Dual PanelDaud dio Nob
1Rampomi tu Daud lako Nob, lako to minaa Ahimelekh; saemi tu Ahimelekh ma’parondo untammui Daud, anna ma’kada nakua: Ma’apari nakamu manna misa-misa, tae’ tau misolan?
2Nakuami Daud lako to minaa Ahimelekh: Den misa’ apa nasuanna’ datu, nakua: Da naden misa’ tau unnissanni moi sidi’ duka tu apa kusuangko sia kupasan lako kalemu. Iatu mintu’ taungku kusua lako ba’tumba umba nii inan.
3Dadi totemo, denraka kande iti’? Benna’ roti lima ba’tu kande senga’ tu denna kubaai.
4Mebali tu to minaa iato lako Daud, nakua: Tae’ roti biasa dio kaleku, sangadinna roti maindan manna den, ia mannapi ke untoyangan siai kalena tu mintu’ tau iato mai dio mai baine.
5Mebalimi Daud lako to minaa iato, nakua: Inang dipatoyangkan dio mai baine susi dolona, ke tassu’ona’ parari, sia maindan tu pa’bunona tau iato mai; sia iate kalingkan iate, moi nabiasa, apa napamaindan pa’buno.
6Nabenmi to minaa tu roti maindan, belanna tae’ roti senga’, sangadinna roti dipennoloan manna, tu biasa diangka’i dio mai oloNa PUANG, anna dipalangnganni roti ba’ru to allo iato, ke diangka’i tu roti masai.
7Allo ia dukato den misa’ taunna Saul dio, tu marimbangan la menomba dio oloNa PUANG, disanga Doëg, misa’ to Edom, iamo pangulunna mintu’ to mangkambi’na Saul.
8Nakuami Daud lako Ahimelekh. Tae’raka doke iti’ misa’ ba’tu pa’dang? Apa tae’ kupakala umbaa pa’dang ba’tu pa’buno belanna mesuamo tu datu umpasasana’.
9Nakuami tu to minaa iato: Pa’dangna manna Goliat, to Filistin, tu mipatei diong lombok Tarpin, inde, dibimbin sampin dio boko’ epo’. Iammi la morai unnalai, alami, belanna tae’ senga’na inde, ia manna to misa’. Nakuami Daud: Tae’mo susinna tu; benmo’!
Daud dio Gat
10Allo ia dukato ke’de’mi tu Daud namallai dio mai olona Saul, anna rampo lako Akhis, datu Gat.
11Apa nakua tu mintu’ to mase’ponna Akhis lako datu: Tangiaraka te tu Daud, datunna tondok iato? Tae’raka na iamotu napa’dandanan tau, nakua: Napatei Saul massa’bu-sa’bu! Apa Daud ma’lampa-lampa!
12Natangnga’-tangnga’mi Daud tu mintu’ kada iate anna lendu’ mataku’na lako Akhis, datu Gat.
13Iamoto unna’ga bomboammi kalena dio tingayona tau iato mai sia susito bomboan masarrang tu kedona tonna la’ka’i tau, anna ma’gorri’-gorri’ lako ba’ba rapi’, napalembo’i tu elo’na rokko danggo’na.
14Ma’kadami Akhis lako mintu’ to mase’ponna: Mitiromo kumua bomboan te tau iate, ma’apai ammi baai lako kaleku?
15Kakuranganra’ka to bomboan, ammi baari mai te to bomboan, kumua anna maritu dio oloku? Sipaturaka te tau susite la tama tongkonan layukku?