Dual PanelDiona datu Salomo umbangun tongkonan layukna
1Apa iatu tongkonan layukna Salomo nabangun lan sangpulo tallu taunna; lan attu iato tepu nasang tu tongkonan layukna.
2Belanna nagaraga tu banua, tu disanga: Pangala’ Libanon; na iatu lambe’na saratu’ siku, babana limangpulo siku, na langka’na tallungpulo siku, natalimbung tama patang tibang lentong arasi’ na iatu daona lu lentong iato den tu pata’ kayu arasi’ dibingkung.
3Iatu banua iato dibubungi kayu arasi’ daona lu tu kalada’na, tu daona lu lentong; den patangpulo llima bilik, sangpulo lima ke sangborongoi.
4Sia tallung todo’ tu pentiroanna ditaralii, sia rundunni sitingoan simisa’ tu pentiroan tang ditaralii tallu.
5Iatu mintu’ ba’ba sia pentiroan tang ditaralii, massulapa’ a’pa’ tu ampangna; sia rundunni sitingoan simisa’ tu pentiroan tang ditaralii tallu.
6Napabendan duka tu sarambi dilentongi, limangpulo siku lambe’na, tallung pulo siku babana, sia misa’ sarambi dio tingayona, iamotu ba’tu pira lentong dipapasapei.
7Sia nagaraga duka tu bilik inan isungan kapayungan, tu nanii ma’paolai salu, iamotu bilik pa’paolaian salu, tu dilopak kayu arasi’ randuk diong mai salinna sae langngan rattiangna.
8Ia duka tu banua nanii torro lan tarampak senga’, rampe tamanna bilik pa’paolaian salu, pada bang garaganna. Sia nagaraga dukapa Salomo tu misa’ banua pada garaganna tu bilik pa’paolaian salu, napannii anakna baine Firaun tu napobaine.
9Mintu’nate batu maballo nasang, pada suka’na batu dipa’, tu digare’ge’ lanna lu sia salianna, randuk dio mai salinna sae langngan rattiangna, sia randuk duka dio mai batatta sae lako tarampak kalua’.
10Iatu mintu’ parandanganna batu maballo nasang, iamotu batu kapua, tu sangpulo siku sia karua siku lambe’na.
11Apa daona lu parandangan iato nanii batu maballo, tu pada suka’na batu dipa’, sia kayu arasi’.
12Iatu tarampak kalua’ tiku lao den misa’ rinding tembo’ tallu silopak dio mai batu dipa’, tu dilopak lentong kayu arasi’ dibingkung; susi dukato tu tarampak lanna lu banuanNa PUANG sia sarambi tongkonan layuk.
Mintu’ oongan tambaga dio banuanNa PUANG
13Mesuami tu datu Salomo untambai Hiram dio mai Tirus.
14Iamotu anakna misa’ baine balu dio mai rapu Naftali, na iatu ambe’na to Tirus, misa’ pande tambaga. Iatu Hiram manarang liu sia matarru’ sia paissan unggaraga mintu’ oongan tambaga. Saemi lako datu Salomo, anna karangngi tu mintu’ pengkaranganna.
15Nakombongmi tu da’dua lentong tambaga, iatu misa’ sangpulo karua siku langka’na, tu ma’din dilebu’ misa’ ulang pesuka’ sangpulo dua sikunna; susi dukato tu lentong misa’nao.
16Sia nagaragai duka tu parandena da’dua napatoppo’i daona lu lentong iato; iamo tambaga dipati’no’; iatu parande misa’ limang siku langka’na na iatu misa’na limang siku duka langka’na.
17Sia nagaragan duka pareanan dalla’ tu parande dao tampak daona lu lentong iato; iatu dalla’ iato ulang dikaridi’ digaragai, susi rante ditoke’: pitu dio to’ parande misa’ na pitu duka dio tu parande misa’nao.
18Sia nagaragai duka tu ba’tu pira-pira pa’bua dalima; duang tibang untikui tu dalla’ misa’, la ussamboi tu parande dao tampak daona lu lentong iato; napasusi dukato tu parande misa’nao.
19Iatu parande dio sarambi, patang siku langka’na, tu dao tampak daona lu lentong iato, ma’rupa danga-danga,
20iamotu parande tu dao lentong da’dua, tu dao iringna, daona lu dalla’, tu le’ke’ dio gasing-gasingna; na duaratu’ pa’bua dalima ma’tibang untikui tu parande misa’ sia susi dukato dio tu parande misa’nao.
21Mangkato napabendanmi tu da’dua lentong iato dio sarambinna bilik kalua’; iatonna pabendanni tu lentong dio kanan, nasangaimi Yakhin, sia iatonna pabendanni tu lentong dio kairi, nasangaimi Boas.
22Iatonna mangkamo dipale’ke’ tu panggaraga danga-danga dao tampak daona lu lentong iato, upu’mo garaganna tu lentong iato.
23Sia nagaragai tu tasik dipati’no’, sangpulo siku dio mai randanna sae lako randan misa’na, na langka’na limang siku, tu ma’din dilebu’ misa’ ulang pesuka’ tallungpulo sikunna.
24Na diong to’ randanna den tu ma’rupa katimun, tu untikui mintu’i, sangpulo lan ke sangsikuoi, tu untikui tasik male: iatu katimun duang tibangan, sangpati’noran.
25Iate tasik toppo’ dao sangpulo dua sapi, tallu mentingo rekke, tallu mentingo rokko matampu’, tallu mentingo sau’ na tallu mentingo tama matallo, na iatu tasik iato toppo’mo dao, namempollo’ tama nasang tu palongko’na.
26Iatu kambanna tasik iato sangpala’ na iatu garagan randanna susito baba irusan, ten to bunga danga-danga tiballa’. Na iatu alanna duangsa’bu ba’.
27Sia nagaragapa tu tangdan pembasean tambaga sangpulo; iatu misa’ tangdan patang siku lambe’na, patang siku babana na tallung siku langka’na.
28Susite tu garaganna tangdan iato dipalakoi papan tambaga; na iatu papan lan alla’ lentong.
29Dio papan lan alla’ lentong iato den tu rapang-rapang singa, sapi na karubion; susi dukato dio lentongna; daona lu sia diongna lu tu rapang-rapang singa sia sapi den tu karangan bunga, tu mendoke’ rokko.
30Dio lu simisa’ tangdan den a’pa’ lentenan tambaga sia batang lentenan tambaga; na dio a’pa’ lentong dio tetukna den toeanna; tu dipati’no’ diongna lu pembasean; dio lu sa’dena simisa’ toean iato den karangan bunga.
31Iatu babana lanna lu tu toeanna sia tarangsona sangsiku, na malepong tu babana, napotangdan pembasean; malikunna sangsiku sangtangnga; natisura’ duka tu babana, apa iatu papanna massulapa’ a’pa’, tae’ namalepong.
32Iatu a’pa’ lentenan dipadiongna lu papan iato sia iatu untoe lentenan dipadio tangdan sia mintu’ lentenan iato sangsiku ssangtangnga langka’na.
33Iatu garaganna tu lentenan iato susi lentenan kareta. Na iatu untoena lentenan sia pelengna sia taralinna sia lasukna pa’pati’no’ nasang.
34Na iatu a’pa’ toeanna dio a’pa’ tetuk dio tangdan ke simisa’oi, iatu toeanna le’ke’ dipasikande dio tangdanna.
35Dao tangdan iato den randanna sangtangnga siku langka’na, malepong tiku lao; sia daona lu tangdan iato den tu toeanna sia papanna dipasikande tangdan.
36Dio papan toeanna sia papanna nasura’ tu rapang-rapang karubion, singa sia koroma, dipebudai dipasitinaya tu inanna, sia karangan bunga tiku lao.
37Napasusimo garaganna to tu sangpulo tangdan, pada nasang tu pa’pati’no’na, suka’na sia rupanna.
38Sia nagaraga tu sangpulo pembasean, misa’ pembasean patangpulo ba’ alanna, patang siku lua’na, ke simisa’oi nanii pembasean.
39Napalakomi inanna tu tangdan, iamotu lima dio rampe kananna na lima dio rampe kairinna banua iato; na iatu tasik napatorro dio rampe kananna banua iato, dio kasiallaran matallo pollo’na uai.
40Nagaragai dukami Hiram tu kurin sia pesodok sia pindan pa’pi’pikan. Napasusimo Hiram ummangkai to tu mintu’ pengkarangan tu nagaragan datu Salomo dio banuanNa PUANG:
41iamotu da’dua lentong, da’dua gasing-gasing parande tu daona lu lentong iato, da’dua dalla’ la ussamboi tu da’dua gasing-gasing parande tu daona lu lentong,
42sia a’pa’ratu’ bua dalima la dipalakoanni tu da’dua dalla’, duang tibang dalima, ke misa’oi dalla’, la ussamboi tu da’dua gasing-gasing parande daona lu lentong iato,
43sia iatu sangpulo tangdan na sangpulo pembasean dao tangdan iato,
44sia iatu tasik misa’ sia iatu sangpulo dua sapi diongna lu tasik iato,
45sia iatu kurin sia pesodok sia pindan pa’pi’pikan; iate mintu’ oongan iate tu nagaragan Hiram datu Salomo la dipalan banuanNa PUANG, tambaga dipapandillak digaraga.
46Napati’no’ datu tu oongan iato dibo’bokan pa’pati’noran mandalan dio Padang lili’na Yordan, dio kasiallaranna Sukot na Sartan.
47Napatorro bangmi Salomo tu mintu’ oongan iato, tae’ natimbangi, belanna tarru’ buda; iatu tambaga tae’mo nadireken timbanganna.
48Sia nagaragai duka Salomo tu mintu’ oongan tu inang la den lan banuanNa PUANG, iamotu inan pemalaran bulaan sia meda bulaan tu dipannii roti dipennoloan dao,
49sia tongkonan palita bulaan massang lima dio rampe kananna sia lima dio rampe kairinna dio tingayona bilik dio boko’; sia iatu bunga tiballa’, palita sia pesipi’ bulaan digaraga;
50sia iatu dolong-dolong, piso, pindan pa’pi’pikan, piring sia perruayan bulaan massang digaraga; sia engse’ ba’ba bilik lanna lu tu diolai lako bilik mandu maindan sia engse’ ba’ba bilik kapua dio Banua Kabusungan bulaan digaraga.
51Iatonna mangkamo tu mintu’ pengkarangan nakarang datu Salomo dio banuanNa PUANG, nabaami Salomo tama tu pareananna Daud, ambe’na, tu napamarimbangan; iatu salaka sia bulaan na iatu mintu’ pareanan iato napatorro lan bilik pangnannan lan banuanNa PUANG.