Dual Panel1Saemi tu to Kiryat-Yearim unnalai tu pattinNa PUANG, anna baai langngan banuanna Abinadab, tu dao tanete, anna pamaindanni tu Eleazar, anakna, anna ia ungkampai tu pattinNa PUANG.
Kaditaloanna to Filistin dio Mizpa
2Temponna dio Kiryat-Yearim tu patti iato den ba’tu pirang-pirang taun lendu’na, sae lako duangpulo taunna, namane mintu’ to Israel sumarro namengkaola lako PUANG.
3Attu iato ma’kadami tu Samuel lako mintu’ to Israel, nakua: Iake lantuk tonganni penaammi mengkatoba’ lako PUANG, la mitibe tu mintu’ rapang-rapang dipodeata dio mai kalemi, susi dukato tu mintu’ Astoret sia la mipopennolo lako PUANG tu penaammi sia Ia manna la mipenombai, na ia ke susito, Iamo la ullendokankomi dio mai limanna to Filistin.
4Natibemi to Israel tu mintu’ Baal sia Astoret, nalako mannamo PUANG nanii menomba.
5Mangkato nakuami Samuel: Rampunni tu mintu’ to Israel lako Mizpa, angku pengkamoyangkomi lako PUANG.
6Sirampunmi tu tau iato mai dio Mizpa, anna timba uai, nabolloanni dio oloNa PUANG. Allo iato ma’puasami tu tau iato mai, anna ma’kada inde to dio, nakua: Kasalanmokan lako PUANG. Umpalalomi toean to parengnge’ tu Samuel lako to Israel dio Mizpa.
7Iatonna rangimi to Filistin, kumua sirampun tu to Israel dio Mizpa, nalaoimi mintu’ arung kota to Filistin tu to Israel. Iatonna rangimi to Israel tu iannato, mataku’mi lako to Filistin.
8Ma’kadami tu mintu’ to Israel lako Samuel, nakua: Da mitorroi umpengkamoyangkan lako PUANG Kapenombangki, anna Ia urrampanangkan dio mai limanna to Filistin.
9Naalami Samuel tu anak domba sumusu misa’, napemalaran nasangi lako PUANG, la dadi pemala’ ditunu pu’pu’. Napassambayangammi Samuel tu to Israel lako PUANG, anNa tarimai PUANG tu palakunna.
10Iatonna marassan Samuel umpemalaran pemala’ ditunu pu’pu’, ta’kala saemi tu to Filistin la urrarii to Israel, apa allo ia dukato gumalugu tu PUANG, metakuran tu guntu’Na lako to Filistin; Napamarambai tu tau iato mai, naurunganni natalo to Israel.
11Tassu’mi tu to Israel lan mai Mizpa, naula’i tu to Filistin, nataloi sae lako rokkona Bet-Kar.
12Attu iato naalami Samuel tu batu misa’ napabendanni dio kasiallaranna Mizpa na Yesana sia nasangai Eben-Haezer, anna ma’kada nakua: Rampo indete Nanii PUANG untunduiki’.
13Susimoto tu diona to Filistin ditalo sia tae’mo natama lili’ padangna to Israel; anna limanNa PUANG unnea to Filistin lan mintu’ allo katuoanna Samuel.
14Namintu’ tu tondok narampa to Filistin dio mai to Israel sule nasang lako to Israel randuk dio mai Ekron sae lako Gat; susi dukato tu mintu’ lili’na, naala to Israel dio mai to Filistin; sia den kasikaeloanna tu to Israel na to Amori.
15Iatu Samuel urrengnge’ to Israel lan mintu’ allo katuoanna.
16Taunoi-taunoi maleoi tu Samuel ullelei tondok randuk dio mai Betel sae lako Gilgal sia Mizpa, sia dio mintu’ tondok iato nanii ullembanganni tu toean to parengnge’ lako to Israel.
17Iake mangkaomi to suleomi lako Rama, belanna dio tu banuanna sia inde to nanii ullembanganni tu toean to ma’parenta lako to Israel; sia inde dukato dio nanii umpabendanan misa’ inan pemalaran PUANG.