Alkitab Mobile SABDA
[VER] : [TOBA]     [PL]  [PB] 
 <<  Lukas 9 >> 

I. Parsuru ni Tuhan Jesus di na sampuludua i 1-9. II. Ditamuei limaribu halak 10-17. III. Pangkatindangkon ni si Petrus 18-27. IV. Marsangap Tuhan Jesus di dolok 28-36. V. Dipamalum sada dakdanak na solpoton 37-45. VI. Harohaon ni sisean i 46-56. VII. Angka na giot mangihuthon Ibana 57-62.

1(I.) Dung i dipapungu ma na sampuludua i; dilehon ma tu nasida gogo dohot huaso, mangalo nasa tondi na hodar nang pamalum angka sahit.

2Disuru ma nasida mamaritahon harajaon ni Debata jala pahisarhon halak.

3Jala ninna ma mandok nasida: Unang boan hamu agia aha tu tongandalan, manang tungkot, manang singkop, manang roti, manang hepeng, manang dua baju pe.

4Jadi molo dung dibongoti hamu jabu, disi ma hamu mian; laos sian i ma hamu borhat muse.

5Anggo so dijangkon hamu, ruar ma hamu sian huta sisongon i; pirpirhon hamu ma orbuk i sian totmuna, bahen panindangion tu nasida.

6Jadi borhat ma nasida; diliati ma angka huta marbarita na uli huhut pamalum sahit di sasude.

7Dibege si Herodes, raja na opat i, ma sude na masa i, gabe bohabohaon ma ibana, ala adong na mandok: Nunga dipahehe si Johannes sian na mate.

8Na deba mandok: Nunga ro si Elia; na asing muse: Nunga mulak mangolu sahalak sian angka panurirang na robi.

9Alai didok si Herodes ma: Ianggo si Johannes, nunga hugotap uluna; alai ise ma On, naung songon i hubege baritana? Jala dipangido rohana, naeng idaonna Ibana.

10(II.) Asa dung mulak angka apostel i, dipajojor nasida ma tu Ibana nasa na niulanasida, gabe ditogihon ma nasida manginsurut tu sada huta na margoar Betsaida.

11Umboto i natorop i, diihuthon ma Ibana, jadi dijangkon Jesus ma nasida, dibaritahon ma tu nasida harajaon ni Debata jala dipamalum angka na hurang hipas i.

12Alai di na mareak guling bot, ro ma na sampuludua i mandok tu Ibana: Pamuli ma natorop i, asa laho nasida sorang tu angka huta dohot tu angka parladang humaliang, anggiat dapotsa sipanganon, ai halongonan do ingananta on.

13Alai ninna ma mandok nasida: Lehon hamu ma nasida mangan! Gabe ninna nasida ma: Holan lima roti dohot dua dengke do di hita, anggo so hami laho manuhori sipanganon di natorop on saluhutna.

14Ai arga limaribu halak do toropnasida. Laos ninna ma mandok siseanna: Dokkon hamu ma nasida juguk marsasapunguan, marlimalimapulu.

15Dipatupa nasida ma i, dipahundul ma nasida saluhutna.

16Dibuat Ibana ma na lima roti dohot na dua dengke i, ditailihon ma tu ginjang, laho mamasumasu; diponggoli ma, dilehon ma tu siseanna, asa nasida sumagihonsa tu natorop i.

17Mangan ma nasida saluhutna jala bosur be do; laos dibuat do angka ponggolponggol ebaebanasida, gok sampuludua ampang.

18(III.) Jadi uju martangiang Ibana sasadasa, didapothon angka sisean i ma Ibana, gabe disungkun ma nasida: Ise do Ahu didok natorop?

19Didok nasida ma mangalusi: Si Johannes pandidi do; na deba: Si Elia; na deba: Sahalak sian angka panurirang na robi, naung mulak mangolu.

20Gabe didok Ibana ma tu nasida: Anggo hamu, ise do Ahu didok hamu? Jadi ninna si Petrus ma mangalusi: Kristus ni Debata do Ho!

21Alai gogo ma nasida diorai, unang dipaboaboa i tu halak.

22Laos didok ma: Ia Anak ni jolma i, ingkon godang do taononna, bolongkonon ni angka panungganei, sintua ni malim dohot sibotosurat do Ibana, dung i pusaon do, jala mulak mangolu do di ari patoluhon.

23Tu saluhutna ma didok: Ia adong na naeng mangihuthon Ahu, disoadahon ma dirina, dituhuk ma ariari hau pinarsilang na tu ibana, laho mangihuthon Ahu.

24Ai agoan hosa ma na naeng paluahon hosana; alai na agoan hosa ala ni Ahu, i do na pangoluhonsa.

25Ai aha ma gunana di jolma, nang nasa portibi on diomo, anggo diago dirina, laos mago disi.

26Asa na olo maila ala ni Ahu dohot ala ni angka hatangki, pailaon ni Anak ni jolma i do ibana, di na ro Ibana di bagasan hasangapon na di Ibana dohot na di Ama i raphon angka surusuruan na badia i.

27Alai tutu do hatangkon tu hamu: Adong do deba na jongjong dison, na so tupa mangae hamatean, so jolo diida ro harajaon ni Debata.

28(IV.) Arga ualu ari dung salpu hata ondeng, ditogihon ma si Petrus, si Johannes dohot si Jakobus nangkok tu dolok martangiang.

29Jadi uju na martangiang Ibana, mimbar ma rupa ni bohina, jala marlinanglinang ma parabitonna.

