Dual PanelDiona Yoahas, datu to Israel
1Iatonna taun ma’penduangpulomo ntallu kadatuanna Yoas, anakna Ahazia, datu to Yehuda, dadimi datu tu Yoahas, anakna Yehu, umparenta to Israel dio Samaria; anna ma’parenta sangpulo pitu taunna.
2Napogau’mi tu apa kadake dio pentiroNa PUANG sia unturu’ mintu’ kasalan, napa’pesuan Yerobeam, anakna Nebat, lako to Israel umpogau’i; tae’ namemboko’ dio mai to.
3Iamoto re’dekmi ara’Na PUANG lako to Israel, anNa sorongi tu tau iato mai tama limanna Hazael, datu to Aram sia tama limanna Benhadad, anakna Hazael lan mintu’ attu.
4Apa iatu Yoahas umpengkamoyai kamamaseanNa PUANG anNa perangii PUANG, belanna Natiromo Puang, tumba masarrangna datu Aram umpakario-rio to Israel.
5Nakamaseimi PUANG tu to Israel misa’ tau urrampananni, naurungan tau iato mai tilendok dio mai kuasanna to Aram, anna pada untorroi tendana sule tu to Israel susi dolona.
6Apa tae’ naboko’i tu mintu’ kasalanna bati’na Yerobeam, tu napa’pesuan lako to Israel umpogau’i sangadinna napatarru’ bang tau iato mai. Sia tontong duka bendan dio Samaria tu lentong kayu dipodeata.
7Tonganna tae’ napatorroanni surodadu sangadinna pakkanarang limangpulo sia kareta sangpulo sia iatu to ma’lingka sangpulo sa’bu; belanna nasanggangmo datu to Aram tu tau iato mai sia napasusi barra’-barra’ ke attu panglulluran.
8Iatu tang dipokadannapa tu mintu’ tuna’na Yoahas sia mintu’ penggauranna sia mintu’ penggauran lalongna, tang tisura’moraka lan sura’ ossoranna mintu’ datu to Israel?
9Iatu Yoahas malemo tama batu dilobang sola nene’ to dolona, anna dipeliang dio Samaria, Anna Yoas, anakna muane, ussondai dadi datu.
Diona Yoas, datu to Israel
10Iatonna taun ma’pentallungpulo mpitu kadatuanna tu Yoas, datu to Yehuda, dadimi datu tu Yoas, anakna Yoahas, umparenta to Israel dio Samaria; anna ma’parenta sangpulo annan taunna.
11Napogau’mi tu apa kadake dio pentiroNa PUANG; tae’ naboko’i tu mintu’ kasalan, tu napa’pesuan Yerobeam, anakna Nebat, lako to Israel umpogau’i; napatarru’ bang datu to.
12Iatu tang dipokadannapa tu mintu’ tuna’na Yoas sia mintu’ tu apa napogau’ sia mintu’ penggauran lalongna, tu diona kasirarianna Amazia, datu to Yehuda, tang tisura’moraka lan sura’ ossoranna mintu’ datu to Israel?
13Iatonna malemo tama batu dilobang tu Yoas sola nene’ to dolona, naisungimi Yerobeam tu isungan kapayungan. Dipeliangmi tu Yoas dio Samaria sola mintu’ datu to Israel.
Diona apa dadi tonna la kamateanna Elisa sia kamangngan dio to’ kaburu’na
14Iatonna masaki tu Elisa, tu saki napobannang mate, saemi tu Yoas, datu to Israel lako kalena anna tumangi’ dio olona sia ma’kada nakua: O ambe’ku, ambe’ku! Karetana sia pakkanarangna to Israel!
15Nakuami tu Elisa lako: Alako pana sola tinaran. Naalammi pana sola tinaran.
16Nakuami tu Elisa lako datu to Israel: Toemi tu pana. Natoemi. Naparemme’i limanna Elisa tu limanna datu.
17Mangkato nakuami: Bungka’i tu pentiroan ma’palulako matallo. Iatonna bungka’mi ma’kadami Elisa nakua: Pa’pananni. Napa’panammi. Nakuami: Iamoto tu tinaran kapataloan lu dio mai PUANG, iamotu misa’ pana untalo to Aram. Iatu to Aram la mitalo dio Afek, naurunganni sanggang tu tau iato mai.
18Mangkato nakuami: Alami tu tinaran. Naalami to. Nakuami tu Elisa lako datu to Israel: Pembambanni rokko padang. Napembambammi pentallun namane untorroi.
19Re’dekmi ara’na tu taunNa Puang Matua lako, sia ma’kada nakua: Iakemmi bambai pellima ba’tu pennannan, manassa la mitalo tu to Aram sae lako sanggangna tu tau iato mai. Apa totemo pentallunri mitalo tu to Aram.
20Mangkato matemi tu Elisa, napeliangmi tau. Iatonna iato denmi ba’tu pira-pira tuntunan to Moab tama tondok la mangrampa, tonna randuk pentaunan.
21Den pissan nadilamun tu misa’ tau, pakalan natiromi tau iato mai tu sangtuntunan tau; napembuangammi tinde to mate tama liangna Elisa, anna male mallai. Iatonna rumbumi tu batang rabukna Elisa, tuomi sule, anna malimbangun bendan.
Yoas untalo to Aram
22Iatu Hazael, datu Aram, umpakario-rio to Israel angge tuona Yoahaz.
23Apa Nakarimmanni PUANG tu tau iato mai sia Nakamasei, anna pessailei belanna basseNa sola Abraham, Ishak na Yakub; tae’ Namorai ussanggangi sia tae’pa Nasualei tu tau iato mai dio mai oloNa.
24Iatonna matemo tu Hazael, datu to Aram, Benhadadmi, anakna muane, dadi datu ussondai.
25Iatu Yoas, anakna Yoahas, unnalai sule tu ba’tu pira-pira kota lan mai limanna Benhadad, anakna Hazael; iatu kota iato naala Hazael dolo lan mai limanna Yoahas, ambe’na Yoas tonna sirari. Natalomi Yoas pentallun tu Benhadad, naalai sule tu mai kotana to Israel.