Dual PanelNakanana’i pole’omo Daud tu katuoanna Saul
1Ta’kala saemi tu to Zif mennolo lako Saul dio Gibea, nakua: Tae’raka miissanni, kumua membuni tu Daud dao tanete Hakhila sikandappi’ padang talo?
2Ke’de’mi tu Saul anna solo’ rokko padang Zif sia tallungsa’bu tu to Israel ditonno’ nasolan, la undaka’ Daud dio padang pangallaran Zif.
3Napabendanmi Saul tu tendanna dao tanete Hakhila, sikandappi’ padang talo, dio biring lalan, anna torro tu Daud lan lu padang pangallaran. Iatonna tiromi Daud tu Saul solo’ rokko padang pangallaran unnula’i,
4nasuami tu ba’tu pira-pira tau ummata-matai, iamoto anna tandai tu manassana kasaenna Saul.
5Ke’de’mi tu Daud anna rampo lako inan nanii Saul umpabendan tendana, natiroi Daud tu naninna Saul mamma’ sia Abner, anakna Ner, pa’baraninna. Iatu Saul mamma’ dio to’ tenda dikampai namintu’ tu surodaduna mamma’ umparitangngai.
6Ma’kadami Daud lako Ahimelekh, to Het sia lako Abisai, anak Zeruya, siulu’na Yoab, nakua: Minda morai kusolan solo’ rokko Saul, lako to’ tenda iato mai. Mebalimi Abisai, nakua: Aku tu morai solo’ ussisolangkomi.
7Rampomi tu Daud sola Abisai lako mintu’ surodadu iato tonna bongi; iatu Saul mamma’ lan to’ tenda dikampai sia iatu dokena tipennosok rokko padang dio to’ ulunna, sia iatu Abner sola mintu’ surodadu mamma’ umparitangngai.
8Nakuami Abisai lako Daud: Allo ia duka te Nasorongi Puang Matua tu ualimmi tama limammi. Da’ito kupissanni kurok doke iate anna silinda’ padang, da kupenduanni kurok.
9Apa nakua Daud lako Abisai: Da musanggangi tu datu, belanna mindara tu umpata’pai lima tu to Natokko PUANG, anna torro masero dio mai kasalan?
10Sia nakuapa Daud: La lelukraka tuoNa PUANG, manassa la nasanggangi PUANG; ba’tu la nalambi’mi lampakna, naurungan mate, ba’tu malei parari anna dipatei.
11Napatoyangmora’ PUANG la umpata’pai lima tu to Natokko PUANG. Totemo alami tu dokena tu dio to’ ulunna sia iate busso, anta male.
12Naalami Daud tu doke sia busso dio mai to’ ulunna Saul, anna male sola duai, na moi misa’ tau tae’ untiroi ba’tu untandai sia moi misa’ tau tae’ pana’ding, sangadinna mamma’ nasangi, belanna Napamamma’ kalupi-lupian PUANG tu tau iato mai.
13Iatonna rampo Daud lian rampe lakona, bendanmi dao botto buntu, mambela lako, naurungan sikambela kasiallaranna.
14Anna metamba tu Daud lako mintu’ surodadu sia lako Abner, anak Ner, nakua: Tae’raka mimebali, e Abner? Mebalimi Abner, nakua: Mindarako tu metamba lako datu?
15Nakuami Daud lako Abner: Tang pia muanerokomika? mindara padammi dio lu mintu’ to Israel? Ma’apai natae’ mikampai tu datu, puangmi, naurungan dio mai mintu’ tau ma’din sae misa’ ussanggang datu, puangmi?
16Tae’ liu namelo te penggaurammi te! La lelukraka tuoNa PUANG, kamu sola nasang tau la dipatei, belanna tae’ mikampai tu puangmi, tu mangka Natokko PUANG! Totemo malemokomi untiroi umbami tu dokena datu sia busso, tu dio to’ ulunna datu?
17Natandaimi Saul tu gamaranna Daud, anna ma’kada nakua: Gamarammuraka to, o Daud, anakku? Nakuami Daud: Io puangku datu, iamote tu gamarangku.
18Sia nakuapa: Ma’apari naula’ra’ puangku susite? Apara penggaurangku sia kakadakean apara kupogau’?
19Totemo la naperangii puangku te kadangku. Iake PUANG umpatudu puangku la umbalina’, melo dirambu pemala’; apa iake tolino, naruamira tampak ropu tu tau iato mai dio oloNa PUANG, belanna naula’imo’ totemo, kuurunganni sikalangkamo mana’Na PUANG, nakuami ma’kada: Malemoko umpenombai deata senga’.
20Iatu raraku dennoupa’ da natibollo rokko padang mambela dio mai oloNa PUANG. Belanna iatu datu to Israel sunmo la undaka’ misa’ talla sia susito unnula’ manuk lampung dao lu tanete.
21Nakuami Saul: Kasalammo’! Sulemoko, e anakku Daud, tae’mo kula umpogau’ kadake lako kalemu, belanna mupa’budai tongan tu katuoangku te allo iate. Manassa iatu penggaurangku baga tongan sia manduna’ pusa.
22Mebalimi Daud, nakua: Tiromi inde sia tu dokena datu. Suami tu tau misa’ mai unnalai.
23Na PUANG pantan la umpapakkanni tu kamaloloanna sia kamarurusanna, belanna PUANG ussorongkomi lako kaleku allo iate, apa manokana’ umpata’pai lima tu to Natokko PUANG.
24Susi allo iate kupa’budai tu katuoammi, susi dukamoto Nakaritutuimira PUANG tu katuoangku, Narampananna’ dio mai mintu’ kasanggangan.
25Nakuami Saul lako Daud: Musikambi’mora karongkosan, e anakku Daud; apa-apa tu mupogau’, la mupomaupa’. Mangkato malemi sule tu Daud, na iatu Saul sulemo lako inanna.