Dual PanelDiona Daud sia Nabal na Abigail
1Ta’kala matemi tu Samuel anna sirampun tu mintu’ to Israel ma’pote dibolong anna lamunni lan banuanna dio Rama. Ke’de’mi tu Daud anna solo’ rokko padang pangallaran Paran.
2Denmi dio Maon misa’ tau tu den pallaoanna dio Karmel. Iatu tau iato lendu’ ia sugi’na; unnampui domba tallungsa’bu sia bembe’ sangsa’bu; marassan unggontingi bulu dombana dio Karmel.
3Iatu tau iato disanga Nabal, na iatu bainena disanga Abigail. Iatu baine iato ma’tangnga’ kinaa sia melo pantarisanna, apa iatu muanena makarra’ penaanna sia kadake kedona; sia ia misa’ to Kaleb.
4Denmi kareba narangi Daud lan padang pangallaran, kumua: Marassan tu Nabal unggontingi bulu dombana.
5Nasuami Daud tu solana sangpulo sia napasan nakua: Malekomi lako Karmel; iammi rampo lako Nabal, pekutanampa’ tu kamalaga’-lagaranna.
6Sia la mipokada susite: Salama’! Denno upa’ ammi malaga’-laga’ sia malaga’-laga’ tu sangdadiammi sia iatu mintu’ dio kalemi.
7Denmo kareba kurangi kumua den tau unggontingi bulu dombami; ba’tu sangapakan sola tu mintu’na to mangkambi’mi, tae’ kirosoi sia moi misa’ tae’ nakapa’dean tu tau iato mai tonna diopa Karmel.
8Melo mipekutanan tu iannato lako taummi, manassa napokada tau iato mai lako kalemi. Iamoto melo ke umpa’pekitanangkomi pa’kamaseammi lako tau iato mai, belanna saekanni ussitammuangkomi lan attu melo. Benni dikka’ te kaunanmi sia Daud, anakmi, padami narurunna limammi.
9Ta’kala rampomi tu taunna Daud, anna pokadai lako Nabal mintu’ kada iate tete dio sanganna Daud; mangkato kappami tu tau iato mai.
10Nabalimi Nabal tu mintu’ taunna Daud, nakua: Minda toda ia tu Daud sia minda toda tu anakna Isai? Totemo budamo tau, pada male umboko’i puangna.
11Ma’apai angku la morai unnala rotingku sia uaingku sia pantunungku tu kutunuan mintu’ to ma’gontingku, angku la umbenni to tae’ kutandai umba nanii sae?
12Ta’pa tibalikmi tu taunna Daud anna sule umpokadanni Daud tu mintu’ apa dadi.
13Ma’kadami tu Daud lako mintu’ taunna, nakua: La pada untakin nasangkomi pa’dangmi. Pantan untakin nasangmi pa’dangna sia Daud kalena untakin duka pa’dangna, anna male nasang tu tau iato mai unturu’ Daud, agi-agi a’pa’ratu’ tau na duaratu’ tu tau torro dio ungkampai mintu’ parea.
14Apa misa’i tu kaunan iato umpokadai tu apa iato lako Abigail, bainena Nabal, nakua: Iatu Daud ussua tau dio mai padang pangallaran umparampo salama’ lako puangki, apa nabali to’do’ puangki tu tau iato mai.
15Iatu tau iato mai buda tongan gai’na lako kaleki sia tae’ narosokan sia moi misa’ tae’ kikapa’dean temponki ma’lele-lele sikandappi’ tau iato mai tongki dio lu padang.
16Iatu tau iato mai butung to tembo’ ullilingikan la bonginna la masiangna, lan mintu’ allo kinii sikandappi’ ungkambi’ domba.
17Totemo la miissan sia la mitimbang melo tu apa sipatu la mipogau’, belanna dipamanassamo tu kasanggangan lako puangki sia lako mintu’ to lan banuanna. Tonganna iamo misa’ to kadake, tu tang diissan disipa’kadan.
18Madomi’mi naala Abigail tu roti duaratu’ batunna sia da’dua kiriba’ anggoro’ sia lima domba mangka ditunu sia passara’buk limang se’a sia deppa bua anggoro’ dirangkei saratu’ sia bua ara duaratu’ lemunna, mintu’nato dipalangngan keledai,
19anna ma’kada lako taunna, nakua: Malemokomi dolo, kuundimora dio boko’. Moi misa’ tae’ napokadanni Nabal, muanena tu apa iato.
20Iatonna solo’mo rokko ma’keledai narerung buntu, anna solo’ dukamo tu Daud sola taunna umpempatui, ta’kala bendanmi tu baine iato dio tingayona.
21Iatu Daud ma’kada susite: Tonganna tae’ bang gai’ku ungkaritutui tu mintu’ apanna tau iato dio lu padang, naurunganni moi misa’ tae’ pa’de tu mintu’ apanna; totemo napakkan kadake tu kameloangku.
22Nasanggangmira Puang Matua tu ualinna Daud sia la Narangngannipa, ke masiangi melambi’ angku patuopi moi misa’ duka muane tu mintu’ muane sia patuoan laki dio kalena.
