Dual PanelI. Lumbalumba mangorai pangkangkungion sian neang ni roha 1-5. II. Mangorai halangguson 6-11. III. Mangorai marsipaotooto dohot angka dosa na asing 12-19. C. Hata sipaingot patoluhon (Poda 6:20-9:18). IV. Lumbalumba maradophon dalan ni sibabijalang 20-35
1(I.) Ale anaha, molo tung mangkangkung ho di donganmu, pola masijamaan tangan ho mangkangkung halak sileban.
2Tung sura naung tarjorgong ho binahen ni hatahata ni pamanganmu, jala naung tardapot ho binahen ni pangkataion ni pamanganmu.
3Songon on ma bahen ale anaha, sai palua ma dirim ale naung tarjobung ho tu bagasan tangan ni donganmu; laho ma ho padoras langkam jala parajarajai donganmi!
4Unang loas tarnono matam, manang mondokondok langkop ni matam.
5Sai palua ma dirim songon hije sian tangan ni parburu, jala songon pidong sian tangan ni parsambil.
6(II.) Laho ma ho, ale sigurbak ulu marsiajar tu porhis, parateatehon ma angka dalanna, asa marbisuk ho!
7Nang so adong di ibana induk manang partogi manang pangarajai.
8Sai dipadiri do bohalna di partaonan logo ni ari, dipapungupungu do sipanganonna di hamamasa ni gotilon.
9Sadia leleng on modommodom ho, ale sigurbak ulu? Sadihari pe ho hehe sian podomanmon?
10Otiknari modom, otiknari mondokondok, otiknari mangunsimpu tangan, laos peak modom, nimmu.
11Jadi ro ma hapogosonmu songon halak panamun, jala haraparonmu songon halak parlombulombu.
12(III.) Jolma parroha na jat sahali do baoa pangansi, na marpangalahohon ansiansi ni pamangan.
13Mangkidophidopi ia matana mangkatai do ibana marhitehite patna, martudutudu marhitehite jarijarina.
14Getegete do di bagasan rohana, sai tongtong do ibana patahitahi hajahaton, patubitubi parbadaan.
15Dibahen i ro hinamago tu ibana so pangkirimanna, tompu do ibana ripur, so hadaonan.
16Harohaon na onom on do dihagigihon Jahowa, jala marbiasbias rohana mida na papituhon:
17Mata haginjangon; dila pargapgap; tangan angka na mandurushon mudar na so marpipot.
18Roha na patubutubu gasa; pat angka na bontis marlojong tu hajahaton.
19Sitindangi pangansi na mangaturhon gapgap, jala na pabolabola halak na marhahamaranggi.
20(IV.) Ale anaha, sai radoti ma tona ni amangmu, jala unang tulakkon poda ni inangmu.
21Duduk ma angka i tongtong tu bagasan roham, jala horunghorungkon tu rungkungmu.
22Molo mardalani ho, ingkon i ma mangiringiring ho; molo modom ho, ingkon i ma mangaramoti ho; jala ia dungo ho muse, ingkon i ma donganmu mangkatai.
23Ai sulusulu do tona i, jala patik i do panondang, jala dalan tu hangoluan do angka pinsangpinsang ni pangajaron.
24Laho mangaramoti ho maradophon parompuan parjahat dohot maradophon dila elaela ni sibabijalang.
25Unang ma mangapian roham di hinaulina, jala unang tarjorgong ho binahen ni pangkirdop ni salibonna.
26Ai binahen ni parompuan sibabijalang sahat iba tu roti sanseat sambing, jala jolma ni halak sileban mangago tondi na arga i.
27Tung tarpatuba halak ma api di gedekgedekna, so soksohanna angka ulosna?
28Tung tarbahen halak ma mardalan di atas gara ni api, so matutung patna?
29Laos songon i do manang ise na manopot jolma ni donganna: Ndang tarbahen so manginsombut tu ganup na jerjer jamajama.
30Gari halak panangko ingkon hona uhum do, molo manangko ibana pasabam hisapna, ala male ibana.
31Tung sura dapot tartangkup ibana, ingkon uhum simamitui gararonna, pola ingkon sandok ugasan ni jabuna lehononna alina.
32Alai tung na lalaen do manang ise na mangalangkup jolma ni halak, na mangago tondina do halak na mangulahoni.
33Jea dohot haurahon manginona tu ibana, jala ndang hasalesean haurahonna.
34Ai pangiburuon manunggul rimas ni baoa, jala ndang maralangalang rohana di ari partubolon i.
35Ndang parduli ibana di uhum pardengganan, jala ndang sombu rohana nang dipagodang ho dangdang.