Dual Panel1Iatonna taun ma’pempitu kadatuanna Yehu, dadimi datu tu Yoas, nama’parenta patangpulo taunna dio Yerusalem. Iatu indo’na disanga Zibya, dio mai Bersyeba.
2Napogau’mi Yoas tu apa malolo dio pentiroNa PUANG temponna naada’i to minaa Yoyada.
3Ia mannamo tu inan madao dinii memala’ tae’ nadiratoi; na iatu to buda tontong siapa mantunu sia memala’ dao inan madao iato.
4Nasuami Yoas tu mintu’ to minaa, kumua: Iatu mintu’ doi’ dio lu pamengan dipamaindan dibaa tama banuanNa PUANG, iamotu doi’ to naala bilangan, doi’ pamaya’ ulla’bak tau sitinaya tassere’na misa’-misa’ tau, sia iatu mai doi’ nasorong to ma’lalan penaanna, tama banuanNa PUANG,
5pantan la naala to minaa dio mai sitandanna; sia iatu doi’ iato la dipake umpemeloi tu sanggangna dio lu banuanNa Puang, tu umba-umbanna ditiro sanggang.
6Apa iatonna ma’duangpulo ntallu taunna ma’parenta tu Yoas tae’ bangsia napemeloi to minaa tu mai sanggangna dio lu banua kabusungan.
7Iamoto natambaimi datu Yoas tu to minaa Yoyada sia mintu’ to minaa, anna ma’kada lako nakua: Ma’apai mitang umpemeloi tu mai sanggangna dio lu banua kabusungan? Totemo damo mitarimai tu doi’ dio mai sitandammi, sangadinna sorongi anna dipake umpemeloi tu mai sanggangna dio lu banua kabusungan.
8Napasituru’mi to minaa tu iannato, tae’mo natarimai tu doi’ dio mai to buda, sia tang napemeloi duka tu mai sanggangna dio lu banua kabusungan.
9Naalami to minaa Yoyada tu misa’ patti, nalo’po’i tu tutu’na, napatorroi dio sa’de inan pemalaran, dipokanan, ke maleki’ tama banuanNa PUANG. Mintu’ tu to minaa ungkampai ba’ba, umpatamai patti tu doi’ nabaa tau tama banuanNa PUANG.
10Iatonna tiromi tau iato mai kumua budamo tu doi’ lan patti, saemi tu pangulu to massura’na datu sola tominaa kapua; napatamai kandu’ tu doi’ naappa’ lan banuanNa PUANG anna bilangi.
11Iatu doi’ ditimbangmo nasorongmi lako to diangka’ la ungkapalai pa’diaman dio banuanNa PUANG, sia iamo la ussaroi tu mai to pande kayu sia to manarang umpasirundunan pengkarangan dio banuanNa PUANG,
12sia iapa tu mai pande batu sia to ma’pa’ batu; sia la unnalli kayu sia batu dipa’ la umpemeloi tu mai sanggangnamo dio lu banuanNa PUANG, sia mintu’na tu apa dipaolai doi’ la umpemeloi tu banua iato.
13Apa tae’ nadigaragan banuanNa PUANG tu dolong-dolong salaka, piso, pindan pa’pi’pikan, tarompe’, tae’ nadigaragan pareanan bulaan ba’tu salaka dio mai tu doi’ dibaa tama banuanNa PUANG.
14Sangadinna napa’bengan lako to ungkapalai pa’diaman, anna pakei umpemeloi banuanNa PUANG.
15Sia tae’ narekenni tau iato mai tu doi’ lako tu to nanii ussorongi, kumua anna benni to mengkarang, belanna tau iato mai dikanappa’i.
16Iatu doi’ pemala’ suru’ pangakuan sala sia suru’ pengkalossoran tae’ nadibaa tama banuanNa PUANG, sangadinna diben to minaa.
17Malemi tu Hazael, datu to Aram urrarii kota Gat, anna taloi. Mangkato ma’palulakomi Yerusalem la urrarii.
18Naalami Yoas, datu to Yehuda, tu mintu’ pamengan dipamaindan, tu napamaindan Yosafat, Yoram sola Ahazia, ambe’na, iamo datu to Yehuda, susi dukato tu mintu’ pamengan napamaindan kalena sia mintu’ bulaan tu lan inan pangnannanna banuanNa PUANG sia apa lan tongkonan layuk, anna pakatui lako Hazael, datu to Aram. Tibalikmi sule tu Hazael dio mai lalan lu lako Yerusalem.
19Iatu tang dipokadannapa tu mintu’ tuna’na Yoas sia mintu’ apa napogau’, tang tisura’moraka lan sura’ ossoranna mintu’ datu to Yehuda.
20Iatu mai to mase’ponna ke’de’mi sipakulu-kulu, anna patei tu Yoas lan banuanna Milo, diong se’pon lalan rokko Sila.
21Iamotu Yozakar, anakna Simeat, sia Yozabad, anakna Somer taunna, umpatei, namate. Anna peliangi tau sola nene’ to dolona lan kotana Daud. Anna Amazia, anakna muane, ussondai dadi datu.