Dual PanelSamuel untokko Saul dadi datu
1Denmi misa’ tau dio mai suku Benyamin, disanga Kish, anakna Abiel, anakna Zeror, anakna Bekhorat, anakna Afiah, misa’ to Benyamin, to sugi’.
2Iatu tau iato den misa’ anakna disanga Saul, to malolle’ sia melo pati’na; moi misa’ tau tae’ ussau’ meloi dio lu mintu’ to Israel; angge palempengnari tu malangka’na to buda.
3Iatu keledai birangna Kish, ambe’na Saul, pa’de pira, anna ma’kada Kish lako Saul, nakua: Solanni tu taunta misa’ ammu male undaka’i tu keledai birang iato.
4Malemi ullelei tu buntu Efraim, sia ia duka tu lili’na Salisa, apa tae’ nakabu’tui; mangkato namane lili’na Sahalim, apa tae’ duka dio; mangkato iaomi tu lili’na Benyamin, apa tae’ duka naappa’i.
5Iatonna rampomo sola duai lako lili’na Zuf, nakuami Saul lako taunna tu nasolan: Maiko tasulemo, napaboko’i manii penaa ambe’ku tu keledai, anna kita napomasussa.
6Mebalimi nakua: Lan kota iate den misa’ taunNa Puang Matua, iamo misa’ to mala’bi’; manassa dadi tongan tu mintu’ napokadanna. Melo ke laoki’ lako, den sia manii upa’ napokadangki’ tu diona apa tatungkanan.
7Nakuami tu Saul lako taunna: Apa iake laoki’, apa la tabenni tu tau iato, belanna puramo takande tu roti lan kandu’ta, moi misa’ tae’mo dio kaleta la tabenni tu taunNa Puang Matua. Ba’tu den siaparaka apa dio kaleta?
8Ma’kada pole’omi tu kaunan iato lako Saul nakua: Tiroi, den siapa sangtepo sikele’ salaka diong pala’ku, ma’din kuben taunNa Puang Matua, anna pokadangki’ tu lalan sipatu la taola.
9Iatonna dolo-dolona dadi ada’mo dio lu to Israel, ke laoi tau ungkutanai Puang Matua, nakuami: Talao lako to patanda-tandan, belanna iatu to disanga nabi totemo, disanga to patanda-tandan dolo-dolona.
10Ma’kadami Saul lako taunna, nakua: Tonganna te timbangammu, maimoko tamale. Malemi sola duai lako kota nanii tu taunNa Puang Matua.
11Iatonna kendek sola duai langngan tondok iato, sitammumi ba’tu pira-pira anak dara sun la meuai; mekutanami lako nakua: Denraka to patanda-tandan inde te?
12Mebalimi tu tau iato mai, nakua: Den, tiromi nato dio, dio tingayomi; melo ke madoi’-doi’komi, apa allo ia duka te rampomo tama kota, belanna allo iate umpogau’ pa’maruasan tu pa’tondokan dao tu inan madao.
13Iammi tama kota, ma’din siapa miappa’, namane kendek langngan inan madao la kumande. Belanna tae’pa nala kumande tu tau iato mai, ke tae’pi nasae, apa ia la umpassakkei tu kande pemala’ iato; mangkato namane kumande tu mintu’ to ditambai. Melo kendekmokomi totemo, belanna attu ia bangsiamote ammi la sitammu.
14Mangkato tuka’mi sola duai anna tama kota. Iatonna rampomo tama kota, sirupangmi tassu’ tu Samuel la male langngan inan madao anna sitammu tu tau iato mai.
15Sangallo dolona anna kasaeanna Saul inang Napaombo’mo PUANG lako Samuel, Nakua;
16Masiang agi-agi attu susite la Kusua lako kalemu tu misa’ muane dio mai lili’na Benyamin; la mutokko la dadi arungna taungKu Israel, iamo la urrampanan taungKu dio mai limanna to Filistin. Belanna maturu-turuNa’ untiroi tu taungKu, saba’ rampomo pengkamoyana lako Kaleku.
17Iatonna tiromi Samuel tu Saul, saemi kadanNa PUANG lako kalena, Nakua: Iamote tu tau Kupokadangko; iamo la umparentai tu taungKu.
18Nareke’mi Saul tu Samuel dio tangnga babangan tondok, anna ma’kada, nakua: Kupalaku ammi padulluampa’, umba nanii tu banuanna to patanda-tandan.
19Mebalimi tu Samuel lako Saul, nakua: Akumote tu to patanda-tandan. Kendekmoko dolo langngan tu inan madao, belanna allo iate la kumandeki’ sola sia masiangri melambi’ kumane unnelorangko male. Iatu mintu’ apa lan penaammu la kupokadangko.
20Na iatu diona keledaimmu tu tallung allomo pa’dena, damo mupomasussai, belanna, diappa’mo. Minda pole’opara tu nanii mintu’ apa nakamali’ to Israel, ke tae’i nadio kalemu sia dio lu mintu’ sangdadiammu?
21Apa mebali tu Saul sia ma’kada, nakua: Tae’raka kumisa’ to Benyamin, tu bu’tu dio mai suku bitti’na to Israel? Sia iatu pa’rapuangku tang iamoraka madionganna dio mintu’ pa’rapuanna suku Benyamin? Ma’apai mima’kada susito lako kaleku?
22Mangkato nasolammi Samuel tu Saul sia tu taunna, nabaai sola duai tama inan dinii kumande, napaunno’ko’i dio kao’koran mala’bi’ dio inanna mintu’ to ditambai, agi-agi tallungpulo.
23Ma’kadami tu Samuel lako to ma’nasu, nakua: Parokkoanni sangorong, tu kubennako sia kupasanangko kumua: Patorro senga’i.
24Naangka’mi to ma’nasu sangsepak anna palenna’i dio olona Saul anna ma’kada tu Samuel, nakua: Iamote tu dipatorro senga’, dipalenna’mo dio olomu, kandemi, belanna inang diparandanammoko lan pa’maruasan iate, tongku ma’kada: Kutambaimo tu tau. Susimoto tu Saul kumande sola Samuel to allo iato.
25Mangkato mengkalaomi sola duai dao mai tu inan madao, anna tama kota. Sipa’kada-kadami Samuel tu Saul dao bubungan banua.
26Millik mela’bikmi sola duai; iatonna berre’mo allo natambaimi Samuel tu Saul langngan bubungan, nakua: Ke’de’moko angku solangko. Ke’de’mi tu Saul, anna male sola duai lako salian, la Saul la Samuel.
27Iatonna solo’mo sola duai nasae lako to’ biring kota, ma’kadami Samuel lako Saul, nakua: Padoloi tu taummu male namane kita. Dolomi tu taunna. – Apa la torroko indete dolo, angku pokadangko tu kadanNa Puang Matua.