30Mangkatai ma dua halak dohot Ibana; i ma si Musa dohot si Elia.

31Marhasangapon do nasida idaon, angka na humatahon ujung ni langkana, sipasidungonna di Jerusalem.

32Tarpodom do anggo si Petrus dohot angka donganna. Alai dung dungo nasida, gabe diida ma hasangaponna i, nang halak na dua i jongjong di lambungna.

33Jala martahi sirang nasida sian Ibana, ninna si Petrus ma mandok Jesus: O Guru, dengganna i dison! Hupauli hami ma soposopo tolu: Sada di Ho, sada di si Musa, sada di si Elia; so adong diboto na nidokna i.

34Mandok songon i dope ibana, ro ma ombun sada mangalinggomi nasida, gabe hatahutan ma nasida, laho bongot tubagasan ombun i.

35Jadi mangkuling ma sada soara sian ombun i mandok: On do Anakku na tarpili i; tangihon hamu ma Ibana!

36Jadi dung mangkuling soara i, sasada Jesus nama dapot nasida disi. Laos mauhom do nasida; ndang dipabotohon na niidanasida i tu agia ise anggo di angka ari i.

37(V.) Torang ni arina i tuat ma nasida sian dolok i, jala ro ma torop halak manjumpangkon Ibana.

38Jadi adong ma di tongatonga ni natorop i sahalak na manjouhon: Guru, sombangku di Ho, tatap ma anakki; sasada i do tubungku.

39Disi disoro tondi i ibana, manigor mangguhangguk ma, dipapuhung do ibana, pola margumogumo pamanganna; maol sumurut sian ibana, sai digosagosa do.

40Nunga huelehelek angka siseanmi, asa dipabali nian; alai ndang tarpatupasa i!

41Gabe dialusi Jesus ma mandok: E bangso na so porsea jala na sumalin on! Sadia leleng on angkupanku jala paanjuanjuonku hamu? Boan anakmi tuson!

42Mandapothon Jesus i dope nasida, nunga disoro tondi na jahat i ibana jala dipapuhung. Alai disonggahi Jesus ma tondi na hodar i jala dipamalum ma dakdanak i; dipasahat ma ibana tu amana.

43Tarhalomong do nasida saluhutna dibahen hasahalaon ni Debata. Jadi di na longang nasida mida sude pambahenanna i, ninna Ibana ma mandok siseanna:

44Tangihon hamu ma hatangkon: Magira ma pasahaton Anak ni jolma i tu tangan ni halak!

45Alai ndang diantusi nasida pandokna i; buni do i sian rohanasida, so diarti, jala tanggak do rohanasida, manungkun Ibana siala hata i.

46(VI.) Alai tubu ma pingkirannasida sama nasida: Manang ise nasida masuk na sumurung.

47Alai diboto Jesus do pingkiran ni rohanasida, gabe dialap ma sada dakdanak, dipajongjong ma tu lambungna.

48Laos didok ma tu nasida: Na olo manjangkon dakdanak on ala Goarhu, Ahu do na jinangkonna disi; jala na manjangkon Ahu, manjangkon na marsuru Ahu do. Ai na ummetmet sian hamu sude, i do na balga dohonon.

49Jadi mangkuling ma si Johannes, ninna ma: Guru, huida hami do sada halak, sipabali angka tondi na jahat mangasahon Goarmu; jala nioraan ibana, ala so didongani hami mangihuthon Ho.

50Didok Jesus ma tu ibana: Unang orai hamu ibana! Ai na so mangalo hamu, donganmuna do i.

51Alai di na lam donok ari hababangkitna, dipatohom ma bohina mardalan tu huta Jerusalem.

52Laos disuru ma angka suruanna patujolona. Jadi laho ma nasida, dibongoti ma sada huta ni halak Samaria, paturehon parbornginanna.

53Gabe ndang dijangkon nasida Ibana, ala dipatohom bohina laho tu Jerusalem.

54Marnida i siseanna si Jakobus dohot si Johannes, didok ma: Tuhan, anggo olo Ho, hudokkon hami ma turun api sian ginjang mangalengsehon nasida, (songon binahen ni si Elia).

55Alai humusor ma Ibana, hona hata ma nasida dibahen, (ninna ma: Ndang diboto hamu hape, manang Tondi dia di hamu?

56Ai laho paluahon, ndada mangagohon tondi ni jolma Anak ni jolma i, umbahen na ro). Jala tu huta na asing nama ditopot nasida.

57(VII.) Uju di tongandalan nasida, ninna sahalak ma mandok Ibana: Sai ihuthononku do Ho, manang tudia pe Ho laho.

58Didok Jesus ma tu ibana: Na marliang do angka antuasu, na marasar do pidong na martongatonga langit; alai anggo di Anak ni jolma i ndang adong hapeahan ni uluna.

59Ia tu sahalak na asing didok: Ihuthon Ahu! Alai didok i ma: Loas ahu jolo laho mananom damang!

60Alai ninna ma mandok ibana: Pasombu ma angka na mate mananom na matena; alai anggo ho, borhat ma mamaritahon harajaon ni Debata!

61Sahalak na asing muse mandok: Huihuthon pe Ho, Tuhan; alai loas ahu jolo martinading hata tu angka donganku sabagas!

62Alai ninna Jesus ma mandok ibana: Na manjama ninggala, huhut mamereng tu pudi, tung na so tau ma i tu harajaon ni Debata.


  Share Facebook  |  Share Twitter

 <<  Lukas 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel