Dual PanelKaditambaianna Samuel
1Iatu Samuel tomangura iato umpogau’ toena lako PUANG napatudu Eli. Attu iato masagalamo tu kadanNa PUANG sia tae’mo dipaombo’ tu patiro mendeata.
2Den pissan to attu iato tonna mamma’ tu Eli dao inan kamammaranna, na attu iato randuk dukamo maraun tu matanna Eli, tang mano’ramo pentirona.
3Iatu lampunNa Puang Matua tae’pa napa’de sia iatu Samuel mamma’mo lan banuanNa PUANG, dio to’ inan pattinNa Puang Matua.
4Natambaimi PUANG tu Samuel, anna ma’kada nakua: Inde siana’.
5Ma’dondomi male lako Eli anna ma’kada nakua: Inde siana’, apara mitambanna’? Apa mebali tu Eli, nakua: Tae’ra kumetamba, malemoko mamma’ sule. Malemi anna mamma’ sule.
6Natambai pole’omi PUANG tu Samuel. Millikmi tu Samuel anna male lako Eli, anna ma’kada nakua: Inde siana’, apara mitambanna’? Apa mebali tu Eli, nakua: Tae’ra kumetamba, e anakku; melo kesuleko mamma’.
7Iatu Samuel tae’pa natandai tu PUANG sia tae’ lenpa misa’ tu kadanNa PUANG dipaombo’ lako kalena.
8Natambai pole’omi PUANG tu Samuel ma’pentallunnamoto, anna millik namale lako Eli anna ma’kada, nakua: Inde siana’, apara mitambanna’? Attu iato maneri naissan Eli, kumua PUANG untambai tu tomangura iato.
9Iamoto ma’kadami tu Eli lako Samuel, nakua: Malemoko mamma’ sule’; iake Natambai pole’ko, la mebaliko mukua: Ma’kadamoKomi PUANG, belanna napatananmo tu talinganna taumMi. Malemi tu Samuel anna mamma’ sule dao inanna.
10Saemi tu PUANG bendan dio sia Natambai susito lendu’na, Nakua: E Samuel, Samuel! Mebalimi tu Samuel: Ma’kadamoKomi, belanna napatananmo tu talinganna taumMi.
11Ma’kadami tu PUANG lako Samuel, Nakua: Manassa la umpogau’Na’ misa’ penggauran lan lu to Israel, naurungan tilanta’ lan talinganna minda-minda urrangii.
12Attu iato la Kuparampoan Eli mintu’ apa tu Kupokada diona to lan banuanna randuk dio mai tipamulanna sae lako ma’katampakanna.
13Belanna mangkamo Kupa’peissanan, kumua Aku la unnukungi tu to lan banuanna sae lakona, diona tu mintu’ kakadakean naissan, belanna iatonna umpasae tampak ropu lako kalena tu anakna sola duai, inang tae’ bang nagarrakki.
14Iamoto angKu sumpai tu diona to lan banuanna Eli, kumua iatu kakadakeanna to lan banuanna Eli inang tae’ nala diseroi pemala’ ba’tu kande dipemalaran sae lakona.
15Mamma’mi tu Samuel sae lako melambi’; anna bungka’i tu ba’ba banuanNa PUANG, apa mataku’ tu Samuel umpokadanni Eli tu patiro mendeata iato.
16Natambaimi Eli tu Samuel, nakua: E anakku Samuel! Mebalimi nakua: Indena’!
17Nakuami Eli: Kada apara tu Napokadangko. Da mubunianna’. La Nasanggangiko Puang Matua, sia la Narangngannipa, ke denni mubunianna’ moi sangbuku tu mintu’ kada Napokadangko.
18Napokadammi Samuel tu mintu’ kada iato, moi sangbuku kada tae’ nabuni len. Nakuami Eli: Iamo Ia PUANG, da’ito anNa pogau’i tu apa Nasanga melo dio pentiroNa.
19Sakapua-puanami tu Samuel sia Narondong PUANG sia moi sangbuku tu mintu’ kadanNa tae’ tang membua.
20Sia mintu’ to Israel randuk dio mai Dan sae lako Bersyeba unnissanni, kumua iatu Samuel nabi manappa’Na PUANG.
21Mempaan pole’omi tu PUANG dio Silo, belanna umpaombo’ Kalena lako Samuel dio Silo tete dio kadanNa PUANG.