Dual PanelYehu ussabu’i bati’na Ahab
1Iatu Ahab pitungpulo tu anakna muane dio Samaria. Nasura’mi Yehu tu misa’ sura’ napakatui lako Samaria, lako tu mai pangulu Yizreel, sia mintu’ pekaamberan sia mintu’ to naangka’ Ahab ma’pangada’, nakua:
2Totemote, iake rampomi te sura’ lako kalemi, – belanna iatu mintu’ anakna puangmi sisolakomi, sia miampui ba’tu pira-pira kareta sia darang sia kota ma’tambakuku sia ma’rupa-rupa pa’buns-
3iamoto la mitonno’ tu to melo sia to sipatu tongan dio lu mintu’ anakna puangmi, ammi padaoi isungan kapayunganna ambe’na, ammi parari belanna to lan tongkonan layukna puangmi!
4Apa lendu’ mataku’na tu tau iato mai, nama’kada nakua: Ia duka tu da’dua datu tang natanan dio olona, apa pole’ te kitate tala unnattai?
5Mesuami tu pangulu to mase’ponna datu sia kamandang kota sia iatu mai pekaamberan sia to ma’pangada’ lako Yehu, nakua: Iate kamite taummikan, iatu mintu’ parentami kidudung, moi misa’ tau tae’ra kiangka’ datu; apa iatu misanganna melo, pogau’mi.
6Iatu Yehu ma’penduanmo massura’ to lako tau iato mai, nakua: Iake la situru’ki’ sia miperangii tu kadangku, alai ulunna tu mintu’ muane, iamotu mai anakna puangmi, ammi sae lako kaleku dio Yizreel, masiang ke attu susite. Iatu mai anakna datu pitungpulo torro dio lu to kapua lan tondok, tu to unnada’i.
7Iatonna rampomo tu sura’ lako tau iato mai, natingkanmi sia napatei tu anakna datu, pitungpulo, na iatu mai ulunna napatama karandang, napa’peanni Yehu lako Yizreel.
8Saemi tu to disua umpokadanni nakua: Nabaamo tau tu ulunna mintu’ anak datu. Nakuami tu Yehu: Patorroi duang torroan dio babangan kota sae lako masiang melambi’.
9Masiang to, sunmi tu Yehu, nabendan dio tingayona to buda nama’kada nakua: Iatu kamu sola nasang tae’ misala. Manassa akumo tu umpaden kasipakulu-kuluan unnea puangku na akumora tu umpatei. Apa mindara ia umpatei nasangi te?
10La miissan kumua moi sangbuku kada tae’ tang dadi tu mintu’ kadanNa PUANG tu apa Napokada PUANG la urrampoi bati’na Ahab; na sundunni PUANG tu apa Napokada nalopian Elia, taunNa.
11Napatei dukapa Yehu tu mintu’ to lan banuanna Ahab, tu torrona dio Yizreel sia mintu’ to kapuana na mintu’ to manappa’na sia to minaanna, naurungan moi misa’ tae’mo napatuo tu tau iato mai.
12Ta’pa ke’de’mi male tu Yehu lako Samaria. Iatonna rampomo lako lalanna dio Bet-Eked, inan to manglaa,
13nakabu’tuimi Yehu tu mintu’ siulu’na Ahazia, datu to Yehuda, mekutanami lako nakua: Mindarokomi te? Mebalimi tu tau iato nakua: Kami sola nasang te, siulu’nakanni Ahazia, saekan unto’longi mintu’ anakna datu sia anakna datu baine.
14Mesuami tu Yehu nakua: Tingkan tuoi tu mati’ tau. Natingkan tuomi anna pongkoi dio to’ bubun Bet-Eked tu muane patangpulo ndua moi misa’ tae’ napatuo len.
15Iatonna malemo dio mai sitammumi Yonadab, anakna Rekhab, tu sae umpessitammui. Nasalama’mi Yehu nama’kada nakua: Malolo siaraka penaammu lako kaleku susi penaangku malolo lako kalemu? Mebalimi, tu Yonadab nakua: Io tonganna. Ma’kadami Yehu lako nakua: Iake susito, tasitoe limamo. Sitoe limami sola duai. Nasuai kendek langngan karetana.
16Nakuami Yehu: Maimokomi tamale sola ammu tiroi tu kamatutturangku umposara’i tu diona PUANG. Iamoto nasuai tu tau iato mai kendek langngan karetana.
17Iatonna rampomo lako Samaria, napongkomi tu mintu’ to lan banuanna Ahab, tu torronapa dio Samaria, sae lako mangsan nasang tu tau lan banua, susitu kadanNa PUANG, tu mangka Napokada lako Elia.
