Alkitab Mobile SABDA
[VER] : [TORAJA]     [PL]  [PB] 
 <<  1 Tawarikh 11 >> 

Daud dadi datu sia untalo Israel

1Sae nasangmi tu mintu’ to Israel mennolo lako Daud dio Hebron, anna ma’kada nakua: kami te sola nasang manassa sangrara sangbukuki’.

2Iatonna dolonapa, tonna Saul datu inang kamu duka tu umbaa to Israel tassu’ sia ussolanni tama, sia ma’kada tu PUANG, Kapenombammi, lako kalemi, Nakua: Iko la ungkambi’i tu taungKu Israel sia iko dukamo la dadi arungna tu taungKu Israel.

3Iamoto nasae tu mintu’ pekaamberan to Israel mennolo lako datu dio Hebron, anna sibasse Daud dio oloNa PUANG dio Hebron; mangkato natokkomi tu Daud dadi datunna to Israel, susi kadanNa PUANG tu nalopian Samuel.

4Ke’de’mi tu Daud sola mintu’ to Israel lako Yerusalem, iamotu Yebus; inde to dio nanii torro to Yebus, tu umpa’tondokki tondok iato.

5Ma’kadami tu to umpa’tondokki Yebus lako Daud nakua: Tae’ mikullei tama mai, apa natalo sia Daud tu tambakuku Sion, iamo kotana Daud.

6Nakuami Daud: Minda-minda tu bunga’na umpatei to Yebus, iamo la dadi pangulu sia kamandang. Yoab, anakna Zeruya, tu bunga’na ungkendekki, iamoto anna ia dadi pangulu.

7Torromi Daud lan kota ditambakuku iato; iamoto nasangai tau kotana Daud.

8Napamatoto’mi tu mintu’ biring kota randuk dio mai Milo sia tiku lao sia napemeloi Yoab tu kota torronapa.

9Samasai-sainna satarompo’-rompo’nami tu Daud sia Narondong PUANGna mintu’ ma’dandan maritik.

To lalongna Daud

10Inde sia tu pangulu pa’baraninna Daud, tu sola mintu’ to Israel matoto’ untundui la umpabendan kadatuanna, la unnangka’i datu, susi kadanna PUANG diona to Israel.

11Inde sia tu bilanganna pa’baraninna Daud, iamotu Yasobam, anakna Hakhmoni, pangulunna to tallungpulo; unnea doke tau talluratu’, napissanri napatei.

12Den pole’omi Eleazar, anakna Dodo, to Ahohi; iamo sangbilangan tu tallu pa’barani.

13Iamo sisola Daud dio Pas-Damim, tonna sirampun tu to Filistin inde to dio la parari. Denmi sanggori’ pa’lak dio nasitutu’i dalle sisikan, namallaimo tu surodadu naula’ to Filistin.

14Bendanmi tu tau iato mai lan tangnga pa’lak iato, napangeai tu pa’lak iato, anna taloi tu to Filistin. Nakamaseammi PUANG kapataloan kapua.

15Denmi tallui tu kamandang tallungpulo male rokko buntu batu, umpelambi’i Daud, lako lo’ko’ Adulam, tonna ma’tenda tu surodadu to Filistin dio rante Refaim.

16Attu iato iatu Daud lan tambakuku, na attu ia dukato iatu pa’kampan surodadu to Filistin dio Betlehem.

17Morai liumo tu Daud, anna ma’kada nakua: Mindara ma’din umbanna’ uai dio mai bubun dio Betlehem, sikandappi’ babangan?

18Natamaimi pa’barani sola tallui tu inan surodadunna to Filistin, natimbai tu uai diong mai bubun dio Betlehem sikandappi’ babangan, namale umbanni Daud. Apa tae’ namorai tu Daud unniru’i, sangadinna nabolloan dio oloNa PUANG.

19Anna ma’kada nakua: Napatoyangmira Kapenombangku la umpogau’i tu susinna te! La kuiru’raka tu rarana tau iate mai, iamotu sondana katuoanna? Belanna untibe sunga’na te tau iate mai, umbaai. Tae’mi namorai unniru’i. Susimoto tu penggauranna tinde to lalong sola tallui.

20Iatu Abisai, siulu’na Yoab, iamo pangulunna tu tau tallu. Na iamoto tu unnea doke tau talluratu’, napatei nasangi. Iamoto natarompo’ dio to tau tallu.

21Dio lu te tau tallu da’dua tu umpakaraya Abisai, manassa iamotu pangulunna. Apa tae’ nalambi’i tu to tallu disa’bu’ dolona.

22Sia Benaya, anakna Yoyada, anakna misa’ pa’barani, tu tarompo’ penggauranna, dio mai Kabzeel, umpatei da’dua pa’barani lalong dio mai Moab. Den duka sangallo tonna attunnamo ambun makko namengkalao rokko garuang, napatei tu misa’ singa diong.

23Sia umpatei duka misa’ to Mesir, iamo misa’ muane tu limang siku langka’na; iatu to Mesir untoe doke pada tandaan; apa ia manna tu tekken napake ullaoi, nasintakki tu doke lan mai limanna to Mesir, nadoke iato napateanni.

24Susimoto tu penggauranna Benaya, anakna Yoyada; tarompo’mi dio lu pa’barani sola tallui.

25Moi anna dipakaraya ia dio lu to tau tallungpulo – apa tae’ nalambi’i tu to tallu disa’bu’ dolona. Naangka’mi Daud pangulunna mintu’ pa’kampana datu.

26Sia den dukapa tu pa’barani lalong, iamotu Asael, siulu’na Yoab; Elhanan, anakna muane Dodo dio mai Betlehem;

27Samot to Harod; Heles to Peloni;

28Ira, anakna muane Ikesh, to Tekoa; Abiezer to Anatot;

29Sibkhai to Husa; Ilai to Ahohi;

30Maharai to Netofa; Heled, anakna muane Baana, to Netofa;

31Itai, anakna muane Ribai, dio mai Gibea to Benyamin; Benaya to Piraton;

32Hurai dio mai lombok Gaas; Abiel to Arbati;

33Asmawet, to Bahurim; Elyahba, to Saalbon;

34anakna muane Hasyem, to Gizon; Yonatan, anakna muane Sage, to Harari;

35Ahiam, anakna muane Sakhar, to Harari: Elifal, anakna muane Ur;

36Hefer, to Mekherati; Ahia, to Peloni;

37Hezro, to Karmel; Naarai, anakna muane Ezbai;

38Yoël, siulu’na Natan; Mibhar, anakna muane Hagri;

39Zelek, to Amon; Naharai, to Beerot, pa’takinna Yoab, anakna muane Zeruya;

40Ira, to Yetri; Gareb, to Yetri;

41Uria, to Het; Zabad, anakna muane Ahlai;

42Adina, anakna muane Siza, to Ruben, pangulunna to Ruben, sia sola tau tallungpulo:

43Hanan, anakna muane Maakha; Yosafat, to Mitni;

44Uzia, to Astarot; Syama na Yediael, anakna muane Hotam, to Aroër;

45Yediael, anakna muane Simri na Yoha, to Tizi, siulu’na;

46Eliel, dio mai Mahawim; Yeribai na Yosawya, anakna muane Elnaam; Yitma, to Moab;

47na Eliel, Obed na Yaasiel dio mai Mezobaya.


  Share Facebook  |  Share Twitter

 <<  1 Tawarikh 11 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran