Dual Panel1Iatonna taun pole’omo, tu attu nanii datu biasa tassu’ parari, narampunmi Yoab tu mintu’ surodadunna sia nasolan la parari, anna sanggangi tu tondokna to Amon; iatonna mangkato malemi anna patama limbui tu Raba, apa iatu Daud torro dio Yerusalem. Natalomi Yoab tu kota Raba, nasanggangi.
2Naalami Daud tu makota dao mai ulunna datunna tau iato mai. Naappa’mi tu bulaanna sangtalenta timbanganna, nanii parimata intan dio, iatu makota iato dipasongkoran ulunna Daud. Sia buda duka pangrampa nabaa lan makota iato.
3Mintu’ tu to torro lan napesuan untassu’i sia napesuan umpasumpandanni diongna lu gare’ge’ sia diongna lu panglulluran bassi sia napesuan unta’tak-ta’takki uase. Susimoto tu penggauranna Daud lako mintu’ kota to Amon. Mangkato sulemi tu Daud sola mintu’ surodadu lako Yerusalem.
Kadirarianna to Filistin
4Mangkato dirariimi tu to Filistin dio Gezer; attu iato napateimi Sibkhai, to Husa tu Sipai, bati’na Refa, anna taloi tu tau iato.
5Undinnato sirari pole’omi to Filistin, napateimi Elhanan, anakna Yair, tu Lahmi, siulu’na Goliat, to Gat; na iatu batang dokena sama tandaan to ma’tannun.
6Sia den pole’omi kasirarian dio Gat; den dio tu misa’ muane kala’dok sia iatu mai tangkena rundun siannan tu rakka’na patomali, mintu’na duangpulo nna’pa’; tau ia dukato bati’na Rafa.
7Natelle-telle tu to Israel, apa napatei Yonatan, anakna Simea, kakanna Daud.
8Tau iate mai bati’na Rafa dio Gat; iatu tau iato napatei Daud sola mintu’ to lalongna.