Yehu umputtai kamenomban lako Baal
18Narampunmi Yehu tu mintu’ to buda, anna ma’kada lako nakua: Iatu Ahab ke menombai lako Baal, kurang siapa, apa iatu Yehu la losong ia ke menombai.
19Iamoto tambai nasangmi tu mai nabi Baal sia iatu mai to umpengkaolai sia mintu’ to minaanna, moi misa’ tae’ tang la dioren, belanna la kupogau’ tu misa’ pemala’ kapua lako Baal. Minda-minda tang ma’dioren, tae’ nala dipatuo. Iate napogau’ Yehu ma’pakena bangri, kumua namangsanni nasangi tu to umpengkaolai Baal.
20Nakuami Yehu: Pamadatuanni Baal misa’ allo kamenomban. Napa’peissananmi tau tu kamanassanna.
21Mesuami tu Yehu lako mintu’ to Israel, nassae nasang tu to umpengkaolai Baal, moi misa’ tau tae’mo torro. Male nasangmi tama banua dinii umpenombai Baal, naurungan ponno tu banuanna Baal randuk dio mai tampakna sae lako tampak sangbalinna.
22Ma’kadami tu Yehu lako to ma’kampa inan pakean, nakua: Patassu’i tu pakean tu napake to umpengkaolai Baal. Napatassurammi pakean tu tau iato mai sola nasang.
23Mangkato saemi tu Yehu sola Yonadab, anakna Rekhab, namale tama banua dinii umpenombai Baal; ma’kadami lako to umpengkaolai Baal, nakua: Paressa tongan-tonganni da naden misa’ inde te tu to umpengkaolai PUANG, sangadinna ia manna tu to umpengkaolai Baal.
24Mentamami tu tau iato mai la umpennoloan pemala’ pangrere’ sola pemala’ ditunu pu’pu’. Naparandanmi Yehu tu tau karuapulona dio salian nama’kada lako nakua: Minda-mindakomi urrampananni misa’ te tau iate tu kusorongmo lako kalemi, manassa sunga’mi la dipasondana tu sunga’na.
25Iatonna mangkamo tu tau umpemalaran pemala’ ditunu pu’pu’, ma’kadami Yehu lako mintu’ to ma’kampa sia kamandang, nakua: Malekomi tama, ammi patei tu tau iato mai, moi misa’ tau da mipalussu’i. Napateimi pa’dang sola nasangi, anna tibei tu mai to ma’kampa sia kamandang tu batang rabukna. Undinnato sulemi tama lili’ kota, tu kampong nanii banua Baal.
26Nabaami tassu’ lan mai banuanna tu mintu’ batu dipodeata, napura umballai.
27Sia natesse-tesse tu batu dipodeatanna dinii umpenombai Baal sia narondonni tu banuanna Baal anna popekkueranni sae lako totemo.
28Susimoto tu Yehu umputtai Baal lan mai Israel.
29Sangadinna ia manna tu kasalanna Yerobeam, anakna Nebat, tu napa’pesuan lako to Israel umpogau’i, tae’ naboko’i Yehu, iamotu mai anak sapi bulaan dio Betel sia dio Dan.
30Ma’kadami tu PUANG lako Yehu nakua: Belanna melomo tu penggaurammu sia mupogau’mo tu apa malolo dio pentiroKu sia muparampomo lako to lan banuanna Ahab tu mintu’ pangala penaangKu, iamoto na iatu ampo bati’mu muane la unnisungi isungan kapayunganna Israel sae lako osso’ ma’penna’pa’.
31Apa tang ponno penaanna tu Yehu ungkaritutui Sukaran alukNa PUANG, Kapenombanna to Israel, belanna tae’ naboko’i tu kasalanna Yerobeam, tu napa’pesuan lako to Israel umpogau’i.
32Iatonna attu iato Naparandukmi PUANG umpabitti’i tu lili’na Israel, belanna natalo Hazael, tu tau iato mai dio lu mintu’ lili’na to Israel,
33rampe matallona salu Yordan; iamotu mintu’ tondok Gilead, lili’na Gad, Ruben na Manasye, randuk dio mai Aroër dio salu Arnon, la Gilead la Basan.
34Iatu tang dipokadannapa tu mintu’ tuna’na Yehu sia mintu’ apa napogau’ sia penggauran lalongna, tang tisura’moraka lan sura’ ossoranna mintu’ datu to Israel?
35Iatu Yehu malemo tama batu dilobang sola nene’ to dolona, anna dipeliang dio Samaria. Anna Yoahas, anakna muane, ussondai dadi datu.
36Duangpulo ngkarua taunna tu Yehu umparenta to Israel dio Samaria.