Dual PanelDaud mesua unnia’ mintu’ to naparenta anNa ukungi PUANG; Diona inan la dinii umbangun banua kabusungan
1Ke’de’mi tu deata bulituk la umpandasa to Israel, iamoto naa’panmi tu Daud, kumua naia’i tu to Israel.
2Attu iato ma’kadami tu Daud lako Yoab sia mintu’ pangulunna to buda, nakua: Malekomi unnia’ mintu’ to Israel randuk dio mai Bersyeba sae lako Dan, ammi sule umbanna’ tu bilanganna, angku issanni budanna.
3Ma’kadami tu Yoab nakua: Na PUANGmora urrangnganni tu taunNa pessaratu’ manglokkon na iatu dennamo. Iate tau iate sola nasang, o puangku, tang taunnaraka puangku? Ma’apai nakaduangi puangku te apa iate? Ma’apari te apa iate nala umpasaera kasalan lako to Israel.
4Apa patalo tu kadanna datu lako Yoab; iamoto ke’de’mi tu Yoab anna male ullelei mintu’ tondok Israel; undinna to sulemi lako Yerusalem.
5Iatu budanna mintu’ tau diia’ napennoloan Yoab lako Daud; iatu mintu’ to Israel, tu muane untakin pa’dang den sangsa’bu saratu’ sa’bunna; na iatu budanna to Yehuda, tu muane untakin pa’dang den a’pa’ratu’ pitungpulo sa’bunna.
6Apa iatu bati’na Lewi sia bati’na Benyamin tae’ napaalai bilangan, belanna napomagalli Yoab tu parentana datu.
7Apa iatu iannato kadake dio pentiroNa Puang Matua, iamoto Napandasai tu to Israel.
8Attu iato ma’kadami Daud lako Puang Matua nakua: Mandu tonganmo’ kasalan umpogau’i tu iannato; apa melo ke Mipa’dei tu kasalanna taumMi, belanna kabagan tu kupogau’.
9Ma’kadami tu PUANG lako Gad, to patanda-tandanna Daud, Nakua:
10Maleko umpokadanni Daud kumua: Inde sia tu kadanNa PUANG: Tallu te apa Kupapatuangko; pileimi sala umbanna misa’, angKu parampoangko.
11Saemi tu Gad lako Daud umpokadanni tu kada iato, nakua: Inde sia tu kadanNa PUANG: La mupileimo:
12ra’pak padangraka tallung taun, ba’tu iaraka tu la mallaiko naula’ ualimmu lan tallung bulan, anna lambirangko pa’dangna ualimmu, ba’tu iaraka tu pa’dangna PUANG, iamotu ropu mangebang tallung allo lan tondok na malaeka’Na PUANG umparampo kamandasan lan mintu’ lili’na tondok Israel. Timbangmi totemo umbannamo tu la kuparampo lako tu To ussuana’.
13Ma’kadami tu Daud lako Gad nakua: Lendu’mo pussakku; melomo ke tobang rokkona’ limanNa PUANG, belanna kapua tongan tu kamamaseanNa, podo da angku tobang rokko limanna to lino.
14Iamoto Naparampoimi ropu PUANG tu to Israel, anna mate tu to Israel pitungpulo sa’bunna.
15Nasua duka Puang Matua tu misa’ malaeka’ lako Yerusalem la ussanggangi, apa iatonna randukmo umpogau’i to, Natiromi PUANG, anNa penassanni Puang tu kamandasan iato. Ma’kadami lako malaeka’ pasanggang, Nakua: Silasamo to! Riu’mi sule tu limammu. Attu iato iatu malaeka’Na PUANG bendan sikandappi’ panglulluranna Ornan, to Yebus.
16Mentingarami tu Daud natiroi tu malaeka’Na PUANG bendan dio kasiallaranna langi’ na tana, sitangke pa’dang tinonok, umpopange’te’ limanna lako Yerusalem; attu iato tukkumi menomba rokko padang tu Daud sola tu mai pekaamberan umpennammu’ karoro’.
17Ma’kadami tu Daud lako Puang Matua nakua: Tang akuraka mesua unnia’i te mai tau? Manassa akumora tu kasalan sia umpogau’i tu apa kadake liu; apa iate mai domba, apara ia tu napogau’? O! PUANG Kapenombangku, elo’namo Mipata’paina’ lima sola tu mai sangdadiangku, apa da na iatu taumMi Mipata’pai lima la umpandasai.
18Nasuami malaeka’Na PUANG tu Gad umpokadai lako Daud, kumua la male tu Daud langngan la umpabendanan inan pemalaran PUANG dao to’ panglulluranna Ornan, to Yebus.
19Naturu’mi Daud tu kadanna Gad, tu napokada tete dio sanganNa PUANG, anna male.
20Messailemi tu Ornan, natiromi tu malaeka’; iatu anakna sola a’pa’i tu nasisolan male umpebunian kalena; na iatu Ornan marassan manglullu’gandung.
21Rampomi tu Daud lako Ornan, naadongammi Ornan tu ulunna anna tiroi tu Daud, tassu’mi lan mai to’ panglulluranna, anna tukku menomba lako Daud sae rokko padang.
22Ma’kadami tu Daud lako Ornan nakua: Benna’ te inan panglulluran iate, angku nii umpabendanan PUANG misa’ inan pemalaran; la mubenna’ ammu papatui tonganni allinna, dennoupa’ anna toyang te kasanggangan dio mai pa’tondokan.
23Apa nakua tu Ornan lako Daud: Melo ke miala bangmi, datu; napogau’ bangmi puangku tu apa nasanga melo. Indemo tu sapi kusorong la dipopemala’ ditunu pu’pu’, sia iatu parea panglulluran la dipokayu tutungan sia gandung la dipokande dipemalaran; mintu’nato kusorong nasang.
24Apa nakua tu datu lako Ornan: Tae’ nasusito, sangadinna inang la kualli sipatunna allinna, belanna tae’ kumorai umpennoloanni lako PUANG tu apammu sia tae’ angku pemalaranni tu pemala’ ditunu pu’pu’, tu apa tang kualli.
25Nabenmi Daud tu bulaan annan ratu’ sikele’ timbanganna lako Ornan diona inan iato.
26Indemoto nanii Daud umpabendananni PUANG tu inan pemalaran, napemalaranni tu pemala’ ditunu pu’pu’ sia pemala’ kasalamaran, nametamba langngan PUANG, Nabalii Puang api dao mai langi’ sae dio to’ inan pemalaran dinii mantunu.
27Ma’kadami PUANG lako tu malaeka’ iato ussuai umpasibanuai sule tu pa’dangna.
28Iatonna tiromi Daud, kumua Nabali PUANG dio to’ inan panglulluranna Ornan, attu iamoto namemala’ dio.
29Moi na attu iato iatu kemaNa PUANG, tu napabendan Musa sola inan pemalaran dinii mantunu dio padang pangallaran, dao inan madao dio Gibeon,
30apa tang pakalamo Daud male lako umpennoloi Puang Matua la mekutana, belanna umpotirambanmo pa’dangna malaeka’Na PUANG.