23Iatonna tiromi Abigail tu Daud, salasami mengkalao dao mai keledainna anna menomba sia tukku sae rokko padang dio olona Daud,
24menombami rokko to’ lentekna, anna ma’kada, nakua: Akumo umpassanni tu mintu’ sala; apa elorampa’ dikka’ sipa’kada puang sia naperangiipi puang te kadangku.
25Da nadampangi puang tu Nabal, to kadake, belanna susi sanganna susi dukato tu kedona. Nabal tu sanganna sia ia duka tu kabagan dio kalena. Iatu aku tae’ kutiroi tu taummi tu misua.
26Totemo, o puang, la tilelukraka tuoNa PUANG sia tuona puangku, manassa PUANG undampakomi tobang rokko kasalan umpatibollo rara sia untuntun kalena bang katonganammi. Nasusimora Nabal tu mintu’ ualimmi sia iatu mintu’ to undakarangkomi kadake.
27Iate mintu’ pamengan napennoloan kaunanmi lako puang, la diben mintu’ taummi tu unturu’ bate lalanna puang.
28Pagarri’i tu kapatodo-tintinganna kaunanmi, apa PUANG la unggaragangkomi misa’ banua matontongan, belanna mipogau’mo tu rarinNa PUANG sia moi misa’ kakadakean tae’ diapparan dio kalemi lan mintu’ allo katuoammi.
29Iake bendanni misa’ tau la unnula’komi sia la undaka’ lalan la umpateikomi, la dipori lan pa’pulunganna to tuo tu deatammi dio oloNa PUANG, Kapenombammi, apa iatu deatanna mintu’ ualimmi la dipellebaran lan mai inan batu pekolak.
30Iake napogau’mi PUANG lako kalemi tu mintu’ kameloan naallurangkomi sia Naangka’komi dadi arungna to Israel,
31manassa apa iate tae’ nadadi katitodoan lako puang ba’tu la urroso penaammi, kumua mangkamo tu puang umpatibollo rara na tae’ bannangna sia untuntun kalena bangkomi katonganammi. Ianna pogau’mi PUANG tu kameloan lako kalemi, attu iato kilalaimi te kaunanmi.
32Nakuami Daud lako Abigail: Mintu’na kadipudian lu langngan nasang PUANG, Kapenombanna to Israel, belanna Nasuako sae umpessitammuina’ allo iate!
33Sia kapudian tu tangnga’ kinaammu ammu sikambi’mora karongkosan, belanna allo iate mudampamo’ tobang rokko kasalan umpatibollo rara sia untuntun kalena bang katonganangku.
34Belanna la lelukraka tuoNa PUANG, Kapenombanna to Israel, tu undampana’ umpogau’ kadake lako kalemu, kenna tae’ musae madomi’ umpessitammuina’, manassa masiang tae’pa naberre’ allo moi misa’ duka muane tae’mo torro sola Nabal!
35Natarimami Daud dio mai limanna tu apa nabenni, anna ma’kada lako nakua: Sule marampa’moko rekke banuammu, kuturu’mo tu kadammu sia kutarimamo tu palakummu.
36Iatonna rampomo tu Abigail lako Nabal, natiromi: lan banuanna den misa’ pa’maruasan susi pa’maruasan datu sia parannu paiman tu penaanna Nabal sia lendu’ ia malangona. Iamoto anna moi sangbuku kada tae’ napokada Abigail lako kalena, la kapua, la bitti’ sae lako melambi’na.
37Melambi’ dio mai tonna pa’demo tu re’de uai anggoro’ pangiru’na Nabal, napokadammi bainena lako tu mintu’ apa iato. Ronno’mi tu buana, anna dadi susi batu.
38Iatonna agi-agimo sangpulo allona lendu’na Napata’paimi lima PUANG tu Nabal, anna mate.
39Iatonna rangimi Daud, kumua matemo tu Nabal, ma’kadami nakua: Mintu’na kapudian lu langngan PUANG tu untuntunanna’ kara-karaku sia umpakkanni lako Nabal tu kanalo’boangku sia Nadampamo tu taunNa la umpogau’ kadake sia iatu kakadakean Napasule PUANG langngan ulunna Nabal. Mangkato nasuami Daud tu tau male sipa’kada Abigail umpokadanni, kumua la napobaine.
40Iatonna rampomo tu pesuanna Daud lako Abigail dio Karmel, ma’kadami tu tau iato mai nakua: Kami te nasuakan Daud, belanna la morai umpobainekomi.
41Ke’de’mi tu Abigail anna tukku sae rokko padang, nakua: Melo ke ia te taunna puang mendadi kaunan la umbasei lette’na taunna puangku.
42Tikarami tu Abigail ke’de’ dio mai ma’keledai sibaa to ma’kamayana lima, unturu’i tu pesuanna Daud; anna dadi bainena Daud.
43Sia ia duka tu Ahinoam dio mai Yizreel naalamo Daud, napasibayuranni.
44Apa iatu Mikhal, anakna Saul, bainena Daud, napa’benganmo Saul napobaine Palti, anakna Lais, tu dio mai tondok Galim.