ni Jahowa, tung mangonai tanganku dompak ibana, ai naung miniahan ni Jahowa do ibana.

7(24-8) Pola mangonai hata si Daud tu donganna, ndang diloas nasida hehe mangkahua si Saul. Dung i hehe ma si Saul sian liang i, laos manulus dalanna.

8(24-9) (II.) Dung i hehe ma dohot si Daud ruar sian liang i, laos joujou sian pudi ni si Saul songon on: Oale rajanami! Jadi mamereng dompak pudi ma si Saul, manungkap tu tano ma ianggo bohi ni si Daud marsomba rajai.

9(24-10) Dung i didok si Daud ma tu si Saul: Boasa tung patangitangionmu hata bolabola ni jolma, angka na mandok: Ida ma, mangalului hamagoanmu do anggo si Daud?

10(24-11) Ida ma, apala sadarion matam sandiri marnida naung pinasahat ni Jahowa ho sadarion tu tanganku di bagasan liang i; nunga pola dipajuju halak ahu mambunu ho nian, hape huolani do ho, ningku do: Ndang jadi mangonai tanganku tu tuanku, ai naung miniahan ni Jahowa do ibana.

11(24-12) On pe, ale amang, ua bereng suhisuhi ni ulosmi di bagasan tanganku, paboa na so olo ahu mambunu ho uju na huseat suhisuhi ni ulosmi. Tanda jala ida ma sian i paboa na so adong hajahaton manang, pangalaosion di bagasan tanganku, jala na so mardosa ahu dompak ho, hape anggo ho sai diburu ho do hosangku naeng mamutus.

12(24-13) Ingkon Jahowa do manguhum hita sogot, jala Jahowa mangaluluhon ahu maradophon ho, alai na so tupa anggo tung tanganku mangonai tu ho.

13(24-14) Songon na nidok ni umpama ni natuatua di na robi: Sian halak parjahat ro hajahaton; alai anggo tanganku na so tupa mangonai tu ho.

14(24-15) Tung apala ise ma na nilelean ni raja sian Israel? Tung apala ise ma na pinaburuburum? Tung biang naung mate ulaning, manang tung hutu ni biang sada?

15(24-16) Alai tahe ingkon Jahowa ma gabe Panguhum, Ibana manguhum hita, Ibana ma manatap manonggor, jala Ibana umbadahon badangku, jala Ibana mamintori ahu paluahon ahu sian tanganmu.

16(24-17) (III.) Jadi dung tolhas dihatahon si Daud angka hata ondeng tu si Saul, gabe didok si Saul ma: Nda soaramu do i, ale anaha Daud? Laos dipangiar si Saul ma soarana tumatangis.

17(24-18) Dung i ninna ma tu si Daud: Umpintor do ho sian ahu, ai na denggan do uhummu tu ahu, hape anggo ahu na jat do hubaloshon tu ho.

18(24-19) Nunga dipaandar ho sadarion denggan ni uhummu binahenmi tu ahu; nunga nian tutu dipasahat Jahowa ahu tu bagasan tanganmu, hape ndang dibunu ho ahu.

19(24-20) Ai tung sura jumpang halak musuna, tung tagamon ma paluaonna ibana mardalan di dalan hasonangan? Dibahen i sai dibaloshon Jahowa ma tu ho na denggan bahen balos ni na binahenmi tu ahu sadarion.

20(24-21) On pe, ida ma, tangkas huboto, sai gabe raja do ho sogot, jala hot do harajaon Israel di bagasan tanganmi.

21(24-22) Dibahen i sai uarihon ma tu Debata marbagahon tu ahu, paboa na so siaphononmu pinomparhu sogot, paboa na so pidomhononmu goarhu sian bagas ni damang.

22(24-23) Jadi diuarihon si Daud ma i tu si Saul. Dung i laho muli ma si Saul tu jabuna; alai anggo si Daud dohot angka donganna i nangkok do tu punsu ni dolok na gonting.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  1 Samuel 24 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel