Dual PanelDaud tang naeloran to Filistin male sola urrarii to Israel
1Napasirampunmi to Filistin tu mintu’ surodadunna dio Afek na iatu to Israel ma’tenda sikandappi’ tu kalimbuang dio Yizreel.
2Iatonna lendu’ tu mai arung kota to Filistin sola to budanna ma’ratu’ sia massa’bu sia Daud sola mintu’ taunna undi sola Akhis,
3ma’kadami mintu’ pangulunna surodadu to Filistin, nakua: Ma’apari tu mintu’ to Ibrani indete? Nakuami Akhis lako mintu’ pangulunna surodadu to Filistin: Tangiaraka Daud te, taunna Saul, datu to Israel, tu taun iate, sia ba’tu sangapa-apamo masainna kusisolan, na moi misa’ salana tae’ kuapparan temponna messarak lako kita sae lako allo iate.
4Apa nasengkei mintu’ pangulunna surodadu to Filistin, anna ma’kada tu mintu’ pangulunna surodadu to Filistin lako, nakua: Suai tu tau iatu sule lako to’ inanna tu mipamanassanni; da tamale rokko sola parari, dadi manii balinta lan kasirarian, belanna apa la napakatananni tu puangna ke tang ulunna te mintu’ tau iate?
5Tang Daud iaraka te tu napopenanian tau a’ganna tonna ma’dandan sisonda-sonda menani, nakua: Napatei Saul massa’bu-sa’bu! Apa Daud ma’lampa-lampa?
6Attu iato natambaimi Akhis tu Daud, anna ma’kada lako nakua: La lelukraka tuoNa PUANG, anna la leluk tu kabulolollongammi, iake aku kusanga melo, ke maleki’ sia suleki’ sola surodadu, belanna tae’ kuapparanni tu kakadakeammi tempommi sae umpelambi’ina’ sae lako allo iate. Apa tang naalakomi penaanna mintu’ arung kota to Filistin.
7Iamoto la sulekomi ammi malaga’-laga’ sia da mipogau’ apa nasanga kadake arung kota to Filistin.
8Ma’kadami Daud lako Akhis, nakua: Apara tu kupogau’ sia apamora misayuanna’ temponku dio kalemi sae lako allo iate, angku tang ma’dinra misolan urrarii ualinna puangku?
9Mebalimi Akhis lako Daud, nakua: Kuissan kumua naala tongankomi penaangku susito misa’ malaeka’Na Puang Matua. Apa kadanna tu mintu’ pangulunna surodadu to Filistin, kumua: Da nadieloran male unturu’ki’ parari.
10Iamoto la mela’bikkomi millik sola mintu’ taunna puangmi, tu sae misisolan; ianna melambi’ millikmokomito, iake berre’mi allo, ammi ke’de’ sule.
11Mela’bikmi tu Daud millik sola mintu’ taunna la male ke masiangmi, anna sule lako tondok to Filistin. Apa mintu’ to Filistin malemo lako Yizreel.